ಹೊನ್ನಾಳಿ-ನ್ಯಾಮತಿಯಲ್ಲಿ ಉತ್ತಮ ಮಳೆ

Team Udayavani, Jun 19, 2021, 8:59 PM IST

ಹೊನ್ನಾಳಿ: ಹೊನ್ನಾಳಿ ಮತ್ತು ನ್ಯಾಮತಿ ಅವಳಿ ತಾಲೂಕುಗಳಲ್ಲಿ ಗುರುವಾರ ರಾತ್ರಿ ಹಾಗೂ ಶುಕ್ರವಾರ ಬೆಳಗಿನ ಜಾವ ವ್ಯಾಪಕವಾಗಿ ಮಳೆ ಸುರಿದಿದೆ. ಪಟ್ಟಣ ಹಾಗೂ ಅವಳಿ ತಾಲೂಕುಗಳಲ್ಲಿ ಗುರುವಾರ ರಾತ್ರಿ 11 ಗಂಟೆಯಿಂದ ಪ್ರಾರಂಭವಾದ ಮಳೆ ಮಧ್ಯರಾತ್ರಿವರೆಗೆ ಸುರಿದು ನಂತರ ಅಲ್ಪ ವಿರಾಮ ಕೊಟ್ಟು ಬಿರುಸಿನ ಮಳೆಯಾಗಿದೆ.

ಅವಳಿ ತಾಲೂಕುಗಳಲ್ಲಿ ಒಟ್ಟು 186 ಮಿ.ಮೀ. ಮಳೆಯಾಗಿದೆ. 2 ತಾಲೂಕುಗಳಲ್ಲಿ 26.5 ಮಿ.ಮೀ. ಸರಾಸರಿ ಮಳೆಯಾಗಿದೆ. ಹೊನ್ನಾಳಿ ತಾಲೂಕಿನ ಕುಂದೂರು ಗ್ರಾಮದ ವ್ಯಾಪ್ತಿಯಲ್ಲಿ 36.4 ಮಿ.ಮೀ. ಅತೀ ಹೆಚ್ಚು ಬಿದ್ದಿದ್ದರೆ, ನ್ಯಾಮತಿ ತಾಲೂಕಿನ ಬೆಳಗುತ್ತಿ ಗ್ರಾಮದ ವ್ಯಾಪ್ತಿಯಲ್ಲಿ 44.8 ಮಿ.ಮೀ. ಅತಿ ಹೆಚ್ಚು ಮಳೆಯಾಗಿದೆ. ಈ ಮಳೆಯಿಂದ ಹರ್ಷಗೊಂಡ ರೈತರು ಬಿತ್ತನೆ ಕಾರ್ಯ ಚುರುಕುಗೊಳಿಸಿದ್ದಾರೆ. ಭರ್ಜರಿ ಮಳೆಗೆ ಹಳ್ಳಕೊಳ್ಳಗಳು ತುಂಬಿ ಹರಿಯುತ್ತಿವೆ.

ನದಿ ನೀರಿನ ಮಟ್ಟ ಏರಿಕೆ: ಎರಡೇ ದಿನದಲ್ಲಿ ತುಂಗಭದ್ರಾ ನದಿ ನೀರಿನ ಮಟ್ಟ ಗಣನೀಯವಾಗಿ ಏರಿಕೆ ಕಂಡಿದೆ. ಜೂ.16ರಂದು ಬುಧವಾರ ನದಿ ನೀರಿನ ಮಟ್ಟ 6ಮೀ. ಇದ್ದದ್ದು ಜೂನ್‌ 18ರ ಶುಕ್ರವಾರ ತುಂಗಭದ್ರಾ ನದಿ ನೀರಿನ ಮಟ್ಟ 8.140ಮೀ.ಗೆ ಏರಿಕೆಯಾಗಿದೆ.

ಮಲೆನಾಡಿನಲ್ಲಿ ಮಳೆ ಪ್ರಮಾಣ ಹೆಚ್ಚಾದರೆ ನದಿ ನೀರಿನ ಮಟ್ಟ ಏರಿಕೆಯಾಗುತ್ತದೆ. ಸದ್ಯ ಮಲೆನಾಡು ಹಾಗೂ ಅಚ್ಚುಕಟ್ಟು ಪ್ರದೇಶಗಳಲ್ಲಿ ಮಳೆ ಪ್ರಮಾಣ ಕ್ಷೀಣಿಸಿದೆ. ನದಿ ಮಟ್ಟ ಏರಿಕೆಯಾಗಿಲ್ಲ ಎಂದು ಶುಕ್ರವಾರ ನದಿ ನೀರಿನ ಮಟ್ಟ ಪರೀಕ್ಷಿಸಿದ ಸೆಂಟ್ರಲ್‌ ವಾಟರ್‌ ಕಮಿಷನ್‌ ಕಿರಿಯ ಇಂಜಿನಿಯರ್‌ ಪವನ್‌ ತಿಳಿಸಿದರು.