ಮಾಸ್ಟರ್‌ಶೆಫ್ ಆಗಲಿದ್ದಾರೆ ಕಿಚ್ಚ

Team Udayavani, May 10, 2021, 7:34 AM IST

ಸುದೀಪ್‌ ನಡೆಸಿಕೊಡುತ್ತಿದ್ದ ಬಿಗ್‌ ಬಾಸ್‌ ರಿಯಾಲಿಟಿ ಶೋ ಸ್ಥಗಿತಗೊಂಡಿದೆ. ಈ ನಡುವೆಯೇ ಸುದೀಪ್‌ ಅವರ ಕುರಿತಾಗಿ ಮತ್ತೂಂದು ಸುದ್ದಿ ಕೇಳಿ ಬರುತ್ತಿದೆ. ಅದು ಕಿರುತೆರೆಯ ಹೊಸ ಶೋವೊಂದರ ಕುರಿತಾಗಿ.

ಮಾಸ್ಟರ್‌ ಶೆಫ್ ಎಂಬ ಅಡುಗೆ ಕಾರ್ಯಕ್ರಮದ ನಿರೂಪಣೆಯನ್ನು ಸುದೀಪ್‌ ಮಾಡಲಿದ್ದಾರೆ. ಈ ಮೂಲಕ ಸುದೀಪ್‌ ಮತ್ತೆ ಕಿರುತೆರೆ ಪ್ರೇಕ್ಷಕರ ಮುಂದೆ ಬರಲಿದ್ದಾರೆ. ಸುದೀಪ್‌ ಅವರಿಗೆ ಅಡುಗೆ ಮಾಡುವುದೆಂದರೆ ತುಂಬಾ ಇಷ್ಟ. ತಮಗೆ ಇಷ್ಟದ ಅಡುಗೆಯನ್ನು ಸುದೀಪ್‌ ಅವರೇ ಮಾಡಿಕೊಳ್ಳುತ್ತಾರೆ. ಈಗ ಖಾಸಗಿ ವಾಹಿನಿಯಲ್ಲಿ ಪ್ರಸಾರವಾಗಲಿರುವ ಶೋನಲ್ಲಿ ಮಾಸ್ಟರ್‌ ಶೆಫ್ ಆಗಲಿದ್ದಾರೆ. ಈ ವಿಚಾರವನ್ನು ಸ್ವತಃ ಸುದೀಪ್‌ ಅವರೇ ಖಚಿತ ಪಡಿಸಿದ್ದು, ಸದ್ಯದ ಕೊರೊನಾ ಪರಿಸ್ಥಿತಿ ತಿಳಿಯಾದ ಬಳಿಕ ಆರಂಭವಾಗಲಿದೆ ಎಂದಿದ್ದಾರೆ.

ಅನಾರೋಗ್ಯಕ್ಕೆ ತುತಾಗಿದ್ದ ಸುದೀಪ್‌ ಅವರು ಈಗ ಚೇತರಿಸಿಕೊಂಡಿದ್ದಾರೆ. ಆರೋಗ್ಯ ಕೈ ಕೊಟ್ಟಾಗ ಸಹಜವಾಗಿಯೇ ಸುದೀಪ್‌ ಅವರಿಗೆ ಸ್ವಲ್ಪ ಭಯವಾಗಿತ್ತಂತೆ. ಆದರೆ, ಎಲ್ಲರ ಪ್ರಾರ್ಥನೆ ಹಾಗೂ ಹಾರೈಕೆಯಿಂದ ಗುಣಮುಖರಾಗಿದ್ದಾರೆ. ಮುಂದಿನ ದಿನಗಳಲ್ಲಿ ಮತ್ತಷ್ಟು ಸಾಮಾಜಿಕ ಕಾರ್ಯ ಮಾಡುವ ಉದ್ದೇಶವನ್ನು ಸುದೀಪ್‌ ಹೊಂದಿದ್ದಾ ರೆ. ಈಗಾಗಲೇ ಸುದೀಪ್‌ ತಮ್ಮ ಚಾರಿಟಿ ಮೂಲಕ ಸಾಕಷ್ಟು ಮಂದಿಗೆ ಸಹಾಯ ಮಾಡುತ್ತಿದ್ದಾರೆ. ಇತ್ತೀಚಿಗಷ್ಟೇ, ನಟಿ ಸೋನು ಪಾಟೀಲ್‌, ತಮ್ಮ ತಾಯಿಯ ಜೀವ ಉಳಿಸಲು ಸುದೀಪ್‌ ಲಕ್ಷಗಟ್ಟಲೇ ರೂಪಾಯಿ ಸಹಾಯ ಮಾಡಿದ್ದನ್ನು ವಿಡಿಯೋ ಮೂಲಕ ಹೇಳಿ ಕೊಂಡಿದ್ದಾರೆ. ಹೀಗೆ ಅನೇಕರಿಗೆ ಸುದೀಪ್‌ ಸಹಾಯ ಮಾಡುತ್ತಲೇ ಬರುತ್ತಿದ್ದಾರೆ.

ಸದ್ಯ ಸುದೀಪ್‌ ಅವರ ನಟನೆಯ ಎರಡು ಚಿತ್ರಗಳು ಬಿಡುಗಡೆಯ ಹಂತಕ್ಕೆ ಬಂದಿವೆ.”ಕೋಟಿಗೊಬ್ಬ-3′ ಹಾಗೂ “ವಿಕ್ರಾಂತ್‌ ರೋಣ’ ಚಿತ್ರಗಳು ಬಿಡುಗಡೆಯಾಗಲಿವೆ. ಈ ಎರಡೂ ಚಿತ್ರ ಗಳ ಮೇಲೂ ಸುದೀಪ್‌ ಅವರ ಅಭಿಮಾನಿಗಳಿಗೆ ನಿರೀಕ್ಷೆ ಇದೆ. ಈ ನಡುವೆಯೇ ಪರಭಾಷೆಯ ಮೂರು ಚಿತ್ರಗಳಲ್ಲಿ ಸುದೀಪ್‌ ಹೆಸರು ಕೇಳಿ ಬರುತ್ತಿದೆ.