ಒಲಿಂಪಿಕ್ಸ್‌ ಉದ್ಘಾಟನೆಗೆ ವಿಐಪಿ ಪ್ರೇಕ್ಷಕರು ಮಾತ್ರ

Team Udayavani, Jul 6, 2021, 11:03 PM IST

ಟೋಕಿಯೊ : ಟೋಕಿಯೊ ಒಲಿಂಪಿಕ್ಸ್‌ ಉದ್ಘಾಟನಾ ಸಮಾರಂಭಕ್ಕೆ ಕೇವಲ ವಿಐಪಿ ಪ್ರೇಕ್ಷಕರಿಗಷ್ಟೇ ಪ್ರವೇಶಾವಕಾಶ ನೀಡಲು ಜಪಾನ್‌ ಸರಕಾರ ಮತ್ತು ಸಂಘಟನಾ ಸಮಿತಿ ನಿರ್ಧರಿಸಿದೆ.

ಈ ಮೊದಲು 10 ಸಾವಿರದಷ್ಟು ವೀಕ್ಷಕರಿಗೆ ಅವಕಾಶ ನೀಡಲು ಯೋಚಿಸಲಾಗಿತ್ತು. ಆದರೆ ಕೊರೊನಾ ಸೋಂಕು ನಿಯಂತ್ರಣಕ್ಕೆ ಬಾರದ ಕಾರಣ ಈ ಸಂಖ್ಯೆಯನ್ನು ಇನ್ನಷ್ಟು ಕಡಿತಗೊಳಿಸಲು ತೀರ್ಮಾನಿಸಿದೆ.

ಬೃಹತ್‌ ಕ್ರೀಡಾಂಗಣದಲ್ಲಿ ನಡೆಯುವ ಕ್ರೀಡಾ ಸ್ಪರ್ಧೆಗಳಿಂದ ಹಾಗೂ ರಾತ್ರಿ 9 ಗಂಟೆಯ ಬಳಿಕ ನಡೆಯುವ ಸ್ಪರ್ಧೆಗಳಿಂದ ವೀಕ್ಷಕರನ್ನು ಸಂಪೂರ್ಣವಾಗಿ ದೂರ ಇರಿಸಲಾಗುವುದು. ಈ ಸ್ಪರ್ಧೆಗಳೆಲ್ಲ ಖಾಲಿ ಸ್ಟೇಡಿಯಂಗಳಲ್ಲಿ ನಡೆಯಲಿವೆ.
ಈಗಾಗಲೇ ವಿದೇಶಿ ವೀಕ್ಷಕರಿಗೆ ಟೋಕಿಯೊ ಒಲಿಂಪಿಕ್ಸ್‌ ಪ್ರವೇಶ ನಿಷೇಧಿಸಲಾಗಿದೆ. ಆಯ್ದ ಸ್ಟೇಡಿಯಂಗಳಲ್ಲಿ ಶೇ. 50ರಷ್ಟು ಮಂದಿಗೆ, ಗರಿಷ್ಠ 10 ಸಾವಿರದ ಮಿತಿಯಲ್ಲಿ ವೀಕ್ಷಕರಿಗೆ ಅವಕಾಶ ನೀಡಲಾಗುವುದು.

ಟೋಕಿಯೊ ಹಾಗೂ ಆಸುಪಾಸಿನ 3 ನಗರಗಳಲ್ಲಿ ಕೊರೊನಾ ತುರ್ತುಸ್ಥಿತಿ ಬಹುತೇಕ ಮುಂದುವರಿಯಲಿದ್ದು, ಗುರುವಾರ ಈ ಬಗ್ಗೆ ನಿರ್ಧಾರಕ್ಕೆ ಬರಲಾಗುವುದು. ಐಒಸಿ ಅಧ್ಯಕ್ಷ ಥಾಮಸ್‌ ಬಾಕ್‌ ಕೂಡ ಅಂದೇ ಜಪಾನ್‌ಗೆ ಆಗಮಿಸಲಿದ್ದಾರೆ.

ಇದನ್ನೂ ಓದಿ : ಕೊಪಾ ಅಮೆರಿಕ ಫುಟ್ ಬಾಲ್‌ : ಫೈನಲ್‌ಗೆ ನೆಗೆದ ಬ್ರಝಿಲ್‌

ಜಯಶಾಲಿಯಾಗಿ ಬನ್ನಿ: ಸಚಿನ್‌ ಶುಭ ಹಾರೈಕೆ
ಮುಂಬಯಿ: ಟೋಕಿಯೊ ಒಲಿಂಪಿಕ್ಸ್‌ಗೆ ತೆರಳುವ ಭಾರತೀಯ ಕ್ರೀಡಾಪಟುಗಳಿಗೆ ಸಚಿನ್‌ ತೆಂಡುಲ್ಕರ್‌ ಶುಭ ಹಾರೈಸಿದ್ದಾರೆ.
“ಟೋಕಿಯೊಗೆ ತೆರಳುವ ಕ್ರೀಡಾಪಟುಗಳ ಜೀವನವೆಲ್ಲ ಕಷ್ಟಕರವಾಗಿದ್ದರೂ ದೇಶವನ್ನು ಪ್ರತಿನಿಧಿಸುವಾಗ ಈ ಎಲ್ಲ ಕಷ್ಟ ಮರೆತು ಹೋಗುತ್ತದೆ.
ತ್ರಿವರ್ಣ ಧ್ವಜದಡಿಯಲ್ಲಿ ದೇಶವನ್ನು ಪ್ರತಿನಿಧಿಸುವ ಅವಕಾಶ ಎಲ್ಲರಿಗೂ ಸಿಗುವುದಿಲ್ಲ. ಈ ಅವಕಾಶ ನಿಮಗೆ ಸಿಕ್ಕಿದೆ. ಇಡೀ ದೇಶದ ಜನತೆ ನಿಮ್ಮ ಬೆಂಬಲಕ್ಕೆ ನಿಲ್ಲಲಿದೆ. ಧೈರ್ಯವಾಗಿ ಮುನ್ನುಗ್ಗಿ, ಜಯಶಾಲಿಯಾಗಿ ಬನ್ನಿ…’ ಎಂದು ಸಚಿನ್‌ ಹಾರೈಸಿದ್ದಾರೆ.