ಬಾಲಿವುಡ್ ಖ್ಯಾತ ಸಿನಿಮಾ ನಟ, ಮೇಜರ್ ಬಿಕ್ರಮ್ ಜೀತ್ ಕೋವಿಡ್ ನಿಂದ ನಿಧನ

Team Udayavani, May 1, 2021, 12:49 PM IST

ನವದೆಹಲಿ: ಟಿವಿ ಸೀರಿಯಲ್ ಹಾಗೂ ಸಿನಿಮಾ ನಟ ಬಿಕ್ರಮ್ ಜೀತ್ ಕನ್ವರ್ ಪಾಲ್(52ವರ್ಷ) ಕೋವಿಡ್ 19 ಸೋಂಕಿನಿಂದ ಶುಕ್ರವಾರ(ಏ.30) ನಿಧನರಾಗಿರುವುದಾಗಿ ಮೂಲಗಳು ತಿಳಿಸಿವೆ. ಜನಪ್ರಿಯ ನಟ ಪಾಲ್ ದಿಢೀರ್ ನಿಧನಕ್ಕೆ ಸೆಲೆಬ್ರಿಟಿಗಳು, ಅಭಿಮಾನಿಗಳು ಆಘಾತವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ:ಕೋವಿಡ್‍ಗೆ ಸ್ಯಾಂಡಲ್‍ವುಡ್‍ ನಿರ್ಮಾಪಕ ರಾಜಶೇಖರ್ ಬಲಿ

ಹಲವಾರು ಟಿವಿ ಸೀರಿಯಲ್ ಗಳಲ್ಲಿ ನಟಿಸಿದ್ದ ಬಿಕ್ರಮ್ ಜೀತ್ ಕನ್ವರ್ ಪಾಲ್ ಸಿನಿಮಾರಂಗದಲ್ಲಿಯೂ ದೀರ್ಘಕಾಲ ನಟಿಸಿದ್ದರು. ಆದರೆ ಬಿಕ್ರಮ್ ಜೀತ್ ಬಗ್ಗೆ ಹಲವರಿಗೆ ತಿಳಿಯದಿದ್ದ ವಿಚಾರವೇನೆಂದರೆ ಅವರು ನಿವೃತ್ತ ಸೇನಾ ಅಧಿಕಾರಿಯಾಗಿದ್ದರು.

ಸಿನಿಮಾ ನಿರ್ಮಾಪಕ ಅಶೋಕ್ ಪಂಡಿತ್ ಅವರು ಈ ವಿಷಯ ಟ್ವೀಟ್ ಮಾಡಿದ್ದು, ನಟ, ಮೇಜರ್ ಬಿಕ್ರಮ್ ಜೀತ್ ಕನ್ವರ್ ಪಾಲ್ ನಿಧನ ಸುದ್ದಿ ಕೇಳಿ ಆಘಾತವಾಗಿದೆ. ನಿವೃತ್ತ ಸೇನಾ ಅಧಿಕಾರಿಯಾಗಿದ್ದ ಕನ್ವರ್ ಪಾಲ್ ಹಲವಾರು ಸಿನಿಮಾಗಳಲ್ಲಿ ನಟ. ಪೋಷಕ ನಟನಾಗಿ, ಟೀವಿ ಸೀರಿಯಲ್ ಗಳಲ್ಲಿ ನಟಿಸಿದ್ದರು. ಇವರ ಕುಟುಂಬಕ್ಕೆ ಸಾಂತ್ವಾನ ಹೇಳುವುದಾಗಿ ಉಲ್ಲೇಖಿಸಿದ್ದಾರೆ.

2005ರ ಮಧುರ್ ಭಂಡಾರ್ಕರ್ ಅವರ ಪೇಜ್ 3, ಪಾಪ್ ಕರಂ, ಕಾರ್ಪೋರೇಟ್, ಥ್ಯಾಂಕ್ಸ್ ಮಾ, ಅತಿಥಿ ತುಮ್ ಕಬ್ ಜಾಯೋಗಿ?, ಆರಕ್ಷಣ್, ಜಬ್ ತಕ್ ಹೈ ಜಾನ್, ಜೋಕರ್, ಹಾರರ್ ಸ್ಟೋರಿ, ಪ್ರೇಮ್ ರತನ್ ಧಾನ್ ಪಾಯೋ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ಬಿಕ್ರಮ್ ಜೀತ್ ನಟಿಸಿದ್ದರು.

ನಮಕ್ ಹರಾಮ್, ಅದಾಲತ್, ನೀಲಿ ಛತ್ರಿ ವಾಲೆ, ದಿಯಾ ಔರ್ ಬಾಟಿ ಹಮ್, ದಿಲ್ ಹೈ ತೋ ಹೈ, ತೆನಾಲಿ ರಾಮ ಹೀಗೆ ಹಲವು ಜನಪ್ರಿಯ ಟೀವಿ ಸೀರಿಯಲ್ ಗಳಲ್ಲಿ ಕನ್ವರ್ ಪಾಲ್ ಅಭಿನಯಿಸಿದ್ದರು.