ಮೊರಟೋರಿಯಂ ಚಕ್ರಬಡ್ಡಿ ಮನ್ನಾ : ಬ್ಯಾಂಕ್‌ಗಳಿಗೆ ಸುಪ್ರೀಂ ಕೋರ್ಟ್‌ ತಾಕೀತು

Team Udayavani, Mar 24, 2021, 9:00 AM IST

ಹೊಸದಿಲ್ಲಿ: ಲಾಕ್‌ಡೌನ್‌ ಅವಧಿಯಲ್ಲಿ 6 ತಿಂಗಳ ಸಾಲದ ಕಂತು ಪಾವತಿ “ಅವಧಿ ವಿಸ್ತರಣೆ’ ಯೋಜನೆಯನ್ನು ಬಳಸಿ ಕೊಂಡ ಗ್ರಾಹಕರಿಗೆ ಸುಪ್ರೀಂ ಕೋರ್ಟ್‌ ಸಮಾಧಾನ ಒದಗಿಸಿದೆ. ಈ ಅವಧಿಯಲ್ಲಿ ಇಎಂಐ ಮೊತ್ತಕ್ಕೆ ವಿಧಿಸಲಾದ ಬಡ್ಡಿಯ ಮೇಲಿನ ಬಡ್ಡಿ (ಚಕ್ರಬಡ್ಡಿ)ಯನ್ನು ಪೂರ್ಣವಾಗಿ ಮನ್ನಾ ಮಾಡುವಂತೆ ಬ್ಯಾಂಕ್‌ಗಳಿಗೆ ಅದು ತಾಕೀತು ಮಾಡಿದೆ.

ಎಷ್ಟೇ ಮೊತ್ತದ ಸಾಲ ಪಡೆದಿದ್ದರೂ ಎಲ್ಲ ಸಾಲಗಾರರು ಇದಕ್ಕೆ ಅರ್ಹರಾಗುತ್ತಾರೆ ಎಂದೂ ಕೋರ್ಟ್‌ ಹೇಳಿದೆ.
ಕಳೆದ ವರ್ಷ ಲಾಕ್‌ಡೌನ್‌ ಅವಧಿಯಲ್ಲಿ ಮಾ. 1ರಿಂದ ಆ. 31ರ ವರೆಗೆ ಆರ್‌ಬಿಐ ಸಾಲದ ಕಂತು ಪಾವತಿ ಅವಧಿ ವಿಸ್ತರಣೆ (ಮೊರಟೋರಿಯಂ) ಪ್ರಕಟಿಸಿತ್ತು. ಆದರೆ ಕೆಲವು ಬ್ಯಾಂಕುಗಳು ಈ ಅವಧಿಯ ಕಂತಿನ ಮೇಲೆ ಚಕ್ರಬಡ್ಡಿ ವಿಧಿಸಿರುವುದು ಗಮನಕ್ಕೆ ಬಂದ ಹಿನ್ನೆಲೆಯಲ್ಲಿ ಕೋರ್ಟ್‌ ಮಂಗಳವಾರ ಈ ಆದೇಶ ಹೊರಡಿಸಿದೆ.

ಅವಧಿ ವಿಸ್ತರಣೆ ಸಾಧ್ಯವಿಲ್ಲ
ಇದೇ ವೇಳೆ, ಮೊರಟೋರಿಯಂ ಅವಧಿಯನ್ನು ಆ. 31ಕ್ಕಿಂತ ವಿಸ್ತರಣೆ ಮಾಡಲಾಗದು ಎಂಬ ಕೇಂದ್ರ ಮತ್ತು ಆರ್‌ಬಿಐ ನಿರ್ಧಾರದಲ್ಲಿ ಮಧ್ಯಪ್ರವೇಶ ಮಾಡುವು ದಿಲ್ಲ ಎಂದೂ ಕೋರ್ಟ್‌ ಹೇಳಿದೆ. ಇದು ದೇಶದ ಆರ್ಥಿಕತೆಗೆ ಸಂಬಂಧಿಸಿದ ವಿಚಾರ ಎಂದು ಕೋರ್ಟ್‌ ತಿಳಿಸಿದೆ. ಮೊರಟೋರಿಯಂ ಅವಧಿಯ ಬಡ್ಡಿಯನ್ನು ಸಂಪೂರ್ಣವಾಗಿ ಮನ್ನಾ ಮಾಡಬೇಕು ಎಂಬ ಅರ್ಜಿ
ದಾರರ ಕೋರಿಕೆಯನ್ನೂ ನ್ಯಾಯಪೀಠ ತಿರಸ್ಕರಿಸಿದೆ.