ಹಾಡಿನಲ್ಲಿ ರಚಿತಾ ಬೋಲ್ಡ್‌ ಲುಕ್‌: ಬೇಡಿಕೆ ಪಡೆದುಕೊಂಡ ರಚ್ಚು

Team Udayavani, Nov 16, 2021, 1:10 PM IST

ಇತ್ತೀಚೆಗಷ್ಟೇ “ಲವ್‌ ಯು ರಚ್ಚು’ ಚಿತ್ರದ “ಮುದ್ದು ನೀನು… ಮುದ್ದು ನೀನು’ ವಿಡಿಯೋ ಸಾಂಗ್‌ ಯು-ಟ್ಯೂಬ್‌ನಲ್ಲಿ ಬಿಡುಗಡೆಯಾಗಿದ್ದು ನಿಮಗೆ ಗೊತ್ತಿರಬಹುದು. ನಟ ಅಜೇಯ್‌ ರಾವ್‌ ಮತ್ತು ನಟಿ ರಚಿತಾ ರಾಮ್‌ ಬೋಲ್ಡ್‌ ಆ್ಯಂಡ್‌ ರೊಮ್ಯಾಂಟಿಕ್‌ ಲುಕ್‌ನಲ್ಲಿಕಾಣಿಸಿಕೊಂಡಿದ್ದ ಈ ಹಾಡು, ಸದ್ಯ ಸೋಶಿಯಲ್‌ ಮೀಡಿಯಾದಲ್ಲಿ ಸಾಕಷ್ಟು ವೈರಲ್‌ ಆಗಿ ಸಿನಿಪ್ರಿಯರ ಗಮನ ಸೆಳೆಯುತ್ತಿದೆ. ಸಿದ್ಧ್ ಶ್ರೀರಾಮ್‌ ಧ್ವನಿಯಲ್ಲಿ ಮೂಡಿಬಂದಿರುವ ಈ ರೊಮ್ಯಾಂಟಿಕ್‌ ಮೆಲೋಡಿ ಸಾಂಗ್‌, ಈಗ ಗಾಂಧಿನಗರದ ಸಿನಿಮಂದಿಯ ಗಮನವನ್ನೂ ಸೆಳೆಯಲು ಯಶಸ್ವಿಯಾಗಿದ್ದು, “ಮುದ್ದು ನೀನು… ಮುದ್ದು ನೀನು’ ಹಾಡು ಬಿಡುಗಡೆಯಾದ ಬಳಿಕ “ಲವ್‌ ಯು ರಚ್ಚು’ ಸಿನಿಮಾ ವಿತರಕರಿಂದ, ಪ್ರದರ್ಶಕರಿಂದ ಭರ್ಜರಿ ಬೇಡಿಕೆ ಪಡೆದುಕೊಳ್ಳುತ್ತಿದೆ

ಹೌದು, ಸದ್ಯ “ಲವ್‌ ಯು ರಚ್ಚು’ ಚಿತ್ರದ ಪ್ರಚಾರಕಾರ್ಯಗಳಿಗೆ ಚಾಲನೆ ನೀಡಿರುವ ಚಿತ್ರತಂಡ ಇದೇ ಡಿಸೆಂಬರ್‌ನಲ್ಲಿ ಚಿತ್ರವನ್ನು ತೆರೆಗೆ ತರುವ ಯೋಜನೆ ಹಾಕಿಕೊಂಡಿದೆ. ಪ್ರಚಾರದ ಭಾಗವಾಗಿ ಚಿತ್ರದ ಈ ರೊಮ್ಯಾಂಟಿಕ್‌ ಮೆಲೋಡಿ ಹಾಡನ್ನು ಬಿಡುಗಡೆಗೊಳಿಸಿತ್ತು. ಇದೀಗ ಈ ಹಾಡು ಚಿತ್ರತಂಡ ನಿರೀಕ್ಷೆಗೂ ಮೀರಿ ಸಿನಿಪ್ರಿಯರನ್ನು ತಲುಪಲು ಯಶಸ್ವಿಯಾಗಿದೆ. ಒಂದೆಡೆ ಚಿತ್ರದ ಮೆಲೋಡಿ ಹಾಡು ಸೌಂಡ್‌ ಮಾಡುತ್ತಿದ್ದರೆ, ಮತ್ತೂಂದೆಡೆ ಅದೇ ಹಾಡಿನಲ್ಲಿ ಅಜೇಯ್‌ ರಾವ್‌ ಮತ್ತು ರಚಿತಾ ರಾಮ್‌ ಜೋಡಿಯ ಆನ್‌ಸ್ಕ್ರೀನ್‌ ಕೆಮಿಸ್ಟ್ರಿ ಕೂಡ ಜೋರಾಗಿ ಸೌಂಡ್‌ ಮಾಡುತ್ತಿದೆ. ಅದರಲ್ಲೂ ರಚಿತಾ ಬೋಲ್ಡ್‌ ಲುಕ್‌ ಅದಾದ ಬಳಿಕ ಚಿತ್ರದಲ್ಲಿ ಕಾಣಿಸಿಕೊಂಡಿರುವ ಬಗ್ಗೆ ರಚಿತಾ “ರೊಮ್ಯಾನ್ಸ್‌’ ಮಾತುಗಳು ಸೋಶಿಯಲ್‌ ಮೀಡಿಯಾದಲ್ಲಿ ಸಾಕಷ್ಟು ವೈರಲ್‌ ಆಗುತ್ತಿದೆ. ಈ ಎಲ್ಲ ಬೆಳವಣಿಗೆಗಳು ಇದೀಗ “ಲವ್‌ ಯು ರಚ್ಚು’ ಚಿತ್ರಕ್ಕೆ ಪ್ಲಸ್‌ ಆಗಿದೆ ಎನ್ನುತ್ತಿವೆ ಗಾಂಧಿನಗರದ ಮೂಲಗಳು.

