ಕುಂದ್ರಾ ವಿರುದ್ಧ ಆರೋಪ ಮಾಡಿದ್ದ ಶೋನಾಗೆ ಬರ್ತಿವೆಯಂತೆ ಬೆದರಿಕೆ ಕರೆಗಳು

Team Udayavani, Jul 23, 2021, 4:09 PM IST

ಮುಂಬೈ : ಬಂಧನದಲ್ಲಿರುವ ಉದ್ಯಮಿ ರಾಜ್ ಕುಂದ್ರಾ ವಿರುದ್ಧ ಆರೋಪ ಮಾಡಿದ್ದ ಮಾಡೆಲ್ ಸಾಗರಿಕಾ ಶೋನಾ ಸುಮನ್ ಅವರಿಗೆ ಇದೀಗ ಬೆದರಿಕೆ ಕರೆಗಳು ಬರುತ್ತಿವೆಯಂತೆ.

ಈ ಬಗ್ಗೆ ಇಂದು (ಜು.23) ಹೇಳಿಕೊಂಡಿರುವ ಸುಮನ್ ”ಪದೇ ಪದೇ ಕೊಲೆ ಬೆದರಿಕೆ ಕರೆಗಳು ಬರುತ್ತಿರುವುದರಿಂದ ಖಿನ್ನತೆಗೆ ಒಳಗಾಗಿದ್ದೇನೆ. ಮೆಸೆಂಜರ್ ಹಾಗೂ ವಾಟ್ಸ್ ಆಪ್ ಮೂಲಕ ಬೆದರಿಕೆ, ನಿಂದನೀಯ ಹಾಗೂ ಅಶ್ಲೀಲ ಕರೆಗಳು ನನಗೆ ಬರುತ್ತಿವೆ. ಇದರಿಂದ ನನಗೆ ತುಂಬಾ ತೊಂದರೆ ಆಗುತ್ತಿದೆ. ಪದೇ ಪದೇ ಕೊಲೆ ಬೆದರಿಕೆ ಕರೆಗಳು ಬರುತ್ತಿವೆ. ಅತ್ಯಾಚಾರದ ಬೆದರಿಕೆ ಕೂಡ ಹಾಕುತ್ತಿದ್ದಾರೆ. ಇದರಿಂದ ನಾನು ಖಿನ್ನತೆಗೆ ಒಳಗಾಗಿದ್ದೇನೆ. ಬೇರೆ ಬೇರೆ ನಂಬರ್‌ಗಳಿಂದ ಫೋನ್ ಮಾಡಿ ಹಿಂಸೆ ಕೊಡುತ್ತಿದ್ದಾರೆ” ಎಂದು ತಿಳಿಸಿದ್ದಾರೆ.

ಇನ್ನು ನೀಲಿ ಚಿತ್ರಗಳ ನಿರ್ಮಾಣದ ಆರೋಪದಡಿ ಬಾಲಿವುಡ್ ನಟಿ ಶಿಲ್ಪಾ ಶೆಟ್ಟಿ ಪತಿ ರಾಜ್ ಕುಂದ್ರಾ ಅವರನ್ನು ಮುಂಬೈ ಪೊಲೀಸರು ಬಂಧಿಸಿದ್ದಾರೆ. ಈತನ ಬಂಧನದ ತರುವಾಯ ಅನೇಕ ನಟಿಯರು-ಮಾಡೆಲ್ ಗಳು ಕುಂದ್ರಾ ಅವರಿಂದ ತಾವು ಎದುರಿಸಿದ್ದ ಕಿರುಕುಳದ ಬಗ್ಗೆ ಹೇಳಿಕೊಳ್ಳುತ್ತಿದ್ದಾರೆ.

ಸಾಗರಿಕಾ ಶೋನಾ ಸುಮನ್‌ ಕೂಡ ತಾವು ಎದುರಿಸಿದ್ದ ಕಿರುಕುಳವನ್ನು ಹೊರ ಹಾಕಿದ್ದು, ನನಗೆ ಬೆತ್ತಲೆ ಆಡಿಷನ್ ನೀಡುವಂತೆ ರಾಜ್ ಕುಂದ್ರಾ ಹೇಳಿದ್ದರು ಎಂದು ಆರೋಪ ಮಾಡಿದ್ದರು.