ಕಾಸರಗೋಡಿನ ಯಾರಿಗೆ ಸಚಿವ ಸಂಪುಟದಲ್ಲಿ ಸ್ಥಾನ?

Team Udayavani, May 4, 2021, 4:40 AM IST

ಕಾಸರಗೋಡು: ಕೇರಳದಲ್ಲಿ 44 ವರ್ಷಗಳ ಬಳಿಕ ಆಡಳಿತ ಪಕ್ಷ ಮತ್ತೆ ಅಧಿಕಾರದ ಗದ್ದುಗೆ ಹಿಡಿದಿದ್ದು, ಎಡರಂಗದಿಂದ ಕಾಸರಗೋಡು ಜಿಲ್ಲೆಯಲ್ಲಿ ಮೂವರು ಶಾಸಕರಾಗಿ ಆಯ್ಕೆಯಾಗಿದ್ದಾರೆ. ಜಿಲ್ಲೆಗೆ ಸಚಿವ ಪದವಿ ಲಭಿಸಬಹುದೇ? ಎಂಬುದು ಸದ್ಯದ ಕುತೂಹಲಕರ ವಿಷಯ.

ಎಲ್‌ಡಿಎಫ್‌ನಿಂದ ಮೂವರು ಆಯ್ಕೆಯಾಗಿದ್ದಾರೆ. ಸಿಪಿಎಂ ರಾಜ್ಯ ಸಮಿತಿ ಸದಸ್ಯರಾದ ಸಿ.ಎಚ್‌. ಕುಂಞಂಬು ಉದುಮದಿಂದ ಆಯ್ಕೆಯಾಗಿದ್ದಾರೆ. ಜಿಲ್ಲಾ ಸೆಕ್ರೆಟರಿಯೇಟ್‌ ಸದಸ್ಯರೂ ಪ್ರಸ್ತುತ ಶಾಸ ಕರೂ ಆಗಿರುವ ಎಂ. ರಾಜಗೋಪಾಲನ್‌ ತೃಕ್ಕರಿಪುರದಿಂದ ಮರು ಆಯ್ಕೆಯಾಗಿದ್ದಾರೆ. ಸಿಪಿಐ ರಾಜ್ಯ ಸೆಕ್ರೆಟರಿಯೇಟ್‌ ಸದಸ್ಯರೂ ಸಚಿವರೂ ಆಗಿದ್ದ ಇ. ಚಂದ್ರಶೇಖರನ್‌ ಕಾಂಞಂಗಾಡ್‌ನಿಂದ ಹ್ಯಾಟ್ರಿಕ್‌ ವಿಜಯ ಸಾಧಿಸಿದ್ದಾರೆ. ಉಳಿದವರಿಬ್ಬರು ಎರಡನೇ ಬಾರಿ ಶಾಸಕರಾಗಿದ್ದಾರೆ.

ಇ. ಚಂದ್ರಶೇಖರನ್‌ ಅವರು ಪಿಣರಾಯಿ ವಿಜಯನ್‌ ಸರಕಾರದಲ್ಲಿ ಕಂದಾಯ ಸಚಿವರಾಗಿದ್ದರು. ಆದರೆ ಈ ಬಾರಿ ಮತ್ತೆ ಸಚಿವ ಸ್ಥಾನ ಲಭಿಸಬಹುದೇ ಎಂಬ ಕುತೂಹಲ ಪಕ್ಷದಲ್ಲಿದೆ. ಒಂದು ಬಾರಿ ಸಚಿವರಾದವರನ್ನು ಮತ್ತೆ ಸಚಿವ ಸಂಪುಟಕ್ಕೆ ಪರಿಗಣಿಸಬೇಕಾಗಿಲ್ಲ ಎಂದು ಸಿಪಿಐ ರಾಜ್ಯ ಸಮಿತಿ ತೀರ್ಮಾನಿಸಿತ್ತು. ಈ ಹಿನ್ನೆಲೆಯಲ್ಲಿ ಕಳೆದ ಬಾರಿ ಇ. ಚಂದ್ರಶೇಖರನ್‌ ಅವರು ಸಹಿತ ಇತರರನ್ನು ಸಚಿವ ಸಂಪುಟದಲ್ಲಿ ಸೇರ್ಪಡೆಗೊಳಿಸಲಾಗಿತ್ತು. ಈ ತೀರ್ಮಾನವನ್ನು ಪಾಲಿಸಿದಲ್ಲಿ ಹೊಸ ಮುಖಗಳಿಗೆ ಸಚಿವ ಸಂಪುಟದಲ್ಲಿ ಸ್ಥಾನ ಲಭಿಸಬಹುದು. ಪಕ್ಷದ ಹಿರಿಯ ನೇತಾರ, ಪ್ರಸ್ತುತ ಕಂದಾಯ ಸಚಿವರಾಗಿರುವ ಅನುಭವದ ಕಾರಣಕ್ಕೆ ಇ. ಚಂದ್ರಶೇಖರನ್‌ ಅವರನ್ನು ಪರಿಗಣಿಸಿದರೂ ಅಚ್ಚರಿಪಡಬೇಕಾಗಿಲ್ಲ.

