‘ಗ್ಯಾಂಗ್ ರೇಪ್’ ಬೆದರಿಕೆ ಎದುರಿಸಿದ್ದರಂತೆ ನಟಿ ಪ್ರಿಯಾಂಕಾ…!

Team Udayavani, Feb 23, 2021, 8:00 PM IST

ಮುಂಬೈ : ಬಾಲಿವುಡ್ ನಟಿ ಪ್ರಿಯಾಂಕಾ ಚೋಪ್ರಾ ಹಾಲಿವುಡ್ ಸಿನಿಮಾ ರಂಗದಲ್ಲಿ ತಾವು ಎದುರಿಸಿದ್ದ ಕಹಿ ಘಟನೆಗಳನ್ನು ತಮ್ಮ ಪುಸ್ತಕದಲ್ಲಿ ತೆರೆದಿಟ್ಟಿದ್ದಾರೆ.

ಬಿಟೌನ್ ನಿಂದ ಹಾಲಿವುಡ್ ಗೆ ಹಾರಿದ್ದ ಪ್ರಿಯಾಂಕಾ ಅವರಿಗೆ ಎದುರಾಗಿದ್ದು ಜನಾಂಗೀಯ ನಿಂದನೆ, ವರ್ಣಭೇದದ ಬಿಸಿ. ಅಮೆರಿಕದ ರಿಯಾಲಿಟಿ ಶೋವೊಂದರ ಮೂಲಕ ಅಂತಾರಾಷ್ಟ್ರೀಯ ಚಿತ್ರರಂಗಕ್ಕೆ ಪಿಗ್ಗಿ ಪದಾರ್ಪಣೆ ಮಾಡಿದ್ದರು. ಈ ಕಾರ್ಯಕ್ರಮದ ಪ್ರೋಮೊ ಅದ್ದೂರಿಯಾಗಿ ರಿಲೀಸ್ ಆಗಿತ್ತು. ಆದರೆ, ಈ ಪ್ರೋಮೊ ವಿರುದ್ಧ ಸಾಕಷ್ಟು ವಿರೋಧ ಕೇಳಿ ಬಂದಿತ್ತಂತೆ. ಈ ಕುರಿತು ಪುಸ್ತಕದಲ್ಲಿ ಅವರೇ ಹೇಳಿಕೊಂಡಿರುವಂತೆ ‘ಈ ಪ್ರೋಮೊ ನನಗೆ ಒಳ್ಳೆಯ ಬ್ರೇಕ್ ನೀಡಬಹುದು ಎಂದುಕೊಂಡಿದ್ದೆ. ಆದರೆ, ಸಾಕಷ್ಟು ಜನರ ನೆಗೆಟಿವ್ ಕಾಮೆಂಟ್ ನೋಡಿ ನನ್ನ ನಿರೀಕ್ಷೆ ನೀರು ಪಾಲಾಯಿತು ಎಂದಿದ್ದಾರೆ.

ರೇಪ್ ಬೆದರಿಕೆ :

ಹಾಲಿವುಡ್ ಚಿತ್ರರಂಗದಲ್ಲಿ ಮಿಂಚಬೇಕು ಎಂದಿದ್ದ ಪ್ರಿಯಾಂಕಾ ಅವರ ಆಶಾಗೋಪುರ ಕುಸಿದಂತೆ ಅನುಭವವಾಯಿತಂತೆ. ಇದಕ್ಕೆ ಕಾರಣ ಅಲ್ಲಿಯ ಜನರ ಟೀಕೆ. ಪ್ರೋಮೊ ನೋಡಿದ ಕೆಲವರು ಈ ಕಂದು ಬಣ್ಣದ ಭಯೋತ್ಪಾದಕಿಯನ್ನು ಅಮೆರಿಕದಲ್ಲೇಕೆ ಪರಿಚಯಿಸುತ್ತಿದ್ದೀರಿ ಎಂದು ತೆಗಳಿದ್ದರಂತೆ. ಅಷ್ಟೇ ಅಲ್ಲದೆ ‘ನಿಮ್ಮ ದೇಶಕ್ಕೆ ತೊಲಗು ಇಲ್ಲದಿದ್ದರೆ ಸಾಮೂಹಿಕ ಅತ್ಯಾಚಾರಕ್ಕೆ ಗುರಿಯಾಗಬೇಕಾಗುತ್ತದೆ ಎನ್ನುವ ಬೆದರಿಕೆಯ ಇ-ಮೇಲ್ ಹಾಗೂ ಟ್ವೀಟ್’ ಗಳು ಹರಿದು ಬಂದಿದ್ದವಂತೆ. ವರ್ಷಗಳ ಹಿಂದೆ ನಡೆದ ಕಹಿ ಘಟನೆಯನ್ನು ಪುಸ್ತಕದಲ್ಲಿ ಅಕ್ಷರ ರೂಪದಲ್ಲಿ ವ್ಯಕ್ತಪಡಿಸಲು ಈಗಲೂ ಕಷ್ಟವಾಗುತ್ತಿದೆ ಎಂದಿದ್ದಾರೆ ಪ್ರಿಯಾಂಕಾ.