ಫೇಸ್‌ಬುಕ್‌, ವಾಟ್ಸ್‌ಆ್ಯಪ್‌ ,ಇನ್‌ಸ್ಟಾಗ್ರಾಂ ಸ್ಥಗಿತದಿಂದ  ಟೆಲಿಗ್ರಾಂಗೆ ಲಾಭ

Team Udayavani, Oct 6, 2021, 9:00 PM IST

Telegram gains from Facebook, WhatsApp, Instagram shutdown

ನವದೆಹಲಿ: ಅ.3ರ ರಾತ್ರಿ 9 ಗಂಟೆಯಿಂದ ಫೇಸ್‌ಬುಕ್‌, ವಾಟ್ಸ್‌ಆ್ಯಪ್‌ ಹಾಗೂ ಇನ್‌ಸ್ಟಾಗ್ರಾಂ ಸಾಮಾಜಿಕ ಜಾಲತಾಣಗಳು ಜಗತ್ತಿನಾದ್ಯಂತ ನಿಷ್ಕ್ರಿಯವಾಗಿ, ಅಂದು ಮಧ್ಯರಾತ್ರಿ ಸುಮಾರು 2:30 ಸುಮಾರಿಗೆ ಪುನಃ ಚಾಲನೆಗೊಂಡಿದ್ದವು. ಇದಕ್ಕೆ ಡಿಎನ್‌ಎಸ್‌ ಸರ್ವರ್‌ನಲ್ಲಿ ಕಾಣಿಸಿಕೊಂಡ ತಾಂತ್ರಿಕ ಸಮಸ್ಯೆ ಕಾರಣವಾಗಿತ್ತು. ಆದರೆ, ಈ ಅವಧಿಯಲ್ಲಿ ಮತ್ತೂಂದು ಸಾಮಾಜಿಕ ಜಾಲತಾಣ ಟೆಲಿಗ್ರಾಂಗೆ 7 ಕೋಟಿ ಹೊಸ ಗ್ರಾಹಕರು ಸೇರ್ಪಡೆಗೊಂಡಿದ್ದಾರೆ!.

ಮೂರು ಪ್ರಮುಖ ಜಾಲತಾಣಗಳು ನಿಷ್ಕ್ರಿಯವಾದಾಗ ಟೆಲಿಗ್ರಾಂ ಕಾರ್ಯನಿರ್ವಹಿಸುತ್ತಿತ್ತು. ಅಲ್ಲದೆ, ಟೆಲಿಗ್ರಾಂ ವಾಟ್ಸ್‌ಆ್ಯಪ್‌ಗೆ ಸರಿಸಮಾನವಾಗಿದ್ದರಿಂದ ವಿಶ್ವದ ಅನೇಕರು ತಮ್ಮ ಸಂದೇಶ, ಚಿತ್ರಗಳು, ವಿಡಿಯೋಗಳನ್ನು ತಮಗೆ ಬೇಕಾದವರಿಗೆ ರವಾನಿಸಲು ಟೆಲಿಗ್ರಾಂನತ್ತ ಹೊರಳಿದ್ದಾರೆ.

ಟೆಲಿಗ್ರಾಂನ ಮಾಸಿಕ ಬಳಕೆದಾರರ ಸಂಖ್ಯೆ ಸರಾಸರಿ 50 ಕೋಟಿ. ಇದರ ಶೇ.10ರಷ್ಟು ಹೊಸ ಗ್ರಾಹಕರು ಆ ಐದಾರು ಗಂಟೆಗಳಲ್ಲಿ ಟೆಲಿಗ್ರಾಂಗೆ ಸಿಕ್ಕಿದ್ದಾರೆ! ಅಲ್ಲಿಗೆ, ಸಾಮಾಜಿಕ ಜಾಲತಾಣಗಳ ಸ್ಪರ್ಧಾತ್ಮಕ ಜಗತ್ತಿನಲ್ಲಿ ಒಂದು ವ್ಯವಸ್ಥೆ ನಿಷ್ಕ್ರಿಯವಾದರೆ ಮತ್ತೂಂದು ವ್ಯವಸ್ಥೆಗೆ ಅದು ಹೇಗೆ ಲಾಭವಾಗುತ್ತದೆ ಎಂಬುದಕ್ಕೆ ಇದು ಸಾಕ್ಷ್ಯ ನೀಡಿದೆ.