ಆರ್ಥಿಕತೆಗೆ ಕೊಳ್ಳಿ ಇಡಲಿದೆ 2ನೇ ಲಾಕ್‌ ಡೌನ್‌!

Team Udayavani, Apr 2, 2021, 7:20 AM IST

ಅಮರಾವತಿಯ ಲಾಕ್‌ಡೌನ್‌ ನೋಟ

ಹೊಸದಿಲ್ಲಿ: ದೇಶವು ಕೋವಿಡ್ ಸೋಂಕಿನ ಎರಡನೇ ಅಲೆಯಲ್ಲಿ ಸಿಲುಕಿಕೊಂಡಿರುವ ಈ ಹೊತ್ತಲ್ಲಿ, ಹಲವು ರಾಜ್ಯಗಳು ಮತ್ತೂಮ್ಮೆ ಲಾಕ್‌ ಡೌನ್‌ ಹೇರುವುದೋ, ಬೇಡವೋ ಎಂಬ ಗೊಂದಲದಲ್ಲಿವೆ. ಆದರೆ ಈಗೇ ನಾದರೂ ಹೊಸದಾಗಿ ನಿರ್ಬಂಧ ಹೇರಿದರೆ, ಕಳೆದ ವರ್ಷದ ಲಾಕ್‌ಡೌನ್‌ ನಿಂದ ಈಗಷ್ಟೇ ಚೇತರಿಸಿಕೊಳ್ಳು ತ್ತಿರುವ ಆರ್ಥಿಕತೆಗೆ ದೊಡ್ಡ ಪೆಟ್ಟು ನೀಡಿದಂತಾಗುತ್ತದೆ ಎನ್ನುವುದು ತಜ್ಞರ ಅಭಿಪ್ರಾಯ.

ಲಾಕ್‌ ಡೌನ್‌ ತೆರವಿನ ಬಳಿಕ ಒಂದೊಂದಾಗಿ ಆರ್ಥಿಕ ಚಟುವಟಿಕೆಗಳು ಸಹಜ ಸ್ಥಿತಿಗೆ ಬರುತ್ತಿವೆ. ಸೇವಾ ವಲ ಯವೂ ಸಹಿತ ಬಹುತೇಕ ವಲಯಗಳಲ್ಲಿ ಸಕಾರಾತ್ಮಕ ಪ್ರಗತಿ ಆಗುತ್ತಿವೆ. ಹೀಗಿರುವಾಗ ಮತ್ತೆ ಲಾಕ್‌ ಡೌನ್‌ನ ಮೊರೆ ಹೋದರೆ ಈ ಎಲ್ಲ ಪ್ರಗತಿಯೂ ಪತನಗೊಳ್ಳುವುದು ಖಚಿತ ಎಂದು ನೊಮುರಾ ಇಂಡಿಯಾದ ವರದಿ ಹೇಳಿದೆ. ಅಲ್ಲದೆ, ನಿರ್ಬಂಧಗಳು 2 ತಿಂಗಳು ಮುಂದುವರಿದರೂ ದೇಶದ ಜಿಡಿಪಿ ಪ್ರಗತಿ ದರದಲ್ಲಿ ಶೇ.0.17ರಷ್ಟು ಕೊಚ್ಚಿ ಹೋಗಲಿದೆ ಎಂದು ಬಾಕ್ಲೇಸ್‌ ಇಂಡಿಯಾ ವರದಿಯೂ ಕಳವಳ ವ್ಯಕ್ತಪಡಿಸಿದೆ.

ಒಂದೇ ದಿನ 72 ಸಾವಿರ ಕೇಸ್‌: ಬುಧವಾರದಿಂದ ಗುರು ವಾರಕ್ಕೆ 24 ಗಂಟೆಗಳಲ್ಲಿ ದೇಶಾದ್ಯಂತ 72,330 ಮಂದಿಗೆ ಸೋಂಕು ದೃಢಪಟ್ಟಿದ್ದು, 459 ಮಂದಿ ಸಾವಿಗೀಡಾಗಿದ್ದಾರೆ. ಪ್ರಸ್ತುತ ದೇಶದಲ್ಲಿ 5,84,055 ಸಕ್ರಿಯ ಪ್ರಕರಣ ಗಳಿವೆ ಎಂದು ಕೇಂದ್ರ ಆರೋಗ್ಯ ಇಲಾಖೆ ತಿಳಿಸಿದೆ.

ಫ್ರಾನ್ಸ್‌ನಲ್ಲಿ 3ನೇ ಲಾಕ್‌ ಡೌನ್‌: ಫ್ರಾನ್ಸ್‌ನಲ್ಲಿ ಕೋವಿಡ್ 3ನೇ ಅಲೆ ವ್ಯಾಪಿಸಿರುವ ಹಿನ್ನೆಲೆಯಲ್ಲಿ ಅಧ್ಯಕ್ಷ ಮ್ಯಾಕ್ರನ್‌ ಅವರು 3ನೇ ಬಾರಿಗೆ ದೇಶವ್ಯಾಪಿ ಲಾಕ್‌ ಡೌನ್‌ ಘೋಷಿಸಿದ್ದಾರೆ. 3 ವಾರಗಳ ಕಾಲ ಶಾಲೆಗಳನ್ನು ತೆರೆಯದಂತೆ ಸೂಚಿಸಿದ್ದಾರೆ.

ಮುಂಬಯಿ ಲಾಕ್‌:  ಇಂದು ನಿರ್ಧಾರ :

ವಾಣಿಜ್ಯ ನಗರಿಯಲ್ಲಿ ಸೋಂಕು ಹೆಚ್ಚುತ್ತಿರುವ ಕಾರಣ ನಿರ್ಬಂಧಿತ ಲಾಕ್‌ ಡೌನ್‌ ಹೇರುವ ಸುಳಿವನ್ನು ಮುಂಬಯಿ ಮೇಯರ್‌ ಕಿಶೋರಿ ಪಡ್ನೇಕರ್‌ ನೀಡಿದ್ದಾರೆ. ಈ ಕುರಿತ ಅಧಿಕೃತ ಘೋಷಣೆ ಶುಕ್ರವಾರ ಹೊರಬೀಳುವ ಸಾಧ್ಯತೆಯಿದೆ. ಅಂಗಡಿಗಳು ದಿನ ಬಿಟ್ಟು ದಿನ ತೆರೆಯಲು ಅನುಮತಿ ನೀಡಲಾಗುತ್ತದೆ, ಸ್ಥಳೀಯ ರೈಲುಗಳನ್ನು ಅಗತ್ಯ ಸೇವೆಗಳಿಗೆ ಮಾತ್ರ ಬಳಸಲಾಗುತ್ತದೆ, ಧಾರ್ಮಿಕ ಕೇಂದ್ರಗಳು, ಮಾಲ್‌, ಥಿಯೇಟರ್‌ಗಳನ್ನು ಸಂಪೂರ್ಣವಾಗಿ ಮುಚ್ಚಲಾಗುತ್ತದೆ ಎಂದು ಹೇಳಲಾಗಿದೆ.