ಕನಕನಾಳದಲ್ಲಿ ಮಾಳಿಂಗರಾಯ ಜಾತ್ರೆ

Team Udayavani, Nov 15, 2021, 4:11 PM IST

ಚಡಚಣ: ಮುಂದಿನ ವರ್ಷ ಮಳೆಯೋ ಮಳೆ. ಎಲ್ಲ ಮಳೆಗಳು ದೇಶಕ್ಕ ಸಂಪೂರ್ಣ ಕೊಟ್ಟೇನು. ಆದರೂ ಜನಪೀಡೆ ತಪ್ಪಿದ್ದಲ್ಲ ನಿಮಗ! ಈ ಯುಗಾದಿಯಿಂದ ಅಕಿತಿಯವರೆಗೆ ಬಹಳ ಜನಪೀಡೈತಿ ಮಾನವಗ. ಎಚ್ಚರದಿಂದ ಇರ್ಯೋ ಎಚ್ಚರ! ನಿಮ್ಮಂತೆ ನಾನು ನಮ್ಮಂತೆ ನಾವು ನಿಮಗ ಜ್ವಾಕಿ ಮಾಡಿ ದಂಡಿಗಿ ಮುಟ್ಟಸ್ಥೀನಿ ಆದರೂ ಹುಷಾರ ಎಂದು ಕನಕನಾಳ ಮಾಳಿಂಗರಾಯ ದೇವರ ಪೂಜಾರಿ ಅಡವೆಪ್ಪ ಪೂಜಾರಿ ಮುಂದಿನ ವರ್ಷದ ಆಗು ಹೋಗುಗಳನ್ನು ಭಕ್ತರಿಗೆ ತಿಳಿಸಿದರು.

ಕನಕನಾಳ ಗ್ರಾಮದ ಮಾಳಿಂಗರಾಯ ದೇವರ ಜಾತ್ರೆ ನಿಮಿತ್ತ ಹೊರಗಿನ ಬನದಲ್ಲಿ ನುಡಿಮುತ್ತುಗಳನ್ನು ಹೇಳಿದ ಅವರು, ಈಗಿನ ಬೆಳೆಗಳು ರೈತರಿಗೆ ಖುಷಿಯಾಗಂಗ ಕೊಟ್ಟೇನು. ಗೋಧಿ, ಜೋಳ ಭರಪೂರ. ನೀರಿದ್ದವನಿಗೆ ತೊಗರಿ. ಹತ್ತಿ ಬೆಳೆದಂವ ಶ್ರೀಮಂತ. ಉದ್ದ ಉದ್ದಾದೀತು. ಟೋಮ್ಯಾಟೋ ಗಗನಕ. ಆದರೂ ದೇವರ ನೆನಯುವದ ಬಿಡಬೇಡಿ. ಅಂದಾಗ ಸುಖ ಸಿಕ್ಕೀತು. ಬಸವಣ್ಣ ಜ್ವಾಕಿ ಎಂದರು.

ಕನಕನಾಳ ಗ್ರಾಮು ಹಾಲುಮತದ ಹುಲಜಂತಿ ಶಾಖಾ ಮಠದ ದೇವರ ಗುಡಿಯಾಗಿದೆ. ಅಡವೆಪ್ಪ ಪೂಜಾರಿ ಮಾಳಿಂಗರಾಯ ದೇವರಿಗೆ ರುದ್ರಾಭಿಷೇಕ ಮಾಡಿದರು. ನಂತರ ವಿವಿಧ ವಾದ್ಯ ವೈಭವಗಳೊಂದಿಗೆ ಸುಮಂಗಲೆಯರ ಕಳಸದೊಂದಿಗೆ ದೇವರ ಪಲ್ಲಕ್ಕಿ ಮೆರವಣಿಗೆ ಮೂಲಕ ಗ್ರಾಮದ ಮುಂದಿನ ಹಳ್ಳದ ದಡಕ್ಕೆ ತಲುಪಿ ಗಂಗಾಸ್ಥಳ ಪೂಜೆ ನೆರವೇರಿತು.

ನಂತರ ಮೆರವಣಿಗೆ ಗ್ರಾಮದ ಹೊರಗಿನ ಬನದ ಗುಡಿಗೆ ತಲುಪಿತು. ಮಾಳುಗೌಡ ಬಿರಾದಾರ, ಪ್ರಕಾಶ ಪಾಟೀಲ, ಸರೂಬಾಯಿ ಮಾನೆ, ರುಕ್ಮಿàಣಿ ಮಾದರ, ಮಾಳನಗೌಡ ಬಿರಾದಾರ, ರುದ್ರಪ್ಪ ಪೂಜಾರಿ, ಭೀಮರಾವ್‌ ಮಾನೆ, ಅಮಸಿದ್ಧ ಘೇರಡೆ, ಧರ್ಮರಾಜ ನಾಯಕ, ಗಣಪತಿ ನರಳೆ, ಧರ್ಮೇಂದ್ರ ಪವಾರ, ಸಾಬುಗೌಡ ಬಿರಾದಾರ, ಮಲ್ಲಪ್ಪ ನವತ್ರೆ ಇದ್ದರು.