ವಿಜಯ್‌ ಹಜಾರೆ ಏಕದಿನ: ಸೆಮಿಫೈನಲ್‌ಗೆ ಲಗ್ಗೆಯಿರಿಸಿದ ಕರ್ನಾಟಕ

Team Udayavani, Mar 9, 2021, 12:30 AM IST

ಹೊಸದಿಲ್ಲಿ: ಅಮೋಘ ಫಾರ್ಮ್ ನಲ್ಲಿರುವ ಯುವ ಎಡಗೈ ಆರಂಭಕಾರ ದೇವದತ್ತ ಪಡಿಕ್ಕಲ್‌ “ವಿಜಯ್‌ ಹಜಾರೆ ಟ್ರೋಫಿ’ಯಲ್ಲಿ ಶತಕಗಳ ತೋರಣ ಕಟ್ಟುವುದನ್ನು ಮುಂದುವರಿಸಿದ್ದಾರೆ. ಅವರ ಸತತ ಸೆಂಚುರಿಯಾಟ ಈಗ ನಾಲ್ಕಕ್ಕೆ ಏರಿದೆ. ಈ ಮೂಲಕ ರಾಷ್ಟ್ರೀಯ ಆಯ್ಕೆಗಾರರಿಗೆ ಬಲವಾದ ಸಂದೇಶವೊಂದನ್ನು ರವಾನಿಸಿದ್ದಾರೆ.

ಅಂದಹಾಗೆ ಪಡಿಕ್ಕಲ್‌ ಅವರ ಈ ಸೆಂಚುರಿ ದಾಖಲಾದದ್ದು ಕೇರಳ ವಿರುದ್ಧ ಸೋಮವಾರ ನಡೆದ ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ. ಪಡಿಕ್ಕಲ್‌ ಗಳಿಕೆ 101 ರನ್‌ (119 ಎಸೆತ, 10 ಫೋರ್‌, 2 ಸಿಕ್ಸರ್‌). ಇವರ ಜತೆಗಾರ, ನಾಯಕ ಆರ್‌. ಸಮರ್ಥ್ ಕೂಡ ಸಮರ್ಥ ಬ್ಯಾಟಿಂಗ್‌ ಮುಂದುವರಿಸಿ ಭರ್ಜರಿ 192 ರನ್‌ ರಾಶಿ ಹಾಕಿದರು (158 ಎಸೆತ, 22 ಬೌಂಡರಿ, 3 ಸಿಕ್ಸರ್‌). ಇದು ಪ್ರಸಕ್ತ ಸರಣಿಯಲ್ಲಿ ಸಮರ್ಥ್ ಅವರ ಸತತ 2ನೇ, ಒಟ್ಟಾರೆ 3ನೇ ಸೆಂಚುರಿ. ಇವರಿಬ್ಬರ 249 ರನ್‌ ಜತೆಯಾಟದ ನೆರವಿನಿಂದ ಕೇರಳವನ್ನು 80 ರನ್ನುಗಳಿಂದ ಪರಾಭವಗೊಳಿಸಿದ ಕರ್ನಾಟಕ ಸೆಮಿಫೈನಲ್‌ಗೆ ಮುನ್ನುಗ್ಗಿದೆ.

ಮೊದಲು ಬ್ಯಾಟಿಂಗ್‌ ನಡೆಸಿದ ಕರ್ನಾಟಕ 3 ವಿಕೆಟಿಗೆ 338 ರನ್‌ ಪೇರಿಸಿತು. ಕೇರಳ 43.4 ಓವರ್‌ಗಳಲ್ಲಿ 258ಕ್ಕೆ ಆಲೌಟ್‌ ಆಯಿತು. ಲೀಗ್‌ ಹಂತದಲ್ಲಿಯೂ ಕರ್ನಾಟಕ ಕೇರಳವನ್ನು ಮಣಿಸಿತ್ತು (9 ವಿಕೆಟ್‌). ಅಲ್ಲಿಯೂ ಪಡಿಕ್ಕಲ್‌ ಶತಕ ಬಾರಿಸಿದ್ದರು (ಅಜೇಯ 126).

