ನಾಪತ್ತೆಯಾಗಿದ್ದ ನಾಲ್ವರು ಸೈನಿಕರು ಶವವಾಗಿ ಪತ್ತೆ ,ಉಳಿದವರ ರಕ್ಷಣೆ

Team Udayavani, Oct 3, 2021, 2:24 PM IST

ಚಮೋಲಿ : ಉತ್ತರಾಖಂಡದ ತ್ರಿಶೂಲ್ ಬೇಸ್ ಕ್ಯಾಂಪ್ ನಿಂದ ನಾಪತ್ತೆಯಾಗಿದ್ದ ಸೈನಿಕರ ತಂಡದ ನಾಲ್ವರು ಯೋಧರು ಭಾನುವಾರ ಶವವಾಗಿ ಪತ್ತೆಯಾಗಿದ್ದಾರೆ .

ಭಾರತೀಯ ಸೇನೆ ಹೆಲಿಕ್ಯಾಪ್ಟರ್ ಮೂಲಕ ಕಾರ್ಯಾಚರಣೆ ನಡೆಸಿ ಸುಟೊಲ್ ಎಂಬ ಹಳ್ಳಿಯಲ್ಲಿ ಘರ್ವಾಲ್ ಸ್ಕೌಟ್ ಪಡೆಗೆ ಸೇರಿದ ನಾಲ್ವರು ಯೋಧರ ಮೃತ ದೇಹಗಳನ್ನು ಪತ್ತೆ ಹಚ್ಚಿ ಜೋಷಿಮಠದಲ್ಲಿರುವ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ತಂದಿದ್ದು, ಮರಣೋತ್ತರ ಪರೀಕ್ಷೆ ನಡೆಸಲಾಗುತ್ತಿದೆ. ಎಸ್ ಡಿ ಆರ್ ಎಫ್ ಪಡೆಗಳೂ ಯೋಧರ ಕಾರ್ಯಾಚರಣೆಯಲ್ಲಿ ಕೈಜೋಡಿಸಿದ್ದವು.

ಟ್ರೆಕ್ಕಿಂಗ್ ಗೆ ತೆರಳಿದ್ದ ನೌಕಾ ಪಡೆಯ 20 ಯೋಧರ ಪೈಕಿ 10 ಮಂದಿ ಶುಕ್ರವಾರ ಹಿಮಪಾತಕ್ಕೆ ಸಿಲುಕಿಕೊಂಡು ನಾಪತ್ತೆಯಾಗಿದ್ದರು. ನಾಪತ್ತೆಯಾದ ವಿಚಾರ ತಿಳಿದ ತಕ್ಷಣ ರಕ್ಷಣಾ ಕಾರ್ಯ ಕೈಗೊಳ್ಳಲಾಗಿತ್ತು

ಹುತಾತ್ಮ ಯೋಧರು ಲೆಫ್ಟಿನೆಂಟ್ ಕಮಾಂಡರ್ ರಜನೀಕಾಂತ್ ಯಾದವ್, ಲೆಫ್ಟಿನೆಂಟ್ ಕಮಾಂಡರ್ ಯೋಗೇಶ್ ತಿವಾರಿ,ಲೆಫ್ಟಿನೆಂಟ್ ಕಮಾಂಡರ್ ಅನಂತ್ ಕೂಕ್ರೆಟಿ ಮತ್ತು ಲೆಫ್ಟಿನೆಂಟ್ ಕಮಾಂಡರ್ ಹರಿ ಓಂ ಎಂದು ತಿಳಿದು ಬಂದಿದೆ.

ಸೆಪ್ಟೆಂಬರ್ ತಿಂಗಳಿನಲ್ಲಿ ಇದೆ ಪ್ರದೇಶದಲ್ಲಿ ಟ್ರೆಕ್ಕಿಂಗ್ ಗೆ ತೆರಳಿದ್ದ ಜರ್ಮನ್ ಪ್ರವಾಸಿಗನೊಬ್ಬ ನಾಪತ್ತೆಯಾಗಿದ್ದ.