ಪ್ರೇಕ್ಷಕರ ‘ಸನಿಹಕೆ’ ಬರಲು ಧನ್ಯಾ ರಾಮ್‌ಕುಮಾರ್‌ ಕಾತುರ

Team Udayavani, Apr 5, 2021, 8:44 AM IST

ಬೆಂಗಳೂರು: ವರನಟ ಡಾ. ರಾಜಕುಮಾರ್‌ ಮೊಮ್ಮಗಳು, ನಟ ರಾಮ್ ಕುಮಾರ್‌ ಪುತ್ರಿ ಧನ್ಯಾ ರಾಮ್ ಕುಮಾರ್‌ ಚಿತ್ರರಂಗಕ್ಕೆ ನಾಯಕ ನಟಿಯಾಗಿ ಪರಿಚಯವಾಗುತ್ತಿದ್ದಾರೆ ಎಂಬ ಸುದ್ದಿಯನ್ನು ನೀವು ಈಗಾಗಲೇ ಕೇಳಿರುತ್ತೀರಿ. ಈಗ ಧನ್ಯಾ ಮೊದಲ ಬಾರಿಗೆ ನಾಯಕ ನಟಿಯಾಗಿ ಅಭಿನಯಿಸಿರುವ ಚೊಚ್ಚಲ ಚಿತ್ರ “ನಿನ್ನ ಸನಿಹಕೆ…’ ಬಿಡುಗಡೆಗೆ ಸಿದ್ಧವಾಗಿದೆ.

ಈಗಾಗಲೇ ಸೆನ್ಸಾರ್‌ನಿಂದ “ಯು/ಎ’ ಸರ್ಟಿಫಿಕೇಟ್‌ ಪಡೆದುಕೊಂಡಿರುವ “ನಿನ್ನ ಸನಿಹಕೆ…’ ಚಿತ್ರತಂಡ ಇದೇ ತಿಂಗಳ ಅಂತ್ಯದಲ್ಲಿ ತೆರೆಗೆ ಬರುವ ಯೋಚನೆಯಲ್ಲಿತ್ತು. ಇದೇ ವಾರ ಚಿತ್ರದ ಟ್ರೇಲರ್‌ ಕೂಡ ಬಿಡುಗಡೆ ಮಾಡಲು ಸಿದ್ಧತೆ ಮಾಡಿಕೊಂಡಿತ್ತು. ಆದರೆ, ಸದ್ಯದ ಪರಿಸ್ಥಿತಿಯಲ್ಲಿ ಥಿಯೇಟರ್‌ ಮತ್ತು ಮಲ್ಟಿಪ್ಲೆಕ್ಸ್‌ಗಳಲ್ಲಿ ಶೇಕಡ 50ರಷ್ಟು ಪ್ರೇಕ್ಷಕರ ಪ್ರವೇಶಕ್ಕೆ ಮಾತ್ರ ಏ. 7ರಿಂದ ನಿರ್ಬಂಧ ವಿಧಿಸಿರುವುದರಿಂದ, “ನಿನ್ನ ಸನಿಹಕೆ…’ ಚಿತ್ರತಂಡ ಕೂಡ ಚಿತ್ರದ ಬಿಡುಗಡೆಯನ್ನು ಕೆಲಕಾಲ ಮುಂದೂಡುವ ನಿರ್ಧಾರಕ್ಕೆ ಬಂದಿದೆ.

