ಕರ್ಫ್ಯೂ ಕೊಂಚ ಸಡಿಲ; ಜನಸಂಚಾರ ಹೆಚ್ಚಳ

Team Udayavani, Jun 15, 2021, 5:49 PM IST

ಧಾರವಾಡ: ಜಿಲ್ಲೆಯಲ್ಲಿ ಅನ್‌ಲಾಕ್‌ ಪ್ರಕ್ರಿಯೆಗೆ ಚಾಲನೆ ಲಭಿಸಿದ್ದು, ಸೋಮವಾರ ಮೊದಲ ದಿನವೇ ಜನ ಹಾಗೂ ವಾಹನಗಳ ಸಂಚಾರ ಜೋರಾಗಿತ್ತು.

ಕಳೆದ ಒಂದೂವರೆ ತಿಂಗಳಿಂದ ಜನ-ವಾಹನಗಳ ಸಂಚಾರವಿಲ್ಲದೇ ಭಣಗುತ್ತಿದ್ದ ಸುಭಾಸ, ಟಿಕಾರೆ ಸೇರಿದಂತೆ ನಗರದ ಪ್ರಮುಖ ರಸ್ತೆಗಳಲ್ಲಿ ವಾಹನಗಳ ಸಂಚಾರ ಜೋರಾಗಿತ್ತು. ಮಾರುಕಟ್ಟೆ ಪ್ರದೇಶದಲ್ಲಿ ಜನರ ಸಂಚಾರ, ವ್ಯಾಪಾರ-ವಹಿವಾಟು ಹೆಚ್ಚಿತ್ತು.

ಅನ್‌ಲಾಕ್‌ ಪ್ರಕ್ರಿಯೆ ಮೊದಲ ಹಂತವಾಗಿ ಅಗತ್ಯ ವಸ್ತುಗಳು ಸೇರಿ ಕೆಲ ವಲಯಗಳಿಗೆ ವಿನಾಯಿತಿ ನೀಡಲಾಗಿದೆ. ಆದರೆ ಬೆಳಗ್ಗೆಯಿಂದ ತುಂತುರು ಮಳೆ ಇದ್ದ ಕಾರಣಕ್ಕೆ ಮಾರುಕಟ್ಟೆಯಲ್ಲಿ ಜನ ಸಂಚಾರ ವಿರಳವಾಗಿತ್ತು. ಮಧ್ಯಾಹ್ನ 2 ಗಂಟೆವರೆಗೂ ವ್ಯಾಪಾರ-ವಹಿವಾಟಿಗೆ ಅವಕಾಶ ನೀಡಿದ್ದರಿಂದ ಕೆಲ ವ್ಯಾಪಾರಸ್ಥರು ವಿಳಂಬವಾಗಿ ಅಂಗಡಿ ತೆರೆದರೆ, ಬೆಳಗ್ಗೆ ಬೇಗ ಅಂಗಡಿ ತೆರೆದವರಿಗೆ ಮಳೆ ನಿರಾಸೆ ಮೂಡಿಸಿತು.

ರಸ್ತೆಗಿಳಿದ ಜನರು ಮಾತ್ರ ಸರ್ಕಾರದ ನಿಯಮ ಪಾಲನೆ ಮಾಡದಿರುವುದು ಸ್ಪಷ್ಟವಾಗಿತ್ತು. ಬಹುತೇಕ ಜನರು, ವ್ಯಾಪಾರಸ್ಥರು ಮಾಸ್ಕ್ ಇಲ್ಲದೆ ವ್ಯಾಪಾರ-ವಹಿವಾಟು ನಡೆಸಿರುವುದು ಸಾಮಾನ್ಯವಾಗಿತ್ತು. ಮಧ್ಯಾಹ್ನದ ಬಳಿಕ ಜನ ಸಂಚಾರ ವಿರಳವಾಗಿತ್ತು. ಆಟೋಗಳು ರಸ್ತೆಗಳಿದು ಸಂಚಾರ ಮಾಡಿದವು.