ಗುಂಡೇಟು ತಿಂದ ಬಾಕ್ಸರ್‌ಗೆ ಒಲಿಂಪಿಕ್ಸ್‌ ನಲ್ಲಿ ಸತತ 2ನೇ ಚಿನ್ನ!

Team Udayavani, Aug 7, 2021, 8:00 AM IST

ಟೋಕಿಯೊ: ದರೋಡೆಕೋರರಿಂದ ಗುಂಡಿನ ದಾಳಿಗೆ ಒಳಗಾಗಿದ್ದ ಬಾಕ್ಸರ್‌ ಓರ್ವ ಒಲಿಂಪಿಕ್ಸ್‌ ನಲ್ಲಿ ಸತತ ಎರಡನೇ ಚಿನ್ನದ ಪದಕ ಗೆದ್ದ ಅಮೋಘ ಸಾಹಸವಿದು. ಈ ಸಾಧಕನೇ ಕ್ಯೂಬಾದ ಜೂಲಿಯೊ ಲಾ ಕ್ರೂಜ್‌. ಟೋಕಿಯೊ ಹೆವಿವೇಟ್‌ ಬಾಕ್ಸಿಂಗ್‌ ವಿಭಾಗದಲ್ಲಿ ಅಗ್ರಸ್ಥಾನ ಗಳಿಸಿ ಮೆರೆದಿದ್ದಾರೆ.

31 ವರ್ಷದ ಲಾ ಕ್ರೂಜ್‌ ಶುಕ್ರವಾರ ನಡೆದ ಹೆವಿವೇಟ್‌ ವಿಭಾಗದ ಫೈನಲ್‌ ಕಾದಾಟದಲ್ಲಿ 5-0 ಅಂತರದಿಂದ ರಶ್ಯದ ಮುಸ್ಲಿಮ್‌ ಗಾಜಿಮಗೊಡೇವ್‌ ಅವರನ್ನು ಪರಾಭವಗೊಳಿಸಿದರು.

ಸಾವು ಗೆದ್ದ ವೀರ
2014ರಲ್ಲಿ ಸಶಸ್ತ್ರ ದರೋಡೆಕೋರರು ಲಾ ಕ್ರೂಜ್‌ ಮೇಲೆ ಗುಂಡಿನ ದಾಳಿ ನಡೆಸಿದ್ದರು. ಅವರ ದೇಹದ ಹಿಂಭಾಗಕ್ಕೆ ಗುಂಡು ತಾಗಿದರೂ ಅದೃಷ್ಟವಶಾತ್‌ ಪ್ರಾಣಾಪಾಯದಿಂದ ಪಾರಾಗಿದ್ದರು. ಈ ಘಟನೆ ನಡೆದ ಎರಡು ವರ್ಷಗಳ ಬಳಿಕ ರಿಯೋ ಒಲಿಂಪಿಕ್ಸ್‌ ನಲ್ಲಿ ಅವರಿಗೆ ಚಿನ್ನದ ಪದಕ ಒಲಿದಿತ್ತು. ಇದೀಗ ಮತ್ತೆ ಟೋಕಿಯೋದಲ್ಲೂ ಚಿನ್ನ ಗೆದಿದ್ದಾರೆ.

“ಅಂದಿನ ಘಟನೆಯ ಆಘಾತದಿಂದ ಬೇಗನೆ ಹೊರಬರಲು ಸಾಧ್ಯವಾಗಿರಲಿಲ್ಲ. ಅದು ಅತ್ಯಂತ ಕಷ್ಟದ ಸಮಯವಾಗಿತ್ತು. ಆದರೆ ನಾನು ವಿಶ್ವಾಸ ಕಳೆದುಕೊಳ್ಳಲಿಲ್ಲ. ನನ್ನ ಈ ಸಾಧನೆಗೆ ಅಂದು ವೈದ್ಯರು ನೀಡಿದ ಶ್ರೇಷ್ಠ ಚಿಕಿತ್ಸೆಯೇ ಮುಖ್ಯಕಾರಣ’ ಎಂದು ನಾಲ್ಕು ಬಾರಿಯ ವಿಶ್ವ ಚಾಂಪಿಯನ್‌ ಕೂಡ ಆಗಿರುವ ಕ್ರೂಜ್‌ ನುಡಿದರು.