ಸಿದ್ಧಿ ಮಂದಿ ಜೊತೆ ಸಲಗ ಸಂಭ್ರಮ

Team Udayavani, Aug 17, 2021, 2:57 PM IST

“ಸಲಗ’ ಚಿತ್ರದ ಪ್ರಮೋಶನಲ್‌ ಸಾಂಗ್‌ ಹಿಟ್‌ಲಿಸ್ಟ್‌ಗೆ ಸೇರಿರೋದು ನಿಮಗೆ ಗೊತ್ತೇ ಇದೆ. ಸಿದ್ಧಿ ಜನಾಂಗದವರ ಹಾಡನ್ನು, “ಸಲಗ’ ತಂಡ ಅವರಿಂದಲೇ ಹಾಡಿಸಿ, ಆ ಹಾಡಿನಲ್ಲಿ ಅವರೇ ಕಾಣಿಸಿಕೊಂಡಿದ್ದರು. ಈಗ ಚಿತ್ರತಂಡ ಹಾಡು ಹಿಟ್‌ ಆದ ಖುಷಿಯಲ್ಲಿ ಅವರನ್ನೆಲ್ಲಾಕರೆಸಿ, ಖುಷಿ ಹಂಚಿಕೊಂಡು ಅವರಿಗೆ ಥ್ಯಾಂಕ್ಸ್‌ ಹೇಳಿದೆ.

ನಗರದ ಶೆರಟಾನ್‌ ಹೋಟೆಲ್‌ನಲ್ಲಿ ನಡೆದ ಈ ಕಾರ್ಯಕ್ರಮದಲ್ಲಿ ಹಾಡಿನಲ್ಲಿ ಕಾಣಿಸಿಕೊಂಡ ಸಿದ್ಧಿ ಜನಾಂಗದವರು ಭಾಗವಹಿಸಿ, ತಮ್ಮ ಖುಷಿ ಹಂಚಿಕೊಂಡರು.

“ಬೆಂಗಳೂರ್‌ ಸಾಹುಕಾರ್‌ ಮಾಲೀಕ್‌ ಮುಜೆ ಅಂದರ್‌ ಬುಲಾಯ… ದರ್ವಾಜ ಲಗಾಯಾ.. ಅಂದರ್‌ ಮಂಜೋಕೋಕೋ.. ಟಿಣಿಂಗ ಮಿಣಿಂಗ ಟಿಶ್ಯಾ….’ ಎಂದು ಆರಂಭವಾಗುವ ಈ ಹಾಡು ತಣ್ಣನೆಯ ಕಿಕ್ಕೇರಿಸುತ್ತಿದೆ. ಈ ಹಾಡಿನ ಮತ್ತೂಂದು ವಿಶೇಷವೆಂದರೆ ಸಿದ್ಧಿ ಜನಾಂಗದವರನ್ನೇ ಈ ಹಾಡಿನಲ್ಲಿ ಬಳಸಿಕೊಳ್ಳಲಾಗಿದೆ.

ಇದನ್ನೂ ಓದಿ:ಶಿವಣ್ಣನ ‘ನೀ ಸಿಗುವರೆಗೂ’ ಚಿತ್ರಕ್ಕೆ ಸುದೀಪ್ ಕ್ಲ್ಯಾಪ್

ಅಂದಹಾಗೆ, ಈ ಹಾಡು ಕೂಡಾ ಸಿದ್ಧಿ ಜನಾಂಗದವರಿಂದಲೇ ಹುಟ್ಟಿಕೊಂಡಿದೆ ಎನ್ನಬಹುದು. ಚಿತ್ರೀಕರಣ ಮುಗಿಸಿ ದುನಿಯಾ ವಿಜಯ್‌ ಯಲ್ಲಾಪುರಕ್ಕೆ ಹೋಗಿದ್ದರಂತೆ. ಆ ವೇಳೆ ಸಿದ್ಧಿ ಜನಾಂಗದ ಮನೆಯೊಂದರಲ್ಲಿ ಈ ಹಾಡನ್ನು ಹಾಡುತ್ತಿದ್ದರಂತೆ. ಆಗಲೇ ಈ ಹಾಡನ್ನು ರೆಕಾರ್ಡ್‌ ಮಾಡಿಕೊಂಡು ಬಂದು ಸಂಗೀತ ನಿರ್ದೇಶಕ ಚರಣ್‌ ರಾಜ್‌ ಅವರಿಗೆ ನೀಡಿದರಂತೆ ವಿಜಿ. ಚರಣ್‌ ಅದಕ್ಕೆ ಸಿನಿಮಾ ಟಚ್‌ ಕೊಟ್ಟು, ವಿಭಿನ್ನವಾಗಿ ಕಟ್ಟಿಕೊಟ್ಟಿದ್ದಾರೆ.

ಅದನ್ನು ಚಿತ್ರತಂಡ ಈಗ ಪ್ರಮೋಶನಲ್‌ ಸಾಂಗ್‌ ಆಗಿ ಬಿಟ್ಟಿದ್ದು, ಸಖತ್‌ ವೈರಲ್‌ ಆಗಿದೆ. ಹಾಡನ್ನು ಗಿರಿಜಾ ಸಿದ್ಧಿ, ಗೀತಾ ಸಿದ್ಧಿ ಹಾಗೂ ಚನ್ನಕೇಶವ ಅವರು ಹಾಡಿದ್ದಾರೆ. ವಿಜಯ್‌, ನಟನೆ, ನಿರ್ದೇಶನದ ಈ ಚಿತ್ರವನ್ನುಕೆ.ಪಿ.ಶ್ರೀಕಾಂತ್‌ ನಿರ್ಮಿಸಿದ್ದಾರೆ.