ವಜ್ರಖಚಿತ ರಾಜಮುಡಿಯಲ್ಲಿ ಕಂಗೊಳಿಸಿದ “ಚೆಲುವ”

Team Udayavani, Nov 13, 2021, 2:38 PM IST

ಮೇಲುಕೋಟೆ: ಪ್ಲವ ಸಂವತ್ಸವರದ ತುಲಾ ಮಾಸದ ಧನಿಷ್ಠ ನಕ್ಷತ್ರದಿಂದ ಕೂಡಿದ ಶುಭ ಶುಕ್ರವಾರ ರಾತ್ರಿ ಆರಾಧ್ಯ ದೈವ ಶ್ರೀಚೆಲುವನಾರಾಯಣ ಸ್ವಾಮಿಗೆ ವಜ್ರಖಚಿತ ರಾಜಮುಡಿ ಉತ್ಸವ ಶಾಸ್ತ್ರೋಕ್ತವಾಗಿ ನೆರವೇರಿಸಲಾಯಿತು. ಶ್ರೀದೇವಿ-ಭೂದೇವಿ ಸಮೇತನಾದ ಸ್ವಾಮಿಗೆ ಭವ್ಯ ರೀತಿಯಲ್ಲಿ ಅಲಂಕಾರ ಮಾಡಿ ಶಂಖ, ಚಕ್ರ, ಗದಾ, ಪದ್ಮ, ಶಿರತ್ಛಕ್ರ ಮೈಸೂರು ಲಾಂಚನ ಸೇರಿದಂತೆ 14 ಬಗೆಯ ವಜ್ರಖಚಿತ ಆಭರಣಗಳನ್ನು ತೊಡಿಸಿ ಮಂಗಳಾರತಿ ನೆರವೇರಿಸಲಾಯಿತು.

ಉತ್ಸವದಲ್ಲಿ ನೂರಾರು ಭಕ್ತರು ಭಾಗಿ: ಸರ್ಕಾರದ ನಿರ್ದೇಶನದಂತೆ ಜಿಲ್ಲಾಧಿಕಾರಿ ನೀಡಿದ ಪರಿಷ್ಕೃತ ಆದೇಶದಂತೆ ದೇವಾಲಯದ ಹೊರ ಪ್ರಾಕಾರದಲ್ಲಿ ದಿವ್ಯಪ್ರಬಂಧ ಪಾರಾಯಣದೊಂದಿಗೆ ನಡೆದ ರಾಜಮುಡಿ ಉತ್ಸವದಲ್ಲಿ ನೂರಾರು ಭಕ್ತರು ಭಾಗವಹಿಸಿದ್ದರು. ಪಾಂಡವಪುರ ಉಪವಿಭಾಗಾಧಿಕಾರಿ ಶಿವಾನಂದಮೂರ್ತಿ ನೇತೃತ್ವದಲ್ಲಿ ಜಿಲ್ಲಾ ಖಜಾನೆಯಿಂದ ರಾಜಮುಡಿ ತಿರುವಾಭರಣ ಪೆಟ್ಟಿಗೆಗಳನ್ನು ತಂದು ಸಂಜೆ 6.30ರ ವೇಳೆಗೆ ಪರಿಶೀಲನೆ ಮಾಡಿ ಸ್ಥಾನೀಕರು ಅರ್ಚಕ, ಪರಿಚಾರಕ, ಕಾವಲುಗಾರರ ವಶಕ್ಕೆ ನೀಡಲಾಯಿತು.

ಇದನ್ನೂ ಓದಿ:- ನೀರಿನಲ್ಲಿ ಕೊಚ್ಚಿ ಹೋದ ಗ್ರಾಮ ಪಂಚಾಯಿತಿ ಸದಸ್ಯ : ಗ್ರಾಮಸ್ಥರಿಂದ ಹುಡುಕಾಟ

ನಂತರ ಮೈಸೂರು ಅರಸು ರಾಜ ಒಡೆಯರ್‌ ಭಕ್ತಿಪೂರ್ವಕವಾಗಿ ಅಮೂಲ್ಯ ವಜ್ರಗಳಿಂದ ಮಾಡಿದ ರಾಜಮುಡಿ ಹಾಗೂ ಗಂಡುಬೇರುಂಡ ಪದಕ ಇತರ ಆಭರಣಗಳನ್ನು ಸ್ವಾಮಿಗೆ ಧರಿಸಿ 7.30ರಲ್ಲಿ ಮಹಾಮಂಗಳಾರತಿ ಮಾಡಿ ಉತ್ಸವಕ್ಕೆ ಚಾಲನೆ ನೀಡಲಾಯಿತು. ದೇವಾಲಯದ ಹೊರಪ್ರಕಾರದಲ್ಲಿ ರಾಜಮುಡಿ ಉತ್ಸವ ವೈಭವದಿಂದ ನೆರವೇರಿತು. ಪಾಂಡವಪುರ ತಹಶೀಲ್ದಾರ್‌ ಪ್ರಮೋದ್‌ ಪಾಟೀಲ್‌, ದೇವಾಲಯದ ಕಾರ್ಯನಿರ್ವಾಹಕ ಅ ಕಾರಿ ಮಂಗಳಮ್ಮ, ಎಸ್‌ಐ ಗಣೇಶ್‌ ಉತ್ಸವದಲ್ಲಿ ಭಾಗಿಯಾಗಿದ್ದರು.

