ಯುಎಸ್‌ ಗ್ರ್ಯಾನ್‌ ಸ್ಲ್ಯಾಮ್‌ ನಿಂದ ಹಿಂದೆ ಸರಿದ ಸೆರೆನಾ

Team Udayavani, Aug 25, 2021, 9:15 PM IST

ನ್ಯೂಯಾರ್ಕ್‌: ಅಮೆರಿಕದ ಸೆರೆನಾ ವಿಲಿಯಮ್ಸ್‌ ತವರಿನ ಯುಎಸ್‌ ಓಪನ್‌ ಗ್ರ್ಯಾನ್‌ಸ್ಲ್ಯಾಮ್‌ ಪಂದ್ಯಾವಳಿಯಿಂದ ಹೊರಗುಳಿಯಲಿದ್ದಾರೆ.

ಬಲಗಾಲಿನ ಮಂಡಿಯ ಸ್ನಾಯು ಸೆಳೆತದಿಂದಾಗಿ ಈ ನಿರ್ಧಾರಕ್ಕೆ ಬಂದಿರುವುದಾಗಿ ಅವರು ಟ್ವೀಟ್‌ ಮಾಡಿದ್ದಾರೆ. ಸೆರೆನಾ ಅವರ ಈ ನಿರ್ಧಾರ ತವರಿನ ಟೆನಿಸ್‌ ಅಭಿಮಾನಿಗಳಿಗೆ ಬೇಸರ ಮೂಡಿಸಿದೆ. ಈಗಾಗಲೇ ರೋಜರ್‌ ಫೆಡರರ್‌, ರಫಾಯೆಲ್‌ ನಡಾಲ್‌ ಕೂಡ ವರ್ಷಾಂತ್ಯದ ಈ ಕೂಟದಿಂದ ದೂರ ಸರಿದಿದ್ದು, ಕೂಟದ ಆಕರ್ಷಣೆ ಅಷ್ಟರಮಟ್ಟಿಗೆ ಕಡಿಮೆ ಆಗಲಿದೆ.

ಮುಂದಿನ ತಿಂಗಳು 40ನೇ ವರ್ಷಕ್ಕೆ ಕಾಲಿಡಲಿರುವ ಸೆರೆನಾ ವಿಲಿಯಮ್ಸ್‌ಗೆ ಕಳೆದ ವಿಂಬಲ್ಡನ್‌ ಟೂರ್ನಿಯ ವೇಳೆಯೇ ಈ ಸಮಸ್ಯೆ ತಲೆದೋರಿತ್ತು. 23 ಗ್ರ್ಯಾನ್‌ಸ್ಲ್ಯಾಮ್‌ ಗೆದ್ದಿರುವ ಸೆರೆನಾ, ಇನ್ನೊಂದು ಪ್ರಶಸ್ತಿ ಜಯಿಸಿದರೆ ಮಾರ್ಗರೆಟ್‌ ಕೋರ್ಟ್‌ ಅವರ ಸಾರ್ವಕಾಲಿಕ 24 ಗ್ರ್ಯಾನ್‌ಸ್ಲ್ಯಾಮ್‌ಗಳ ದಾಖಲೆಯನ್ನು ಸರಿದೂಗಿಸುತ್ತಿದ್ದರು. ಗುರುವಾರ ಯುಎಸ್‌ ಓಪನ್‌ ಡ್ರಾ ನಡೆಯಲಿದ್ದು, ಆ. 30ರಂದು ಪಂದ್ಯಾವಳಿ ಆರಂಭವಾಗಲಿದೆ.