ಡ್ರೋನ್‌ ಮೂಲಕ ಆಸ್ಪತ್ರೆಗೆ ಔಷಧ ರವಾನೆ

Team Udayavani, Nov 15, 2021, 11:11 AM IST

ಆನೇಕಲ್‌: ಒಂದು ಆಸ್ಪತ್ರೆಯಿಂದ ಮತ್ತೂಂದು ಆಸ್ಪತ್ರೆಗೆ ಡ್ರೋನ್‌ ಮೂಲಕ ವ್ಯಾಕ್ಸಿನ್‌ ರವಾನಿಸುವ ಮೂಲಕ ನ್ಯಾಷನಲ್‌ ಏರೋಸ್ಪೇಸ್‌ ಲ್ಯಾಬೋರೇಟರಿ ಮಹತ್ತರ ಸಾಧನೆ ಮಾಡಲು ಮುಂದಾಗಿದ್ದು, ಇದೇ ಮೊದಲ ಬಾರಿಗೆ ನಡೆಸಿದ ಈ ಪ್ರಯೋಗವು ಯಶಸ್ವಿಯಾಗಿದೆ.

ಆನೇಕಲ್‌ ತಾಲೂಕಿನ ಚಂದಾಪುರ ಪ್ರಾಥಮಿಕ ಆರೋಗ್ಯ ಕೇಂದ್ರದಿಂದ ಜಿಗಣಿ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ 50 ವಯಲ್‌ ಕೋವಿಶೀಲ್ಡ್‌ ವ್ಯಾಕ್ಸಿನ್‌ ಕೇವಲ ಏಳು ನಿಮಿಷಕ್ಕೆ ಆಗಸದಲ್ಲಿ ಕೊಂಡೊ ಮೂಲಕ ಹೊಸ ಪ್ರಯೋಗಕ್ಕೆ ಯಶಸ್ಸು ಸಿಕ್ಕಿದ್ದು, ಮುಂದಿನ ದಿನಗಳಲ್ಲಿ ತುರ್ತು ಸಮಯದಲ್ಲಿ ಡ್ರೋನ್‌ ಮೂಲಕ ಔಷಧಗಳನ್ನು ಸಾಗಿಸಬಹುದಾಗಿದೆ. ಬೆಳಗ್ಗೆ 9.15 ನಿಮಿಷಕ್ಕೆ ಚಂದಾಪುರ ಪ್ರಾಥಮಿಕ ಆರೋಗ್ಯ ಕೇಂದ್ರದಿಂದ 5.4 ಕೆ.ಜಿ. ತೂಕವಿರುವ ವ್ಯಾಕ್ಸಿನ್‌ ಬಾಕ್ಸ್‌ನ್ನು ಹಾರಗದ್ದೆ ಪ್ರಾಥಮಿಕ ಆರೋಗ್ಯಕ್ಕೆ ಕೊಂಡೊಯ್ದಿದೆ.

ಇದನ್ನೂ ಓದಿ:- ಖ್ಯಾತ ಇತಿಹಾಸಕಾರ, ಪದ್ಮವಿಭೂಷಣ ಬಾಬಾಸಾಹೇಬ್ ಪುರಂದರೆ ಇನ್ನಿಲ್ಲ

ಚಂದಾಪುರದಿಂದ ಏಳು ಕಿ.ಮೀ. ದೂರ ಇರುವ ಹಾರಗದ್ದೆ ಪ್ರಾಥಮಿಕ ಆರೋಗ್ಯ ಕೇಂದ್ರವನ್ನು ಕೇವಲ ಏಳು ನಿಮಿಷಕ್ಕೆ ತಲುಪಿದ್ದು, ಮೊದಲನೇ ಬಾರಿಗೆ ನಡೆಸಿದ ಪ್ರಯೋಗ ಯಶಸ್ಸು ಕಂಡಿದೆ. ವಾಹನ, ಸಮಯ, ಕೆಲಸದವರನ್ನು ಬಳಸದೆ ಇದೇ ಮೊದಲ ಬಾರಿಗೆ ತುರ್ತು ಪರಿಸ್ಥಿತಿಯಲ್ಲಿ ವ್ಯಾಕ್ಸಿನ್‌ ಕಳುಹಿಸಲು ಇಂತಹ ಒಂದು ಕಾರ್ಯವನ್ನು ಮಾಡಲು ನ್ಯಾಷನಲ್‌ ಏರೋಸ್ಪೇಸ್‌ ಲ್ಯಾಬೋರೇಟರಿ ಮುಂದಾಗಿದ್ದು, ಬೆಂಗಳೂರು ನಗರ ಜಿಲ್ಲಾ ಆರೋಗ್ಯ ಅಧಿಕಾರಿ ಶ್ರೀನಿವಾಸ್‌ ಹಾಗೂ ನ್ಯಾಷನಲ್‌ ಏರೋಸ್ಪೇಸ್‌ ಲ್ಯಾಬೋರೇಟರಿ ಅಧಿಕಾರಿ ವೆಂಕಟೇಶ್‌ ಸಮ್ಮುಖದಲ್ಲಿ ಚಂದಾಪುರ ಪ್ರಾಥಮಿಕ ಆರೋಗ್ಯ ಕೇಂದ್ರದಿಂದ ವ್ಯಾಕ್ಸಿನ್‌ ಹೊತ್ತ ಡ್ರೋನ್‌ಗೆ ಚಾಲನೆ ನೀಡಲಾಯಿತು.

