ಪಾಕಿಸ್ಥಾನ ವಿರುದ್ಧ ಕ್ರಿಕೆಟ್‌ ಶಿಶು ನಮೀಬಿಯಾ

Team Udayavani, Nov 2, 2021, 5:40 AM IST

ಅಬುಧಾಬಿ: ಪಾಕಿಸ್ಥಾನದ ಟಿ20 ವಿಶ್ವಕಪ್‌ ಸೆಮಿಫೈನಲ್‌ ಪ್ರವೇಶ ಅಧಿಕೃತಗೊಳ್ಳುವ ಹೊತ್ತು ಸಮೀಪಿಸಿದೆ.

ಈಗಾಗಲೇ ಹ್ಯಾಟ್ರಿಕ್‌ ಗೆಲುವು ಕಂಡಿರುವ ಬಾಬರ್‌ ಆಜಂ ಪಡೆ ಮಂಗಳವಾರ ನಮೀಬಿಯಾ ವಿರುದ್ಧ ಆಡಲಿದೆ. ಈಗಿನ ಫಾರ್ಮ್ ಗಮನಿಸಿದರೆ ಕ್ರಿಕೆಟ್‌ ಶಿಶು ನಮೀಬಿಯಾವನ್ನು ಮಣಿಸುವುದು ಪಾಕಿಸ್ಥಾನಕ್ಕೆ ದೊಡ್ಡ ಸವಾಲೇನಲ್ಲ.

3 ದೊಡ್ಡ ಎದುರಾಳಿಗಳಾದ ಭಾರತ, ಕಿವೀಸ್‌ ಮತ್ತು ಅಫ್ಘಾನಿಸ್ಥಾ ನವನ್ನು ಮಣಿಸಿ ನಿರಾಳವಾಗಿರುವ ಪಾಕಿಸ್ಥಾನಕ್ಕಿನ್ನು ಎರಡು ಲೆಕ್ಕದ ಭರ್ತಿಯ ತಂಡಗಳೇ ಎದುರಾಳಿಗಳು. ನಮೀಬಿಯಾ ಬಳಿಕ ಸ್ಕಾಟ್ಲೆಂಡ್‌ ವಿರುದ್ಧ ಆಡಲಿದೆ. ಇವೆರಡನ್ನೂ ಮಣಿಸಿ ಅಜೇಯವಾಗಿ ನಾಕೌಟ್‌ಗೆ ಲಗ್ಗೆ ಇಡುವುದು ಪಾಕ್‌ ಯೋಜನೆ.

ಇದನ್ನೂ ಓದಿ:ದಿಟ್ಟತನದ ಕೊರತೆ ಕಾಡಿತು: ವಿರಾಟ್‌ ಕೊಹ್ಲಿ

ಪಾಕಿಗೊಂದು ಅಭ್ಯಾಸ
ಮುಂದಿನ ಹಂತದ ಕಠಿನ ಸವಾಲನ್ನು ನಿಭಾಯಿಸಲು ಈ ಎರಡು ತಂಡಗಳ ವಿರುದ್ಧದ ಪಂದ್ಯಗಳನ್ನು ಅಭ್ಯಾಸಕ್ಕಾಗಿ ಬಳಸಿಕೊಳ್ಳಲು ಪಾಕ್‌ ನಿರ್ಧರಿಸಿದೆ. ಗೆದ್ದರೂ ಈ ವರೆಗಿನ ಕೆಲವು ದೌರ್ಬಲ್ಯವನ್ನು ಹೋಗಲಾಡಿಸಿಕೊಳ್ಳುವುದು, ಮೀಸಲು ಸಾಮರ್ಥ್ಯವನ್ನು ಪರೀಕ್ಷಿಸುವುದೆಲ್ಲ ಪಾಕಿಸ್ಥಾನದ ಮುಂದಿರುವ ಪ್ರಮುಖ ಯೋಜನೆಗಳು.