ಮೂರು ವರ್ಷದ ಬುದ್ದಿ ನೂರು ವರ್ಷದವರೆಗೆ : ಒಬ್ಬಳೇ ಆಸ್ಪತ್ರೆಗೆ ಆಗಮಿಸಿದ ಪುಟ್ಟ ಪೋರಿ

Team Udayavani, Jun 4, 2021, 3:37 PM IST

ನಾಗಾಲ್ಯಾಂಡ್ : ಕೋವಿಡ್ ಸೋಂಕು ಸೃಷ್ಟಿಸಿರುವ ಆತಂಕದ ವಾತಾವರಣದಲ್ಲಿ ನೆಗಡಿ-ಕೆಮ್ಮು ಬಂದರೆ ಜನರು ಆಸ್ಪತ್ರೆಯ ಮೆಟ್ಟಿಲು ತುಳಿಯಲು ಹಿಂದೇಟು ಹಾಕುತ್ತಿದ್ದಾರೆ. ಭಯದಿಂದ ಮನೆಯಲ್ಲಿಯೇ ಉಳಿದುಕೊಳ್ಳುತ್ತಿದ್ದಾರೆ. ಆದರೆ, ಇಲ್ಲೊಬ್ಬಳು ಪುಟ್ಟ ಬಾಲೆ ಒಬ್ಬಳೇ ವೈದ್ಯರ ಬಳಿ ತೆರಳಿ ಚಿಕಿತ್ಸೆ ಪಡೆಯುವ ಮೂಲಕ ಸಾವಿರಾರು ಜನರ ಮೆಚ್ಚುಗೆಗೆ ಪಾತ್ರವಾಗಿದ್ದಾಳೆ.

ಈ ಅಪರೂಪದ ಘಟನೆ ನಡೆದಿರುವುದು ನಾಗಲ್ಯಾಂಡಿನಲ್ಲಿ. ತನಗೆ ನೆಗಡಿಯ ಲಕ್ಷಣಗಳು ಕಾಣಿಸಿಕೊಂಡಿದ್ದರಿಂದ ಯಾರ ಸಹಾಯವೂ ಇಲ್ಲದೆ ತಾನೋಬ್ಬಳೆ ಆರೋಗ್ಯ ಕೇಂದ್ರಕ್ಕೆ ತೆರಳಿದ್ದಾಳೆ ಈ ಬಾಲಕಿ . ಹೀಗೆ ತನ್ನ ಆರೋಗ್ಯದ ಬಗ್ಗೆ ತಾನೇ ಕಾಳಜಿ ವಹಿಸಿದ ಕಂದನ ಹೆಸರು ಲಿಪಾವಿ. ಈಕೆಯ ವಯಸ್ಸು ಕೇವಲ ಮೂರೇ ಮೂರು ವರ್ಷ.  ಬೆಳೆಯುವ ಸಿರಿ ಮೊಳೆಯಲ್ಲಿ ಎಂದ ಗಾದೆ ಮಾತಿನಂತೆ ಈ ಚಿಕ್ಕ ವಯಸ್ಸಿನಲ್ಲಿಯೆ ಲಿಪಾವಿ ಹಿರಿಯರಂತೆ ನಡೆದುಕೊಂಡಿದ್ದಾಳೆ.

ಲಿಪಾವಿಗೆ ಸಣ್ಣದಾಗಿ ಕೆಮ್ಮು ಹಾಗೂ ನೆಗಡಿ ಕಾಣಿಸಿಕೊಂಡಿತ್ತು. ಈ ಕುರಿತು ತನ್ನ ಪೋಷಕರ ಗಮನಕ್ಕೆ ತಂದಿದ್ದಳು. ಆದರೆ, ಈ ಬಗ್ಗೆ ನಿರ್ಲಕ್ಷ್ಯ ತೋರಿದ ಆಕೆಯ ತಂದೆ-ತಾಯಿ ಎಂದಿನಂತೆ ಕೆಲಸಕ್ಕೆ ಹೋಗಿದ್ದರು. ಆದರೆ, ಲಿಪಾವಿ ಸುಮ್ಮನೆ ಮನೆಯಲ್ಲಿ ಕೂರದೆ  ಹತ್ತಿರದ ‘ಹೆಬೊಲಿಮಿ ಹೆಸರಿನ ಆರೋಗ್ಯ ಕೇಂದ್ರ’ಕ್ಕೆ ತೆರಳಿದ್ದಾಳೆ.

ಈ ಪುಟ್ಟ ಕಂದ ಆಸ್ಪತ್ರೆಗೆ ಬಂದಿರುವುದನ್ನ ನೋಡಿ ಅಚ್ಚರಿಗೊಂಡ ಅಲ್ಲಿಯ ವೈದ್ಯರು, ಆಕೆಯ ಸಮಸ್ಯೆ ಆಲಿಸಿ, ಚಿಕಿತ್ಸೆ ನೀಡಿ ಮನೆಗೆ ಕಳುಹಿಸಿದ್ದಾರೆ. ಜೊತೆಗೆ ಈ ವಿಷಯವನ್ನು ತಮ್ಮ ಟ್ವಿಟರ್ ಖಾತೆಯಲ್ಲಿ ಹಂಚಿಕೊಂಡು, ಪುಟ್ಟ ಬಾಲೆಗಿರುವ ಆರೋಗ್ಯ ಕಾಳಜಿ ಕುರಿತು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಸೋಷಿಯಲ್ ಮೀಡಿಯಾದಲ್ಲಿಯೂ ಈ ಪೊಸ್ಟ್ ಅಪಾರ ಮೆಚ್ಚುಗೆ ಪಡೆದುಕೊಂಡಿದೆ.

The medical staff were in for a pleasant surprise when 3-year old Miss Lipavi,showed up at the health centre.She reportedly had cold symptoms but since her parents had left for the paddy field,she decided to come all by herself for a checkup at the health center.@narendramodi pic.twitter.com/hPzLZg6OCi

— Benjamin Yepthomi (@YepthomiBen) June 3, 2021