14 ನಿಮಿಷ ಹಾರಾಟ: ಚಂದಾಪುರ ಪ್ರಾಥಮಿಕ ಆರೋಗ್ಯ ಕೇಂದ್ರದಿಂದ ವ್ಯಾಕ್ಸಿನ್‌ ಹೊತ್ತು ಹಾರಗದ್ದೆಗೆ ತಲುಪಿದ ಬಳಿಕ ಅಲ್ಲಿಂದ ಮತ್ತೆ ಚಂದಾಪುರ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ಏಳು ನಿಮಿಷದಲ್ಲಿ ವಾಪಸ್‌ ಬಂದ ಡ್ರೋನ್‌ ಒಟ್ಟು 14 ನಿಮಿಷಗಳ ಹಾರಾಟವನ್ನು ನಡೆಸಿ 14 ಕಿಲೋಮೀಟರ್‌ನಷ್ಟು ದೂರ ತಲುಪುವ ಮೂಲಕ ಯಶಸ್ವಿಯಾಗಿ ಹಾರಾಟ ನಡೆಸಿದೆ. 1.2 ಕಿಲೋ ಮೀಟರ್‌ ಮೇಲೆ ಹಾರಾಟ ನಡೆಸಿಕೊಂಡು ಹೋಗಿರುವ ಡ್ರೋನ್‌ ಯಶಸ್ವಿಯಾಗಿ ಹಾರಾಟವನ್ನು ಪ್ರಾಯೋಗಿಕ ವಾಗಿ ನಡೆಸಿ ರುವುದರಿಂದ ಮುಂದಿನ ದಿನಗಳಲ್ಲಿ ಇದನ್ನು ಮುಂದುವರಿಸುವ ಚಿಂತನೆಯನ್ನು ನ್ಯಾಷನಲ್‌ ಏರೋಸ್ಪೇಸ್‌ ಲ್ಯಾಬೋರೇಟರಿ ಹೊಂದಿದೆ.

ಚರ್ಚಿಸಿ ಕ್ರಮ ಕೈಗೊಳ್ಳಲಿದ್ದಾರೆ: ಬೆಂಗಳೂರು ನಗರ ಜಿಲ್ಲಾ ಆರೋಗ್ಯ ಅಧಿಕಾರಿ ಶ್ರೀನಿವಾಸ್‌ ಮಾತನಾಡಿ, ಪ್ರಾಯೋಗಿಕವಾಗಿ ಡ್ರೋನ್‌ ಮೂಲಕ ವ್ಯಾಕ್ಸಿನ್‌ ಸರಬರಾಜು ಮಾಡುವ ಮೂಲಕ ನ್ಯಾಷನಲ್‌ ಏರೋಸ್ಪೇಸ್‌ ಲ್ಯಾಬೋರೇಟರಿ ಅಧಿಕಾರಿಗಳು ಉತ್ತಮವಾದ ಕಾರ್ಯ ಮಾಡಿದ್ದಾರೆ. ಇದು ಯಾವುದೇ ಹೆಚ್ಚುವರಿ ಖರ್ಚು ಇಲ್ಲದೆ ಮಾಡಲಾಗುತ್ತದೆ ಎಂದು ಹೇಳಿದ್ದಾರೆ. ಆದರೆ, ಇದು ಪ್ರಾಯೋಗಿಕವಾಗಿ ಮಾಡಿರುವುದರಿಂದ ಮುಂದಿನ ದಿನಗಳಲ್ಲಿ ಅಧಿಕಾರಿಗಳು ಚರ್ಚಿಸಿ ಕ್ರಮ ಕೈಗೊಳ್ಳಲಿದ್ದಾರೆ ಎಂದರು. ಆನೇಕಲ್‌ ತಾಲೂಕು ಆರೋಗ್ಯ ಅಧಿಕಾರಿ ವಿನಯ್‌, ಹಾರಗದ್ದೆ ಪ್ರಾಥಮಿಕ ಆರೋಗ್ಯ ಕೇಂದ್ರದ ವೈದ್ಯೆ ಡಾ ನೀತು ಮತ್ತಿತರರು ಇದ್ದರು.

15 ಕೆ.ಜಿ. ಭಾರ ಹೊರುವ ಸಾಮರ್ಥ್ಯ

ಇದು ಪ್ರಾಯೋಗಿಕವಾಗಿ ನಡೆಸಿರುವ ಹಾರಾಟ. 15 ಕೆ.ಜಿ. ಭಾರ ಹೊರುವ ಸಾಮರ್ಥ್ಯ ಇರುವ ಡ್ರೋನ್‌ ಇದಾಗಿದ್ದು, ಕೇವಲ ಏಳು ನಿಮಿಷದಲ್ಲಿ ಚಂದಾಪುರದಿಂದ ಹಾರಗದ್ದೆವರೆಗೆ ಹಾರಾಟ ನಡೆಸಿದೆ. 14 ನಿಮಿಷಗಳಲ್ಲಿ ಚಂದಾಪುರದಿಂದ ಹಾರಗದ್ದೆಗೆ ಹೋಗಿ ಮತ್ತೆ ಬಂದಿರುವುದು ಸಂತಸ ತಂದಿದ್ದು, ಮುಂದಿನ ದಿನಗಳಲ್ಲಿ ಇದನ್ನು ಯಾವ ರೀತಿ ಬಳಸಬೇಕು ಎನ್ನುವ ನಿಟ್ಟಿನಲ್ಲಿ ಸಿದ್ಧತೆ ನಡೆಸಲಾಗುತ್ತಿದೆ ಎಂದು ನ್ಯಾಷನಲ್‌ ಏರೋಸ್ಪೇಸ್‌ ಲ್ಯಾಬೋರೇಟರಿ ಅಧಿಕಾರಿ ವೆಂಕಟೇಶ್‌ ಹೇಳಿದರು.