ಉತ್ತರಾಖಂಡದಲ್ಲಿ ಭಾರೀ ಹಿಮ ಸ್ಪೋಟ : ಹೆಚ್ಚದ ಆತಂಕ

Team Udayavani, Apr 24, 2021, 10:08 AM IST

ಚಮೋಲಿ (ಉತ್ತರಾಖಂಡ್) : ಉತ್ತರಾಖಂಡ್​ ನಲ್ಲಿ ಮತ್ತೆ ಹಿಮ ಸ್ಪೋಟವಾಗಿದೆ. ಇಲ್ಲಿನ  ಚಮೋಲಿ ಜಿಲ್ಲೆಯಲ್ಲಿ ಈ ಹಿಂದೆ ಹಿಮ ಸ್ಫೋಟವಾಗಿ ಭಾರೀ ಅನಾಹುತ ಉಂಟಾಗಿತ್ತು. ಈ ಘಟನೆಯನ್ನು ಮರೆಯುವ ಮುನ್ನವೇ ಮತ್ತೆ ಇದೇ ಪ್ರದೇಶದ ನೀತಿ ಕಣಿವೆಯಲ್ಲಿ ಹಿಮಬಂಡೆ ಸ್ಫೋಟವಾಗಿದೆ ಎಂದು ಉತ್ತರಾಖಂಡ ಸಿಎಂ ತೀರತ್​ ಸಿಂಗ್ ರಾವತ್​ ಮಾಹಿತಿ ನೀಡಿದ್ದಾರೆ.

ಚಮೋಲಿ ಜಿಲ್ಲೆಯ ಭಾರತ-ಚೀನಾ ಗಡಿ ಭಾಗದ ನೀತಿ ಕಣಿವೆಯ ಸುಮ್ನಾದಲ್ಲಿ ಸದ್ಯ ಹಿಮಸ್ಪೋಟವಾಗಿದ್ದು ಅಲರ್ಟ್​ ಹೊರಡಿಸಿರುವಿದಾಗಿ ಅಲ್ಲದೆ ಜಿಲ್ಲಾಡಳಿತ ಮತ್ತು ಬಿಆರ್​ಓ (Border Roads Organisation) ಜೊತೆ ನಿರಂತರ ಸಂಪರ್ಕದಲ್ಲಿರುವುದಾಗಿ ರಾವತ್​ ಟ್ವೀಟ್ ಮೂಲಕ ತಿಳಿಸಿದ್ದಾರೆ.

ಮುನ್ನೆಚ್ಚರಿಕೆ ಕ್ರಮವಾಗಿ ಎನ್ ​ಟಿಪಿಸಿ ಹಾಗೂ ಇತರೆ ಯೋಜನೆಗಳ ಕಾಮಗಾರಿಯನ್ನ ರಾತ್ರಿ ನಿಲ್ಲಿಸುವಂತೆ ಹೇಳಲಾಗಿದೆ. ಕೇಂದ್ರ ಗೃಹಸಚಿವ ಅಮಿತ್ ಶಾ, ಹಿಮಬಂಡೆ ಸ್ಫೋಟದ ಬಗ್ಗೆ ಕೂಡಲೇ ಮಾಹಿತಿ ಪಡೆದು ರಾಜ್ಯಕ್ಕೆ ಸಂಪೂರ್ಣ ನೆರವು ನೀಡುವುದಾಗಿ ಭರವಸೆ ಕೊಟ್ಟಿದ್ದಾರೆ.

ಈ ಹಿಂದೆ ಅಂದ್ರೆ ಕಳೆದ ಫೆಬ್ರವರಿಯಲ್ಲಿ ಚಮೋಲಿ ಜಿಲ್ಲೆಯ ಜೋಷಿಮಠದ ಬಳಿ ಹಿಮನದಿ ಸ್ಫೋಟವಾಗಿದ್ದು, ಭಾರೀ ಪ್ರವಾಹ ಉಂಟಾಗಿತ್ತು. ಸುಮಾರು 50 ಜನ ಸಾವನ್ನಪ್ಪಿದ್ದರು.