ಹೊಸ ಗ್ರಹವನ್ನು ಪತ್ತೆ ಹಚ್ಚಿದ ಇಸ್ರೋ

Team Udayavani, Nov 18, 2021, 6:45 AM IST

ಅಹ್ಮ‌ದಾಬಾದ್‌: ಸೌರಮಂಡಲ­ದಿಂದ ಹೊರಗೆ ಗ್ರಹವೊಂದು ನಕ್ಷತ್ರವನ್ನು ಸುತ್ತುತ್ತಿರುವುದನ್ನು ಪತ್ತೆ ಹಚ್ಚಲಾಗಿದೆ. ಭಾರತೀಯ ಬಾಹ್ಯಾಕಾಶ ಸಂಶೋಧನ ಸಂಸ್ಥೆ (ಇಸ್ರೋ)ಯ ಅಹ್ಮದಾಬಾದ್‌ನ ಪ್ರೊ| ಅಭಿಜಿತ್‌ ಚಕ್ರವರ್ತಿ ನೇತೃತ್ವದ ತಂಡವು ಈ ಗ್ರಹಮಂಡಲವನ್ನು ಪತ್ತೆ ಹಚ್ಚಿದೆ. ಇದಕ್ಕೆ ಯೂರೋಪ್‌ ಹಾಗೂ ಅಮೆರಿಕದ ಬಾಹ್ಯಾಕಾಶ ವಿಜ್ಞಾನಿಗಳೂ ಸಾಥ್‌ ನೀಡಿದ್ದಾರೆ.

“2020ರ ಡಿಸೆಂಬರ್‌ನಿಂದ 2021ರ ಮಾರ್ಚ್‌ವರೆಗೆ ಸಂಶೋಧನೆ ಮಾಡಿ ಈ ಮಂಡಲವನ್ನು ಗುರುತಿಸಲಾಗಿದೆ. ಇದರಲ್ಲಿರುವ ಗ್ರಹವು ನಕ್ಷತ್ರಕ್ಕೆ ಅತೀ ಸಮೀಪದಲ್ಲಿ ಅಂದರೆ ಸೂರ್ಯನಿಂದ ಬುಧನಿಗಿರುವ ಅಂತರದ 10ನೇ ಒಂದು ಭಾಗದಷ್ಟು ದೂರದಲ್ಲಿ ಇದೆ. ಅದೇ ಕಾರಣಕ್ಕೆ ಗ್ರಹವು ಕೇವಲ 3.2 ದಿನಗಳಲ್ಲಿ ನಕ್ಷತ್ರವನ್ನು ಸುತ್ತಿ ಬರುತ್ತಿದೆ.

ಇದನ್ನೂ ಓದಿ:ಕಾಂಗ್ರೆಸ್‌ ಯಾವ ಅಭಿವೃದ್ಧಿಯನ್ನೂ ಮಾಡಿಲ್ಲ: ಜೆಪಿ ನಡ್ಡಾ

ಈ ಗ್ರಹವು ಗುರು ಗ್ರಹದ ಶೇ. 70ರಷ್ಟು ತೂಕ ಹೊಂದಿದೆ. ಹಾಗೆಯೇ ಇದರ ತ್ರಿಜ್ಯವು ಗುರು ಗ್ರಹಕ್ಕಿಂತ 1.4 ಪಟ್ಟು ಹೆಚ್ಚಿದೆ. ಇದು ಭೂಮಿಯಿಂದ 725 ಜ್ಯೋರ್ತಿ­ವರ್ಷ ದೂರವಿದೆ’ ಎಂದು ವಿಜ್ಞಾನಿಗಳು ತಿಳಿಸಿ ದ್ದಾರೆ. ಅಲ್ಲದೆ ಇದು ನಮ್ಮ ಸೂರ್ಯ ನಿಗಿಂತ 1.5 ಪಟ್ಟು ಹೆಚ್ಚು ದೊಡ್ಡದಾಗಿದೆ ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ.

ಹಾಟ್‌ ಜುಪಿಟರ್‌: ಈ ರೀತಿಯಲ್ಲಿ ನಕ್ಷತ್ರಕ್ಕೆ ತೀರಾ ಹತ್ತಿರವಾಗಿ ಸುತ್ತುವ ಸುಮಾರು 10 ಗ್ರಹಗಳು ಈಗಾಗಲೇ ಪತ್ತೆಯಾ­ಗಿವೆ. ನಕ್ಷತ್ರಕ್ಕೆ ಸನಿಹದಲ್ಲಿ­ರುವುದರಿಂದಾಗಿ ಈ ಗ್ರಹದಲ್ಲಿ 2000ಕೆ ಉಷ್ಣಾಂಶ ಇರುವುದಾಗಿ ಅಂದಾಜಿಸ­ಲಾಗಿದೆ. ಈ ರೀತಿ ನಕ್ಷತ್ರಕ್ಕೆ ತುಂಬಾ ಹತ್ತಿರವಾಗಿ ಸುತ್ತುವ ಗ್ರಹಗಳಿಗೆ “ಹಾಟ್‌ ಜುಪಿಟರ್‌’ ಎಂದು ಕರೆಯಲಾಗುವುದು ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ.