“ಪ್ರಕೃತಿಯನ್ನು ಪೂಜಿಸುವ ಹಬ್ಬ ನಾಗರ ಪಂಚಮಿ’

Team Udayavani, Aug 20, 2021, 2:22 PM IST

ಮುಂಬಯಿ: ಹುತ್ತದ ಮೂಲಕ ಎಚ್ಚರಿಸಿ, ಬಂಜರು ಭೂಮಿಯನ್ನು ಫಲವತ್ತಾಗಿಸಿ, ಹಸುರು ಕ್ರಾಂತಿಯ ಮೂಲಕ ಬಡತನ ನೀಗಿಸಿ ಎಂದು ಸಂದೇಶ ನೀಡುವ ನಾಗ ಕೃಷಿಯ ಆರಾಧಕ. ನಾಗಬನಗಳ ಮೂಲಕ ಅರಣ್ಯ ಸಂರಕ್ಷಿಸಿ, ನೊಗ ಹೋದಲ್ಲಿ ನಾಗಬೀದಿ ಇರದು ಎಂಬ ಅಭಯದಲ್ಲಿ ರೈತರನ್ನು ಕಾಪಾಡುವ ಕಣ್ಣಿಗೆ ಕಾಣುವ ದೇವರು. ನಾಗರ ಪಂಚಮಿ ಪ್ರಕೃತಿಯನ್ನು ಪೂಜಿಸುವ ಹಬ್ಬವಾಗಿದೆ ಎಂದು ಮೀರಾರೋಡ್‌ ಪಲಿಮಾರು ಮಠದ ಟ್ರಸ್ಟಿ ಸಚ್ಚಿದಾನಂದ ರಾವ್‌ ತಿಳಿಸಿದರು.

ಮೀರಾರೋಡ್‌ ಪೂರ್ವದ ಪಲಿಮಾರು ಮಠದ ಶ್ರೀ ಬಾಲಾಜಿ ಸನ್ನಿಧಿಯಲ್ಲಿ ಆ. 13ರಂದು ನಾಗರಪಂಚಮಿಯ ವೈದಿಕ ಪೂಜಾ ಕೈಂಕರ್ಯಗಳಿಗೆ ಚಾಲನೆ ನೀಡಿ ಮಾತನಾಡಿದ ಅವರು, ಭಾರತೀಯ ಪರಂಪರೆಯಲ್ಲಿ ವಿಶಿಷ್ಟವಾದ ಹಬ್ಬವಾಗಿರುವ ನಾಗರ ಪಂಚಮಿ ಇಂದಿಗೂ ಸಾತ್ವಿಕತೆ, ಸಂಸ್ಕೃತಿ, ಸಂಸ್ಕಾರವನ್ನು ಉಳಿಸಿಕೊಂಡಿದೆ. ಧಾರ್ಮಿಕ ಆಚರಣೆಗಳನ್ನು ತಥಾಸ್ಥಿತಿಯಲ್ಲಿ ಮುಂದಿನ ಜನಾಂಗಕ್ಕೆ ಹಸ್ತಾಂತರ ಮಾಡೋಣ ಎಂದರು.

ಇದನ್ನೂ ಓದಿ:ಹಿರಿಯ ಪತ್ರಕರ್ತ ಸಿ.ಎಸ್.ದ್ವಾರಕಾನಾಥ್ ಕಾಂಗ್ರೆಸ್ ಗೆ ಸೇರ್ಪಡೆ

ಮಠದ ಟ್ರಸ್ಟಿ ಮತ್ತು ಪ್ರಬಂಧಕ ವಿದ್ವಾನ್‌ ವಾಸುದೇವ ಎಸ್‌. ಉಪಾಧ್ಯಾಯ ಮಾತ ನಾಡಿ, ಪಲಿಮಾರು ಮಠದ ಶ್ರೀ ವಿದ್ಯಾಧೀಶ ತೀರ್ಥ ಶ್ರೀಪಾದರ ಇಚ್ಛೆ, ಸಂಕಲ್ಪ ಹಾಗೂ ಮಾರ್ಗ ದರ್ಶನದಂತೆ ಇಂದಿನ ಎಲ್ಲ ಕಾರ್ಯಕ್ರಮಗಳು ಸಾಮಾಜಿಕ ಅಂತರ ಹಾಗೂ ಸರಕಾರದ ಕೋವಿಡ್‌ ನಿಯಮದಂತೆ ಸರಳವಾಗಿ ನಡೆದಿದೆ ಎಂದು ಹೇಳಿ, ಸಮಸ್ತ ಜನರಿಗೆ ಶುಭ ಹಾರೈಸಿದರು.

ವಿದ್ವಾನ್‌ ವಾಸುದೇವ ಎಸ್‌. ಉಪಾಧ್ಯಾಯ, ಗೋಪಾಲ ಭಟ್‌, ಭಕ್ರೆ ಸಂತೋಷ ಭಟ್‌, ಕುಮಾರಸ್ವಾಮಿ ಭಟ್‌, ಪ್ರಶಾಂತ್‌ ಭಟ್‌, ಕೃಷ್ಣಮೂರ್ತಿ ಉಪಾಧ್ಯಾಯ ಅವರ ಪೌರೋಹಿತ್ಯದಲ್ಲಿ ಧಾರ್ಮಿಕ ಕಾರ್ಯಕ್ರಮವಾಗಿ ಬೆಳಗ್ಗೆ ಪುಣ್ಯಾಹವಾಚನ, ನವಕ ಕಲಶ ಪ್ರತಿಷ್ಠಾಪನೆ, ಸಾಮೂಹಿಕ ಆಶ್ಲೇಷಾ ಬಲಿ, ಕ್ಷೀರಾಭಿಷೇಕ, ಪಂಚಾಮೃತ ಸೀಯಾಳ ಅಭಿಷೇಕ, ಸನ್ನಿಧಿಯ ಪ್ರಧಾನ ಶ್ರೀನಿವಾಸ ದೇವರಿಗೆ ವಿಶೇಷ ಪೂಜೆ, ಶ್ರೀ ಬಾಲಾಜಿ ಸನ್ನಿಧಿ ಭಜನ ಮಂಡಳಿಯ ಸದಸ್ಯರಿಂದ ಭಜನ ಕಾರ್ಯಕ್ರಮ ನೆರವೇರಿತು. ಕರಮಚಂದ ಗೌಡ, ರಾಮಚಂದ್ರ ಹಿಪ್ಪರಗಿ ಮೊದಲಾದವರು ಸಹಕರಿಸಿದರು.

ಚಿತ್ರ-ವರದಿ : ರಮೇಶ್‌ ಅಮೀನ್‌