ಸುಂಜ್ವಾನ್ ಸೇನಾ ನೆಲೆಯ ಬಳಿ ಮತ್ತೊಂದು ಡ್ರೋನ್ ಪತ್ತೆ: ಮೂರು ದಿನದಲ್ಲಿ ಐದು ಡ್ರೋನ್ ಪತ್ತೆ

Team Udayavani, Jun 29, 2021, 9:56 AM IST

ಶ್ರೀನಗರ: ಎರಡು ಡ್ರೋನ್ ಗಳನ್ನು ಯೋಧರು ಹಿಮ್ಮೆಟ್ಟಿಸಿದ ದಿನದ ಬಳಿಕ ಮತ್ತೊಂದು ಡ್ರೋನ್ ಪತ್ತೆಯಾಗಿದೆ. ಸುಂಜ್ವಾನ್ ಸೇನಾ ನೆಲೆಯ ಬಳಿ ಡ್ರೋನ್ ಹಾರಾಟ ನಡೆದಿದೆ.

ಮುಂಜಾನೆ 2.30 ರ ಸುಮಾರಿಗೆ ಕುಂಜ್ವಾನಿ, ಸುಂಜ್ವಾನ್ ಮತ್ತು ಕಲುಚಕ್ ಪ್ರದೇಶದಲ್ಲಿ ಡ್ರೋನ್ ಪತ್ತೆಯಾಗಿದೆ. ಆದರೆ ಕೆಲವೇ ಕ್ಷಣಗಳಲ್ಲಿ ಅವುಗಳು ನಾಪತ್ತೆಯಾಗಿದೆ ಎಂದು ಮೂಲಗಳು ತಿಳಿಸಿವೆ.

ಜಮ್ಮು ನಗರ ಮತ್ತು ಸತ್ವಾರಿ ವಾಯುಪಡೆ ನಿಲ್ದಾಣದ ಸಮೀಪದಲ್ಲಿರುವ ಕುಂಜ್ವಾನಿ ಪ್ರದೇಶವು, ಸುಂಜ್ವಾನ್‌ನಿಂದ 6.5 ಕಿ.ಮೀ ಮತ್ತು ಕಲುಚಕ್‌ನಿಂದ 4.5 ಕಿ.ಮೀ ದೂರದಲ್ಲಿದೆ.

ಇದನ್ನೂ ಓದಿ:ಯುವತಿಯರ ಅಪಹರಣ, ವಿವಾಹ, ಮತಾಂತರ: ಜಮ್ಮು ಕಾಶ್ಮೀರದಲ್ಲಿ ಸಿಖ್ ಸಮುದಾಯ ಪ್ರತಿಭಟನೆ

ಕಳೆದ ಮೂರು ದಿನಗಳಿಂದ ಮಿಲಿಟರಿ ನೆಲೆಯ ಬಳಿ ಸತತವಾಗಿ ಡ್ರೋನ್ ಹಾರಾಟ ನಡೆಯುತ್ತಿದೆ. ಮೂರು ದಿನದಲ್ಲಿ ಒಟ್ಟು ಐದು ಡ್ರೋನ್ ಹಾರಾಟ ಪತ್ತೆಯಾಗಿದೆ. ಸೋಮವಾರ ಕಲುಚಕ್ ಮಿಲಿಟರಿ ಬೇಸ್ ಬಳಿ ಎರಡು ಡ್ರೋನ್ ಗಳು ಪತ್ತೆಯಾಗಿದ್ದವು. ಸೇನಾ ನೆಲೆಯೊಳಗೆ ಒಂದು ಡ್ರೋನ್ ರಾತ್ರಿ 11: 45 ಕ್ಕೆ ಮತ್ತು ಇನ್ನೊಂದು ಬೆಳಿಗ್ಗೆ 2:40 ಕ್ಕೆ ಹಾರುತ್ತಿರುವುದು ಕಂಡುಬಂದಿದೆ. ಕೂಡಲೇ ಎಚ್ಚೆತ್ತ ಯೋಧರು ಅವುಗಳನ್ನು ತಟಸ್ಥಗೊಳಿಸಲು ಡ್ರೋನ್‌ಗಳ ಮೇಲೆ ಗುಂಡು ಹಾರಿಸಿದ್ದರು.