3.86 ಕೋಟಿ ಮಂದಿಗೆ ಸಿಕ್ಕಿಲ್ಲ 2ನೇ ಡೋಸ್‌ ಲಸಿಕೆ

Team Udayavani, Aug 20, 2021, 6:50 AM IST

ಹೊಸದಿಲ್ಲಿ: ದೇಶದಲ್ಲಿ ನಿಗದಿತ ಅವಧಿಯಲ್ಲಿ 3.86 ಕೋಟಿ ಮಂದಿಗೆ 2ನೇ ಡೋಸ್‌ನ ಲಸಿಕೆ ಸಿಕ್ಕಿಲ್ಲ ಎಂದು ಕೇಂದ್ರ ಸರಕಾರ ತಿಳಿಸಿದೆ.

ಮಾಹಿತಿ ಹಕ್ಕು ಕಾಯ್ದೆಯ ಅಡಿ ರಮಣ್‌ ಶರ್ಮಾ ಎಂಬವರು ಕೇಳಿದ್ದ ಪ್ರಶ್ನೆಗೆ ಈ ಉತ್ತರ ಸಿಕ್ಕಿದೆ. ಮೊದಲ ಡೋಸ್‌ ಪಡೆದ ಬಳಿಕ 84-112 ದಿನಗಳ ಒಳಗಾಗಿ 2ನೇ ಡೋಸ್‌ ಪಡೆಯಲು ಶಿಫಾರಸು ಮಾಡಲಾಗಿತ್ತು. ಕೊವ್ಯಾಕ್ಸಿನ್‌ ಆದರೆ, 28-42 ದಿನಗಳು ಎಂದು ನಿಗದಿಪಡಿಸಲಾಗಿದೆ. ಆ.17ಕ್ಕೆ ಮುಕ್ತಾ ಯವಾಗಿರುವಂತೆ 3,40,72,993 ಮಂದಿಗೆ 2ನೇ ಡೋಸ್‌ ಸಿಕ್ಕಿಲ್ಲ. ಕೊವ್ಯಾಕ್ಸಿನ್‌ ಅನ್ನು ಮೊದಲ ಡೋಸ್‌ನಲ್ಲಿ ಪಡೆದು, ಎರಡನೇ ಡೋಸ್‌ಗಾಗಿ ಕಾಯುತ್ತಿರುವವರ ಸಂಖ್ಯೆ 46,78,406 ಎಂದು ಸರಕಾರ ಮಾಹಿತಿ ನೀಡಿದೆ.

36, 401 ಹೊಸ ಕೇಸು :

ಬುಧವಾರದಿಂದ ಗುರುವಾರದ ಅವಧಿಯಲ್ಲಿ ದೇಶದಲ್ಲಿ 36,401 ಹೊಸ ಸೋಂಕು ಪ್ರಕರಣಗಳು ದೃಢ ಪಟ್ಟಿವೆ. ಇದೇ ಅವಧಿಯಲ್ಲಿ 530 ಮಂದಿ ಸೋಂಕಿನಿಂದಾಗಿ ಅಸುನೀಗಿದ್ದಾರೆ. ರಾಷ್ಟ್ರೀಯ ಸರಾಸರಿ ಚೇತರಿಕೆ ಪ್ರಮಾಣ ಶೇ.97.52. ಸಕ್ರಿಯ ಸೋಂಕು ಪ್ರಕರಣಗಳ ಸಂಖ್ಯೆ 3,64,129ಕ್ಕೆ ಇಳಿಕೆಯಾಗಿದೆ.