ಇನ್ನು “ನಿನ್ನ ಸನಿಹಕೆ…’ ಚಿತ್ರದಲ್ಲಿ ಸೂರಜ್‌ ಗೌಡ ನಾಯಕನಾಗಿ ಅಭಿನಯಿಸಿದ್ದು, ತೆರೆಹಿಂದೆ ನಿರ್ದೇಶನದ ಜವಾಬ್ದಾರಿಯನ್ನೂ ಸೂರಜ್‌ ಅವರೇ ವಹಿಸಿಕೊಂಡಿದ್ದಾರೆ. ಇಂದಿನ ಜನರೇಶನ್‌ನ ಯೂಥ್‌ ಫ‌ುಲ್‌ ಲವ್‌ಸ್ಟೋರಿಯ ಚಿತ್ರ ಇದಾಗಿದ್ದು, ಚಿತ್ರದ ಹಾಡುಗಳಿಗೆ ರಘು ದೀಕ್ಷಿತ್‌ ಸಂಗೀತ ಸಂಯೋಜಿಸಿದ್ದಾರೆ. ಈಗಾಗಲೇ ಬಿಡುಗಡೆಯಾಗಿರುವ ಹಾಡುಗಳು ಕೇಳುಗರ ಗಮನ ಸೆಳೆಯಲು ಯಶಸ್ವಿಯಾಗಿದ್ದು, ಚಿತ್ರ ಟೈಟಲ್‌, ಪೋಸ್ಟರ್‌, ಮೇಕಿಂಗ್‌ ಮೂಲಕ ಸಿನಿಪ್ರಿಯರಲ್ಲಿ ನಿರೀಕ್ಷೆ ಮೂಡಿಸಿದೆ.

ಕೋವಿಡ್‍ನಿಂದ ಸಂಕಷ್ಟ : ಜಿಮ್ ಮಾಲೀಕರ ಬೆಂಬಲಕ್ಕೆ ನಿಂತ ರಾಕಿ ಭಾಯ್

“ನಿನ್ನ ಸನಿಹಕೆ…’ ಚಿತ್ರದ ಮೂಲಕ ಧನ್ಯಾ ರಾಮಕುಮಾರ್‌ ಅವರ ಸಿನಿಪಯಣಕ್ಕೆ ಚಿತ್ರರಂಗದ ಕಡೆಯಿಂದಲೂ ಮೆಚ್ಚುಗೆ, ಪ್ರೋತ್ಸಾಹ ಮತ್ತು ಶುಭ ಹಾರೈಕೆ ವ್ಯಕ್ತವಾಗುತ್ತಿದೆ. ಹ್ಯಾಟ್ರಿಕ್‌ ಹೀರೋ ಶಿವರಾಜಕುಮಾರ್‌, ರಾಘವೇಂದ್ರ ರಾಜಕುಮಾರ್‌, ಪವರ್‌ ಸ್ಟಾರ್‌ ಪುನೀತ್‌ ರಾಜಕುಮಾರ್‌, ತಮ್ಮ ಸಹೋದರಿಯ ಮಗಳ ಚೊಚ್ಚಲ ಅಭಿನಯದ ಚಿತ್ರಕ್ಕೆ ಶುಭ ಹಾರೈಸಿ, ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ. ಧನ್ಯಾ ತಂದೆ ರಾಮಕುಮಾರ್‌ ಕೂಡ, ಮಗಳ ಚೊಚ್ಚಲ ಚಿತ್ರದ ಬಗ್ಗೆ ಭಾವುಕತೆಯಿಂದ, ಹೆಮ್ಮೆಯ ಮಾತುಗಳನ್ನಾಡಿದ್ದಾರೆ.

“”ನಿನ್ನ ಸನಿಹಕೆ…’ ಚಿತ್ರದ ಹಾಡುಗಳನ್ನ ನೋಡಿ ಖುಷಿಯಾಯ್ತು. ಈ ಸಿನಿಮಾ ತುಂಬಾ ದೊಡ್ಡ ಯಶಸ್ಸು ಕಾಣುವ ಲಕ್ಷಣಗಳು ಕಾಣಿಸ್ತಿದೆ’ ಎಂದಿದ್ದಾರೆ ರಾಮಕುಮಾರ್‌. ಒಟ್ಟಾರೆ ದೊಡ್ಮನೆ ಕುಟುಂಬದ ಮೂರನೇ ತಲೆಮಾರಿನ ಹುಡುಗಿ ಧನ್ಯಾ ರಾಮಕುಮಾರ್‌ ಅವರ ಸಿನಿ ಎಂಟ್ರಿ ಬಗ್ಗೆ ಚಿತ್ರರಂಗದಲ್ಲಿ ಮತ್ತು ಅಭಿಮಾನಿಗಳಲ್ಲಿ ಒಂದಷ್ಟು ಕುತೂಹಲ, ನಿರೀಕ್ಷೆ ಮೂಡಿರುವುದಂತೂ ಸುಳ್ಳಲ್ಲ