ಜೂನ್‌ನಲ್ಲಿ ವಾಡಿಕೆಗಿಂತ ಶೇ.10ರಷ್ಟು ಹೆಚ್ಚು ಮಳೆ : ಹವಾಮಾನ ಇಲಾಖೆ ಪ್ರಕಟನೆ

Team Udayavani, Jul 1, 2021, 7:10 AM IST

ಹೊಸದಿಲ್ಲಿ: ನೈಋತ್ಯ ಮುಂಗಾರು ಮಾರುತಗಳು ಉತ್ತರ ಭಾರತದಲ್ಲಿ ಇನ್ನೂ ಕಣ್ಣಾ ಮುಚ್ಚಾಲೆ ಆಡುತ್ತಿರುವ ನಡುವೆಯೇ, ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ಪ್ರಕಟನೆಯೊಂದನ್ನು ಹೊರಡಿಸಿದ್ದು, ಜೂನ್‌ ತಿಂಗಳಲ್ಲಿ ದೇಶಾದ್ಯಂತ ವಾಡಿಕೆಗಿಂತ ಶೇ. 10ರಷ್ಟು ಹೆಚ್ಚು ಮಳೆ ಸುರಿದಿದೆ ಎಂದು ಹೇಳಿದೆ.

“ಮುಂಗಾರು ಮಾರುತಗಳು ಜೂ. 3ರಿಂದ 19ರ ವರೆಗೆ ಪ್ರಬಲವಾಗಿದ್ದವು. 19ರ ಅನಂತರ ಮಾರುತಗಳು ವೃದ್ಧಿಸಲಿಲ್ಲವಾದರೂ ಸಾಧಾರಣ ಮಳೆ ತಂದಿವೆ. ಸದ್ಯಕ್ಕೆ ಈ ಮಾರುತಗಳು ರಾಜಸ್ಥಾನದ ಬಾರ್ಮರ್‌, ಭಿಲ್ವಾರಾ, ಧೋಲ್‌ಪುರ್‌, ಪಂಜಾಬ್‌ನ ಅಮೃತಸರ, ಉತ್ತರ ಪ್ರದೇಶದ ಅಲೀಗಢ, ಮೀರತ್‌, ಅಂಬಾಲಾ ಪ್ರಾಂತ್ಯದಲ್ಲಿ ಬೀಸುತ್ತಿವೆ. ಮುಂದೆ ಇವು ಬಿಹಾರ, ಉತ್ತರ ಪ್ರದೇಶದ ಪೂರ್ವಭಾಗಕ್ಕೆ ಹರಿಯಲಿವೆ. ಸದ್ಯದ ಪರಿಸ್ಥಿತಿಯಲ್ಲಿ ರಾಜಸ್ಥಾನ-ಉತ್ತರ ಪ್ರದೇಶದಲ್ಲಿ ಬೀಸುತ್ತಿರುವ ಮುಂಗಾರು ಮಾರುತ ಗಳಿಂದಾಗಿ ಭಾರತದ ಮಧ್ಯಭಾಗ ಹಾಗೂ ಇತರ ಕೆಲವು ಪ್ರಾಂತ್ಯಗಳಲ್ಲಿ ಉಷ್ಣ ವಾತಾವರಣ ಕಂಡು ಬಂದಿದೆ. ಸದ್ಯದಲ್ಲೇ ಆ ಭಾಗಗಳಲ್ಲೂ ಮಳೆಯಾಗುವ ಸಾಧ್ಯತೆಯಿದೆ.