ಕಾಡಿನ ನಡುವೆ ಅವಲಕ್ಕಿ ಪವಲಕ್ಕಿ

Team Udayavani, Aug 27, 2021, 4:55 PM IST

ಅವಲಕ್ಕಿ ಪವಲಕ್ಕಿ’- ಹೀಗೊಂದು ಸಿನಿಮಾ ಸದ್ದಿಲ್ಲದೇ ಆರಂಭಗೊಂಡಿದ್ದು, ಇತ್ತೀಚೆಗೆ ಚಿತ್ರದ ಟ್ರೇಲರ್‌ ಬಿಡುಗಡೆಯಾಗಿದೆ. ರಂಜಿತಾ ಸುಬ್ರಹ್ಮಣ್ಯ ಈ ಚಿತ್ರದ ನಿರ್ಮಾಪಕರು. ದುರ್ಗಾ ಪ್ರಸಾದ್‌ ಈ ಚಿತ್ರದ ನಿರ್ದೇಶಕರು.

ಚಿತ್ರದ ಬಗ್ಗೆ ಮಾತನಾಡುವ ಅವರು, “ಈ ಚಿತ್ರದಕಥೆ ಮಕ್ಕಳ ಮೇಲೆ ಹೆಣೆಯಲಾಗಿದರೂ, ಇದು ಪೂರ್ತಿ ಮಕ್ಕಳ ಚಿತ್ರವಲ್ಲ. ನಮ್ಮ ಚಿತ್ರ ಈಗಾಗಲೇ ಅನೇಕ ಅಂತರರಾಷ್ಟ್ರೀಯ ಹಾಗೂ ರಾಷ್ಟ್ರೀಯ ಚಲನಚಿತ್ರೋತ್ಸವಗಳಲ್ಲಿ ಪ್ರದರ್ಶನವಾಗಿದೆ ಹಾಗೂ ಪ್ರಶಸ್ತಿಗಳನ್ನು ಗೆದ್ದುಕೊಂಡಿದೆ. ಸದ್ಯದಲ್ಲೇ ಬಿಡುಗಡೆಯಾಗಲಿದೆ’ ಎಂದು ಚಿತ್ರದ ವಿವರ ನೀಡಿದರು ದುರ್ಗಾ ಪ್ರಸಾದ್‌.

ಚಿತ್ರವನ್ನು ನಿರ್ಮಿಸಿದ ರಂಜಿತಾ ಅವರಿಗೆ ಚಿತ್ರದಕಥೆ ವಿಭಿನ್ನ ಎನಿಸಿದ್ದರಿಂದ ನಿರ್ಮಿಸಿದರಂತೆ. “ಹೆಬ್ರಿ ಕಾಡಿನಲ್ಲಿ ಇಪ್ಪತ್ತು ದಿನಗಳ ಚಿತ್ರೀಕರಣ ಮಾಡಿದ ಅನುಭವ ಮರೆಯಲು ಸಾಧ್ಯವೇ ಇಲ್ಲ’ ಎನ್ನುವುದು ಅವರ ಮಾತು.

ಸಂಗೀತ ನಿರ್ದೇಶಕ ಜುಬಿನ್‌ ಪಾಲ್‌ ಚಿತ್ರದ ಹಾಡುಗಳ ಬಗ್ಗೆ ವಿವರಣೆ ನೀಡಿದರು. ಚಿತ್ರದಲ್ಲಿ ಇಂದಿರಾ ನಾಯರ್‌, ರಾಘವೇಂದ್ರ, ಸಿಂಚನಾ, ಪ್ರವೀಣ್‌, ಪ್ರಿಯಾ ಶಂಕರ್‌, ಉದಯಕುಮಾರ್‌, ನಾಗರಾಜ್‌ ಭಂಡಾರಿ ನಟಿಸಿದ್ದಾರೆ.