ಚೇಸಿಂಗ್‌ ವೇಳೆ ವತ್ಸಲ ಗೋವಿಂದ್‌ (92)- ಮೊಹಮ್ಮದ್‌ ಅಜರುದ್ದೀನ್‌ (52) ಉತ್ತಮ ಹೋರಾಟವೊಂದನ್ನು ಪ್ರದರ್ಶಿಸಿದರು. ರೋನಿತ್‌ ಮೋರೆ 5 ವಿಕೆಟ್‌ ಕಿತ್ತು ಬೌಲಿಂಗ್‌ ಹೀರೋ ಎನಿಸಿದರು.

ಇಬ್ಬರಿಂದಲೂ 600 ರನ್‌
ಪಡಿಕ್ಕಲ್‌ ಕಳೆದ 3 ಪಂದ್ಯಗಳಲ್ಲಿ ಕ್ರಮವಾಗಿ 152 (ಒಡಿಶಾ), ಅಜೇಯ 126 (ಕೇರಳ) ಮತ್ತು ಅಜೇಯ 145 ರನ್‌ (ರೈಲ್ವೇಸ್‌) ಬಾರಿಸಿದ್ದರು. ಬಿಹಾರ್‌ ವಿರುದ್ಧ ಕೇವಲ 3 ರನ್ನಿನಿಂದ ಶತಕ ಮಿಸ್‌ ಆಗಿತ್ತು. ಇಲ್ಲವಾದರೆ ಪಡಿಕ್ಕಲ್‌ ಈ ಹೊತ್ತಿಗೆ ಸತತ 5 ಸೆಂಚುರಿಗಳ ಸರದಾರನಾಗಿರುತ್ತಿದ್ದರು. ಈ ಸರಣಿಯಲ್ಲಿ ಪಡಿಕ್ಕಲ್‌ ಅವರ ಒಟ್ಟು ರನ್‌ ಗಳಿಕೆ 673ಕ್ಕೆ ಏರಿದೆ.

ರೈಲ್ವೇಸ್‌ ಎದುರಿನ ಕಳೆದ ಪಂದ್ಯದಲ್ಲಿ ಸಮರ್ಥ್ ಬ್ಯಾಟ್‌ನಿಂದ ಅಜೇಯ 130 ರನ್‌ ಹರಿದು ಬಂದಿತ್ತು. ಬಿಹಾರ ವಿರುದ್ಧ 158 ರನ್‌ ಬಾರಿಸಿದ್ದರು. 6 ಪಂದ್ಯಗಳಿಂದ 605 ರನ್‌ ಗಳಿಸಿದ ಸಾಧನೆ ಸಮರ್ಥ್ ಅವರದು.
ಕರ್ನಾಟಕದ ಸೆಮಿಫೈನಲ್‌ ಎದುರಾಳಿ ಯಾರೆಂಬುದು ಮಂಗಳವಾರ ತಿಳಿಯಲಿದೆ.

ಸಂಕ್ಷಿಪ್ತ ಸ್ಕೋರ್‌: ಕರ್ನಾಟಕ-3 ವಿಕೆಟಿಗೆ 338 (ಸಮರ್ಥ್ 192, ಪಡಿಕ್ಕಲ್‌ 101, ಬಾಸಿಲ್‌ 57ಕ್ಕೆ 3). ಕೇರಳ-43.4 ಓವರ್‌ಗಳಲ್ಲಿ 258 (ಗೋವಿಂದ್‌ 92, ಅಜರುದ್ದೀನ್‌ 52, ಮೋರೆ 36ಕ್ಕೆ 5, ಗೋಪಾಲ್‌ 64ಕ್ಕೆ 2, ಗೌತಮ್‌ 73ಕ್ಕೆ 2).