ಅಷ ತೀಥೋತ್ಸವಕ್ಕೆ ಜಿಲ್ಲಾಧಿಕಾರಿ ಅನುಮತಿ

ಸರ್ಕಾರದ ಸೂಚನೆಯಂತೆ ಜಿಲ್ಲಾಧಿಕಾರಿ ನೀಡಿದ ಆದೇಶದಂತೆ ನ.14ರಂದು ಅಷ್ಟ ತೀಥೋìತ್ಸವ ಪ್ರತಿ ವರ್ಷದಂತೆ ನಡೆಯಲಿದೆ. ಗೋ ಪೂಜೆಗೆ ಬಂದಿದ್ದ ಶಾಸಕ ಸಿ.ಎಸ್‌. ಪುಟ್ಟರಾಜು ಸಂಪ್ರದಾಯದಂತೆ ಅಷ್ಟ ತೀಥೋìತ್ಸವ ಹಾಗೂ ತೊಟ್ಟಿಲಮಡು ಜಾತ್ರೆಯನ್ನು ನಡೆಸುವುದರ ಜತೆಗೆ ಚೆಲುವನಾರಾಯಣ ಸ್ವಾಮಿಯ ಎಲ್ಲ ಉತ್ಸವಗಳು ಎಂದಿನಂತೆ ನಡೆಯಬೇಕು ಎಂದು ಸೂಚನೆ ನೀಡಿದ್ದರು.

ಅದರಂತೆ ಇದೀಗ ಜಿಲ್ಲಾಧಿಕಾರಿ ನೀಡಿದ ಪರಿಷ್ಕೃತ ಆದೇಶದ ಪ್ರಕಾರ ಚೆಲುವ ನಾರಾಯಣಸ್ವಾಮಿಯ ಎಲ್ಲ ಉತ್ಸವಗಳೂ ಸಹ ಸಂಪ್ರದಾಯ ಬದ್ಧವಾಗಿ ಎಂದಿನಂತೆ ಹೊರ ಭಾಗದಲ್ಲೇ ನಡೆಯಲಿದೆ.

ಅಷ್ಟ ತೀರ್ಥೋತ್ಸವದ ಕಾರ್ಯಕ್ರಮಗಳು: ಅಷ್ಟ ತೀಥೋìತ್ಸವದ ದಿನವಾದ ಭಾನುವಾರ ದೇವಾಲಯ 5.30ಕ್ಕೆ ಆರಂಭವಾಗಿ 7 ಗಂಟೆಗೆ ದೇಶಿಕರ ಸನ್ನಿಧಿಗೆ ಸ್ವಾಮಿಯ ಪಾದುಕೆ ಉತ್ಸವ ನಡೆಯಲಿದೆ. ನಂತರ ಬೆಳಗ್ಗೆ 8ಕ್ಕೆ ರಾಜಮುಡಿ ಕಿರೀಟಧಾರಣೆಯೊಂದಿಗೆ ಸ್ವಾಮಿಯ ಉತ್ಸವ ಕಲ್ಯಾಣಿಗೆ ನಡೆದು ಅಲ್ಲಿ ವೇದ ಮಂತ್ರದೊಂದಿಗೆ ಅಭಿಷೇಕ ನಡೆಯಲಿದೆ.

ಬೆಳಗ್ಗೆ 10 ಗಂಟೆಯಿಂದ ಅಷ್ಟ ತೀರ್ಥೋತ್ಸವ ಆರಂಭವಾಗಿ 8 ತೀರ್ಥಗಳಲ್ಲಿ ಅಭಿಷೇಕ ನಡೆದ ನಂತರ ಸಂಜೆ 5ಕ್ಕೆ ವೈಕುಂಠ ಗಂಗೆಯಲ್ಲಿ ಕೊನೆಯ ಅಭಿಷೇಕ ನಡೆಯಲಿದೆ. ಯೋಗಾ ನರಸಿಂಹಸ್ವಾಮಿಯ ಗಿರಿ ಪ್ರದಕ್ಷಿಣೆಯೊಂದಿಗೆ ರಾತ್ರಿ 8 ಗಂಟೆಗೆ ಉತ್ಸವ ಮುಕ್ತಾಯವಾಗಲಿದೆ. ಪುತ್ರ ಭಾಗ್ಯ ಪೇಕ್ಷಿಸಿ ಹರಕೆ ಯೊಂದಿಗೆ 8 ಗಂಟೆಗೆ ಕಲ್ಯಾಣಿಯಲ್ಲಿ ಭಾಗವಹಿಸಬಹುದು ಎಂದು ದೇವಾಲಯದ ಮೂಲಗಳು ತಿಳಿಸಿವೆ.