ಎರಡನೇ ಹಂತದ ಚಿತ್ರೀಕರಣಕ್ಕೆ ಅಣಿಯಾದ ಚಿ. ಸೌ ಕನ್ಯಾಕುಮಾರಿ

Team Udayavani, Feb 24, 2021, 4:05 PM IST

ಬಹುತೇಕ ಹೊಸ ಪ್ರತಿಭೆಗಳೇ ಸೇರಿ ನಿರ್ಮಿಸುತ್ತಿರುವ “ಚಿ. ಸೌ ಕನ್ಯಾಕುಮಾರಿ’ ಚಿತ್ರದ ಮೊದಲ ಹಂತದ ಚಿತ್ರೀಕರಣ ಪೂರ್ಣಗೊಂಡಿದ್ದು, ಇದೀಗ ಚಿತ್ರತಂಡ ಎರಡನೇ ಹಂತದ ಚಿತ್ರೀಕರಣಕ್ಕೆ ತಯಾರಿ ಮಾಡಿ ಕೊಳ್ಳುತ್ತಿದೆ.

ಮೊದಲ ಬಾರಿಗೆ ನಾಯಕನಾಗಿ ನವ ಪ್ರತಿಭೆ ರಾಘವೇಂದ್ರ ನಾಯಕ ನಟನಾಗಿ ಕಾಣಿಸಿಕೊಳ್ಳುತ್ತಿರುವ “ಚಿ. ಸೌ ಕನ್ಯಾಕುಮಾರಿ’ ಚಿತ್ರದಲ್ಲಿ ನಾಯಕಿಯಾಗಿ ಶೃತಿ ಪಾಟೀಲ್ ಅಭಿನಯಿಸುತ್ತಿದ್ದಾರೆ. ಉಳಿದಂತೆ ಗುರುರಾಜ್‌ ಹೊಸಕೋಟೆ, ರಾಕ್ಸ್‌ ಮನು, ಮಲ್ಲಣ್ಣ ಬಾಚಿಮಟ್ಟಿ, ಕೊಮಲ, ಸುಜಾತ ಹಿರೇಮಠ, ಚಂದ್ರಿಕಾ, ಗಂಗಾಧರ್‌ ಗೋಗಿಯವರು ಮೊದಲಾದವರು ಇತರ ಪ್ರಮುಖ ಪಾತ್ರದಲ್ಲಿ ಅಭಿನಯಿಸುತ್ತಿದ್ದಾರೆ.

ಇದನ್ನೂ ಓದಿ:ಹಾಡುಗಳಲ್ಲಿ ಸಾಲ್ಟ್ ಟೆಸ್ಟ್

“ಶ್ರೀಗುರು ರಾಘವೇಂದ್ರ ಸಿನಿ ಪ್ರೊಡಕ್ಷನ್ಸ್‌’ ಬ್ಯಾನರ್‌ ಅಡಿಯಲ್ಲಿ ಎಸ್‌. ಆರ್‌ ಪಾಟೀಲ್ ನಿರ್ಮಾಣ ಮಾಡುತ್ತಿರುವ “ಚಿ. ಸೌ. ಕನ್ಯಾಕುಮಾರಿ’ ಚಿತ್ರಕ್ಕೆ ಲೆಮನ್‌ ಪರಶುರಾಮ್ ಕಥೆ, ಚಿತ್ರಕಥೆ ಬರೆದು ನಿರ್ದೇಶನ ಮಾಡುತ್ತಿದ್ದಾರೆ.

ಈಗಾಗಲೇ ಯಾದಗಿರಿ, ಸುರಪುರ ,ಬೆಂಡೆ ಬೆಂಬಾಳೆ, ಕೆಂಬಾವಿ, ಮಾಚಗುಂಡಾಳ ಸುತ್ತಮುತ್ತ ಚಿತ್ರದ ಚಿತ್ರೀಕರಣ ನಡೆಸಿರುವ ಚಿತ್ರತಂಡ, ಎರಡನೇ ಹಂತದ ಚಿತ್ರೀಕರಣವನ್ನ ಬಾಂಬೆ, ಉಡುಪಿ, ಗೋಕರ್ಣ ಹಾಗೂ ಬೆಂಗಳೂರು ಸುತ್ತಮುತ್ತ ಚಿತ್ರೀಕರಣ ಮಾಡಲು ಯೋಜನೆ ಹಾಕಿಕೊಂಡಿದೆ.

ಸಂಪೂರ್ಣ ಉತ್ತರ ಕರ್ನಾಟಕದ ಸೊಗಡಿನ ಕಥಾಹಂದರ ಹೊಂದಿರುವ ಈ ಚಿತ್ರಕ್ಕೆ ಅಯ್ಯಣ್ಣ ಬೆಲ್ಲದ್‌, ಬಸವರಾಜ್‌ ಪೂಜಾರಿ ಸಹ ನಿರ್ಮಾಣವಿದೆ. ಚಿತ್ರಕ್ಕೆ ಶ್ರೀರಾಮ್‌ ಜಂಬಗಿ ಛಾಯಾಗ್ರಹಣ, ಎ.ಟಿ ರವೀಶ್‌ ಸಂಗೀತವಿದೆ. ಚಿತ್ರದ ಹಾಡುಗಳಿಗೆ ಲೆಮನ್‌ ಪರಶುರಾಮ್‌ ಸಾಹಿತ್ಯವಿದ್ದು, ಅನುರಾಧ ಭಟ್‌, ಅನನ್ಯಾ ಭಟ್‌, ಸಂತೋಷ್‌ ವೆಂಕಿ ಮೊದಲಾದರು ಧ್ವನಿಯಾಗಿದ್ದಾರೆ. ಸದ್ಯ ಭರದಿಂದ ಚಿತ್ರೀಕರಣದಲ್ಲಿರುವ “ಚಿ. ಸೌ. ಕನ್ಯಾಕುಮಾರಿ’ ಚಿತ್ರ ಇದೇ ವರ್ಷದ ಮಧ್ಯ ಭಾಗದಲ್ಲಿ ತೆರೆಗೆ ಬರುವ ಸಾಧ್ಯತೆ ಇದೆ.