ಫ್ರೆಂಚ್‌ ಓಪನ್‌ ಗ್ರ್ಯಾನ್‌ಸ್ಲಾಮ್‌ ಟೆನಿಸ್‌ : ಮುಸೆಟ್ಟಿ ಹಿಡಿತದಿಂದ ಪಾರಾದ ಜೊಕೋವಿಕ್‌

Team Udayavani, Jun 8, 2021, 6:45 AM IST

ಪ್ಯಾರಿಸ್‌: ಇಟಲಿಯ ಲೊರೆಂಜೊ ಮುಸೆಟ್ಟಿ ಅವರ ಹಿಡಿತದಿಂದ ಪಾರಾದ ನಂ.1 ಆಟಗಾರ ನೊವಾಕ್‌ ಜೊಕೋವಿಕ್‌ ಫ್ರೆಂಚ್‌ ಓಪನ್‌ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸುವಲ್ಲಿ ಯಶಸ್ವಿ ಯಾಗಿದ್ದಾರೆ. ಮೊದಲೆರಡು ಸೆಟ್‌ಗಳನ್ನು ಟೈ ಬ್ರೇಕರ್‌ನಲ್ಲಿ ಕಳೆದುಕೊಂಡ ಬಳಿಕ ಅಮೋಘ ಪ್ರದರ್ಶನ ನೀಡಿದ ಜೊಕೋ 6-7 (7-9), 6-7 (2-7), 6-1, 6-0, 4-0 ಅಂತರದ ಗೆಲುವು ಸಾಧಿಸಿದರು. ಅಂತಿಮ ಸೆಟ್‌ನಲ್ಲಿ ಹಿನ್ನಡೆಯಲ್ಲಿದ್ದಾಗ ಮುಸೆಟ್ಟಿ ನಿವೃತ್ತರಾದರು.

ಆರ್ಜೆಂಟೀನಾದ ಡೀಗೊ ಶಾರ್ಟ್ಸ್
ಮನ್‌, ಜರ್ಮನಿಯ ಅಲೆಕ್ಸಾಂಡರ್‌ ಜ್ವೆರೇವ್‌ ಕೂಡ ಕ್ವಾರ್ಟರ್‌ ಫೈನಲ್‌ ತಲುಪಿದ್ದಾರೆ. ಶಾರ್ಟ್ಸ್ಮನ್‌ ಜರ್ಮನಿಯ ಜಾನ್‌ ಲೆನಾರ್ಡ್‌ ಸ್ಟ್ರಫ್ ವಿರುದ್ಧ ಟಫ್ ಫೈಟ್‌ ನಡೆಸಿ 7-6 (11-9), 6-4, 7-5 ಅಂತರದ ಗೆಲುವು ಕಾಣುವಲ್ಲಿ ಯಶಸ್ವಿಯಾದರು.
6ನೇ ಶ್ರೇಯಾಂಕದ ಜ್ವೆರೇವ್‌ ಬಹಳ ಸುಲಭದಲ್ಲಿ ಜಪಾನಿನ ಕೀ ನಿಶಿಕೊರಿ ಅವರಿಗೆ ಸೋಲುಣಿಸಿದರು. ಅಂತರ 6-4, 6-1, 6-1. ಜ್ವೆರೇವ್‌ ಅವರ ಕ್ವಾರ್ಟರ್‌ ಫೈನಲ್‌ ಎದುರಾಳಿ ಸ್ಪೇನಿನ ಅಲೆಕ್ಸಾಂಡ್ರೊ ಫೋಕಿನ. ಅವರು ಫೆಡೆರಿಕೊ ಡೆಲ್ಬೊನಿಸ್‌ ವಿರುದ್ಧ 4 ಸೆಟ್‌ಗಳ ಹೋರಾಟದಲ್ಲಿ ಮೇಲುಗೈ ಸಾಧಿಸಿದರು.

ಕ್ರೆಜಿಕೋವಾ ಓಟ
ಜೆಕೋಸ್ಲೊವಾಕಿಯಾದ ಬಿಗ್‌ ಹಿಟ್ಟಿಂಗ್‌ ಆಟಗಾರ್ತಿ ಬಾಬೊìರಾ ಕ್ರೆಜಿಕೋವಾ ಅಚ್ಚರಿಯ ಫ‌ಲಿತಾಂಶದೊಂದಿಗೆ ಫ್ರೆಂಚ್‌ ಓಪನ್‌ ಕ್ವಾರ್ಟರ್‌ ಫೈನಲ್‌ಗೆ ಲಗ್ಗೆ ಇರಿಸಿದ್ದಾರೆ. ಸೋಮವಾರದ ಮುಖಾವ ಮುಖೀಯಲ್ಲಿ ಅವರು ಮಾಜಿ ಫೈನಲಿಸ್ಟ್‌, ಮಾಜಿ ನಂ.1 ಖ್ಯಾತಿಯ ಅಮೆರಿಕದ ಸ್ಲೋನ್‌ ಸ್ಟೀಫ‌ನ್ಸ್‌ ವಿರುದ್ಧ 6-2, 6-0 ನೇರ ಸೆಟ್‌ ಜಯ ದಾಖಲಿಸಿದರು.

33 ವರ್ಷದ ಕ್ರೆಜಿಕೋವಾ 2018ರಲ್ಲಿ ಇದೇ ಕೂಟದ ವನಿತಾ ಡಬಲ್ಸ್‌ ಚಾಂಪಿಯನ್‌ ಎನಿಸಿದ್ದರು. ಕ್ಯಾಥರಿನಾ ಸಿನಿಯಕೋವಾ ಅಂದಿನ ಜತೆಗಾರ್ತಿ.

ಕ್ವಾರ್ಟರ್‌ ಫೈನಲ್‌ನಲ್ಲಿ ಕ್ರೆಜಿಕೋವಾ ಅಮೆರಿಕದ ಮತ್ತೋರ್ವ ಆಟಗಾರ್ತಿ ಕೊಕೊ ಗಾಫ್ ವಿರುದ್ಧ ಕಾದಾಟ ನಡೆಸಬೇಕಿದೆ. ಗಾಫ್ ಟ್ಯುನಿಶಿಯಾದ ಓನ್ಸ್‌ ಜೆಬುರ್‌ ವಿರುದ್ಧ 6-3, 6-1 ಅಂತರದ ಸುಲಭ ಜಯ ಸಾಧಿಸಿದರು.

ಸೆರೆನಾಗೆ ಸೋಲು
ಇದೇ ವೇಳೆ ಸೆರೆನಾ ವಿಲಿಯಮ್ಸ್‌ ಅವರ 24ನೇ ಗ್ರ್ಯಾನ್‌ಸ್ಲಾಮ್‌ ಟ್ರೋಫಿಯ ಯೋಜನೆ ತಲೆಕೆಳಗಾಗಿದೆ. ಅವರನ್ನು ಕಜಾಕ್‌ಸ್ಥಾನದ ಎಲೆನಾ ರಿಬಾಕಿನಾ 6-3, 7-5 ನೇರ ಸೆಟ್‌ಗಳಿಂದ ಬಗ್ಗುಬಡಿದರು.