ಜಿನೇವಾ ಓಪನ್‌ ಟೆನಿಸ್‌ : ಗೆಲುವಿನ ರೋಡ್‌ನ‌ಲ್ಲಿ ರೂಡ್‌

Team Udayavani, May 24, 2021, 12:05 AM IST

ಜಿನೇವಾ (ಸ್ವಿಜರ್‌ಲ್ಯಾಂಡ್‌): ನಾರ್ವೆಯ ಕ್ಯಾಸ್ಪರ್‌ ರೂಡ್‌ ತಮ್ಮ ಟೆನಿಸ್‌ ಬಾಳ್ವೆಯಲ್ಲಿ ಬಹು ದೊಡ್ಡ ಸಾಧನೆಗೈದಿದ್ದಾರೆ. ಕೆನಡಾದ ಇನ್‌ಫಾರ್ಮ್ ಹಾಗೂ ನೆಚ್ಚಿನ ಆಟಗಾರ ಡೆನ್ನಿಸ್‌ ಶಪೊವಲೋವ್‌ ಅವರನ್ನು ಮಣಿಸಿ “ಜಿನೇವಾ ಓಪನ್‌ ಟೆನಿಸ್‌’ ಪ್ರಶಸ್ತಿ ಜಯಿಸಿದ್ದಾರೆ.

ಫೈನಲ್‌ ಹಣಾಹಣಿಯಲ್ಲಿ 3ನೇ ಶ್ರೇಯಾಂಕದ ಕ್ಯಾಸ್ಪರ್‌ ರೂಡ್‌ 7-6 (8-6), 6-4 ಅಂತರದಿಂದ ಶಪೊವಲೋವ್‌ಗೆ ಸೋಲುಣಿಸಿದರು. ಇದು ರೂಡ್‌ ಗೆದ್ದ ದ್ವಿತೀಯ ಎಟಿಪಿ ಟೆನಿಸ್‌ ಪ್ರಶಸ್ತಿ. ಕಳೆದ ವರ್ಷ ಆರ್ಜೆಂಟೀನಾ ಓಪನ್‌ ಚಾಂಪಿಯನ್‌ ಎನಿಸಿದ್ದರು.

ಟೈ ಬ್ರೇಕರ್‌ನಲ್ಲಿ ಅಂತ್ಯ ಕಂಡ ಮೊದಲ ಸೆಟ್‌ನಲ್ಲಿ ಶಪೊವಲೋವ್‌ ದಿಟ್ಟ ಹೋರಾಟ ನಡೆಸಿದರು. 4 ಅಂಕಗಳಿಂದ ಹಿಂದಿದ್ದ ಅವರು 6-6ರ ತನಕ ಮುನ್ನುಗ್ಗಿ ಬಂದರು. ಆದರೆ ರೂಡ್‌ ಬಹಳ ಎcರಿಕೆಯಿಂದ ಪರಿಸ್ಥಿತಿ ನಿಭಾಯಿಸುವಲ್ಲಿ ಯಶಸ್ವಿಯಾದರು. ಈ ಜಯದೊಂದಿಗೆ ಕ್ಯಾಸ್ಪರ್‌ ರೂಡ್‌ ಅವರೀಗ ರ್‍ಯಾಂಕಿಂಗ್‌ ಯಾದಿಯಲ್ಲಿ 16ನೇ ಸ್ಥಾನಕ್ಕೆ ನೆಗೆದಿದ್ದಾರೆ.