ಬಾಂಡ್ v/s ಈಕ್ವಿಟಿ: ಮುಂಬಯಿ ಷೇರುಮಾರುಕಟ್ಟೆ ಸೆನ್ಸೆಕ್ಸ್ ಸೂಚ್ಯಂಕ 440 ಅಂಕ ಕುಸಿತ

Team Udayavani, Mar 5, 2021, 12:10 PM IST

ಮುಂಬೈ:ಅಮೆರಿಕದ ಬಾಂಡ್ ಮಾರುಕಟ್ಟೆಯ ವಹಿವಾಟಿನಲ್ಲಾದ ಕುಸಿತ ಹಾಗೂ ಜಾಗತಿಕವಾಗಿ ಹೂಡಿಕೆದಾರರು ಹಿಂದೆ ಸರಿದ ಪರಿಣಾಮ ಮುಂಬಯಿ ಷೇರು ಮಾರುಕಟ್ಟೆಯ ಸಂವೇದಿ ಸೂಚ್ಯಂಕ ಶುಕ್ರವಾರ(ಮಾರ್ಚ್ 05) 440 ಅಂಕಗಳಷ್ಟು ಕುಸಿತ ಕಂಡಿದ್ದು, ಎನ್ ಎಸ್ ಇ ನಿಫ್ಟಿ 15000ಗಡಿಗಿಂತ ಕೆಳಗೆ ಕುಸಿದಿದೆ.

ಇಂದು ಮುಂಬಯಿ ಷೇರು ಮಾರುಕಟ್ಟೆಯ ಆರಂಭಿಕ ವಹಿವಾಟಿನಲ್ಲಿ ಸಂವೇದಿ ಸೂಚ್ಯಂಕ 440.09 ಅಂಕ ಕುಸಿತವಾಗಿದ್ದು, 50, 405.99 ಅಂಕಗಳ ವಹಿವಾಟು ನಡೆಸಿದೆ.

ಅದೇ ರೀತಿ ಎನ್ ಎಸ್ ಇ ನಿಫ್ಟಿ 124.75 ಅಂಕಗಳ ಕುಸಿತದೊಂದಿಗೆ 14,956 ಅಂಕಗಳ ವಹಿವಾಟು ನಡೆಸಿದೆ. ಸೆನ್ಸೆಕ್ಸ್ ಚಾರ್ಟ್ ಪ್ರಕಾರ, ಇಂಡಸ್ ಇಂಡ್ ಬ್ಯಾಂಕ್, ಐಸಿಐಸಿಐ ಬ್ಯಾಂಕ್, ಎಸ್ ಬಿಐ, ಪವರ್ ಗ್ರಿಡ್ ಮತ್ತು ಎಚ್ ಡಿಎಫ್ ಸಿ ಬ್ಯಾಂಕ್ ಷೇರುಗಳು ನಷ್ಟ ಕಂಡಿವೆ.

ಅಮೆರಿಕದ ವಾಲ್ ಸ್ಟ್ರೀಟ್ ಷೇರುಮಾರುಕಟ್ಟೆಯಲ್ಲಿ ಬಾಂಡ್ ವಹಿವಾಟಿನಲ್ಲಾದ ಭಾರೀ ಕುಸಿತದಿಂದಾಗಿ ಶುಕ್ರವಾರ ಏಷ್ಯನ್ ಮಾರುಕಟ್ಟೆಯಲ್ಲಿ ಈಕ್ವಿಟಿ ಮಾರುಕಟ್ಟೆಯ ವಹಿವಾಟಿನಲ್ಲಿ ಸತತ ಕುಸಿತ ಕಂಡಿದೆ.