ಸಿಪಿಎಂನಿಂದ ಇಬ್ಬರು ಆಯ್ಕೆಯಾಗಿದ್ದಾರೆ. ಈ ಇಬ್ಬರೂ ದ್ವಿತೀಯ ಬಾರಿಗೆ ವಿಧಾನಸಭೆಗೆ ಆಯ್ಕೆ ಯಾಗಿದ್ದಾರೆ. ಕಾಸರಗೋಡಿನಿಂದ ಎಲ್‌ಡಿಎಫ್‌ ಸಚಿವ ಸಂಪುಟದಲ್ಲಿ ಈ ವರೆಗೆ ಸಿಪಿಎಂನಿಂದ ಗೆದ್ದು ಬಂದವರು ಸ್ಥಾನ ಪಡೆ ದಿಲ್ಲ. ಈ ಕಾರಣದಿಂದ ಇವರಿಬ್ಬರಲ್ಲಿ ಒಬ್ಬರನ್ನು ಸಚಿವ ಸಂಪುಟದಲ್ಲಿ ಸೇರ್ಪ ಡೆಗೊಳಿಸಬಹುದು ಅಥವಾ ಸ್ಪೀಕರ್‌ ಸ್ಥಾನಕ್ಕೆ ಪರಿಗಣನೆ ಸಾಧ್ಯತೆಯನ್ನು ಅಲ್ಲಗಳೆಯುವಂತಿಲ್ಲ.

ಕಾಸರಗೋಡಿನಲ್ಲಿ  ಬಿಜೆಪಿ ಮತ ಕುಸಿತ: ಚರ್ಚೆಗೆ ಗ್ರಾಸ :

ಕಾಸರಗೋಡು ವಿಧಾನಸಭೆ ಕ್ಷೇತ್ರದಲ್ಲಿ ಬಿಜೆಪಿ ಮತ ಕುಸಿತ ಕಂಡು ಬಂದಿದೆ. ಕಾಸರಗೋಡು ವಿಧಾನಸಭೆ ಕ್ಷೇತ್ರದಲ್ಲಿ ಸ್ಪರ್ಧಿಸಿದ ಬಿಜೆಪಿ ಜಿಲ್ಲಾ ಅಧ್ಯಕ್ಷ , ನ್ಯಾಯವಾದಿ ಕೆ. ಶ್ರೀಕಾಂತ್‌ಗೆ ಲಭಿಸಿದ ಮತ ಕಳೆದ ಬಾರಿ ಬಿಜೆಪಿ ಅಭ್ಯರ್ಥಿಗೆ ದೊರೆತ ಮತಗಳಿಗಿಂತ 5,725 ಕಡಿಮೆಯಾಗಿವೆ.

2016ರಲ್ಲಿ ಬಿಜೆಪಿ ರಾಜ್ಯ ಸಮಿತಿ ಸದಸ್ಯರಾಗಿದ್ದ ರವೀಶ ತಂತ್ರಿ ಕುಂಟಾರು ಅವರು 56,120 ಮತಗಳನ್ನು ಪಡೆದಿದ್ದರು. ಆದರೆ ಈ ಬಾರಿ ಕೆ. ಶ್ರೀಕಾಂತ್‌ 50,395 ಮತಗಳನ್ನು ಪಡೆಯಲು ಯಶಸ್ವಿಯಾಗಿದ್ದಾರೆ.

ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್‌ ಭಾಗವಹಿಸಿದ ರ್ಯಾಲಿ ಕೂಡ ಕಾಸರಗೋಡಿನಲ್ಲಿ ಆಯೋಜಿಸಲಾಗಿತ್ತು. ಕರ್ನಾಟಕದ ಸಚಿವರು ಸಹಿತ ಹಿರಿಯ ಮುಖಂಡರು ಬಂದು ಪ್ರಚಾರ ಕೈಗೊಂಡರೂ ಮತ ಕುಸಿತವುಂಟಾಗಿದ್ದು, ಚರ್ಚೆಗೆ ಗ್ರಾಸವಾಗಿದೆ.

ಬಿಜೆಪಿ ರಾಜ್ಯ ಅಧ್ಯಕ್ಷ ಕೆ. ಸುರೇಂದ್ರನ್‌ ಸ್ಪರ್ಧಿಸಿದ ಮಂಜೇಶ್ವರ ವಿಧಾನಸಭೆ ಕ್ಷೇತ್ರದಲ್ಲಿ ಬಿಜೆಪಿ ಸಾಧನೆ ಮಾಡಿದೆ. 2016ರಲ್ಲಿ ಬಿಜೆಪಿ ಪಡೆದ ಮತಗಳಿಗಿಂತ 8,232 ಮತಗಳು ಅಧಿಕ ಲಭಿಸಿವೆ. ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಸ್ಪರ್ಧಿಸಿದ ಉದುಮ ವಿಧಾನಸಭೆ ಕ್ಷೇತ್ರದಲ್ಲಿ ಬಿಜೆಪಿಗೆ 825 ಮತಗಳು ಕಡಿಮೆಯಾಗಿವೆ. ಕಾಂಞಂಗಾಡ್‌ ಮತ್ತು ತೃಕ್ಕರಿಪುರದಲ್ಲಿ ಅನುಕ್ರಮವಾಗಿ 466 ಮತ್ತು 254 ಮತಗಳು ಅಧಿಕವಾಗಿವೆ.