ಇದನ್ನೂ ಓದಿ:ಇದು ನೆಕ್ಸ್ಟ್ ಲೆವೆಲ್‌ ಸಿನಿಮಾ: ‘ಗರುಡ ಗಮನ ವೃಷಭ ವಾಹನ’ ಬಗ್ಗೆ ರಕ್ಷಿತ್‌ ಶೆಟ್ಟಿ ವಿಶ್ವಾಸ

ಕಳೆದ ಒಂದು ವಾರದಲ್ಲಿ “ಲವ್‌ ಯು ರಚ್ಚು’ ಚಿತ್ರಕ್ಕೆ ಗಾಂಧಿನಗರದ ವಿತರಕರು, ಪ್ರದರ್ಶಕರಿಂದ ಬೇಡಿಕೆ ಹೆಚ್ಚಾಗುತ್ತಿದ್ದು, ಚಿತ್ರದ ವಿತರಣೆಯ ಹಕ್ಕುಗಳನ್ನು ಪಡೆಯಲು ಅನೇಕ ವಿತರಕರು ಮುಂದೆ ಬರುತ್ತಿದ್ದಾರೆ. ಈ ಬಗ್ಗೆ ಮಾತನಾಡುವ ಚಿತ್ರದ ನಿರ್ಮಾಪಕ ಗುರು ದೇಶಪಾಂಡೆ, “ಇದೊಂದು ಕಂಪ್ಲೀಟ್‌ ಫ್ಯಾಮಿಲಿ ಸಬೆjಕ್ಟ್ ಸಿನಿಮಾವಾಗಿದ್ದರಿಂದ, “ಲವ್‌ ಯು ರಚ್ಚು’ ಮೇಲೆ ಮೊದಲಿನಿಂದಲೂ ಸಾಕಷ್ಟು ನಿರೀಕ್ಷೆ ಇತ್ತು.

ಈಗ ಸಿನಿಮಾದ ಪ್ರಮೋಶನ್ಸ್‌ ವೇಳೆಯಲ್ಲಿ ನಮ್ಮ ಸಿನಿಮಾಕ್ಕೆ ನಿರೀಕ್ಷೆಗೂ ಮೀರಿದ್ದ ರೆಸ್ಪಾನ್ಸ್‌ ಸಿಗುತ್ತಿದೆ. ಸೋಶಿಯಲ್‌ ಮೀಡಿಯಾದಲ್ಲಿ ಸಿನಿಮಾದ ಸಾಂಗ್‌ ತುಂಬ ವೈರಲ್‌ ಆಗಿದ್ದು, 3 ಮಿಲಿಯನ್ಸ್‌ಗೂ ಹೆಚ್ಚು ವೀವ್ಸ್‌ ಪಡೆದುಕೊಂಡಿದೆ. ಹೀಗಾಗಿ ಸಹಜವಾಗಿಯೇ ಸಿನಿಮಾದ ರೈಟ್ಸ್‌ಗೂ ತುಂಬ ಬೇಡಿಕೆ ಬರುತ್ತಿದೆ. ಈಗಾಗಲೇ ಈ ಕುರಿತು ಮಾತುಕಥೆ ಶುರುವಾಗಿದೆ’ ಎನ್ನುತ್ತಾರೆ.