ಏಡ್ಸ್‌ ನಿರ್ಮೂಲನೆಯ ಪಣ ತೊಡೋಣ ; ಅಸಮಾನತೆ ಕೊನೆಗೊಳಿಸೋಣ

Team Udayavani, Dec 1, 2021, 7:20 AM IST

1980ರಲ್ಲಿ ಯುಎಸ್‌ನಲ್ಲಿ ಕಂಡು ಬಂದ ಮೊದಲ ಎಚ್‌ಐವಿ/ ಏಡ್ಸ್‌ ಪ್ರಕರಣ ವಿಶ್ವದಾದ್ಯಂತ ಹರಡಿ ಇಂದಿಗೂ ಲಕ್ಷಾಂತರ ಜನರ ಮೇಲೆ ಪರಿಣಾಮ ಬೀರುತ್ತಿರುವ ಪ್ರಮುಖ ಸಾರ್ವಜನಿಕ ಆರೋಗ್ಯ ಸಮಸ್ಯೆಯಾಗಿ ಉಳಿದಿದೆ. ಇದನ್ನು ನಿಯಂತ್ರಿಸಲು ವಿಶ್ವದ ಎಲ್ಲ ರಾಷ್ಟ್ರಗಳು ನಿರಂತರ ಪ್ರಯತ್ನಗಳನ್ನು ನಡೆಸುತ್ತಿದ್ದರೂ ಇನ್ನೂ ಸಂಪೂರ್ಣ ಯಶ ಕಂಡಿಲ್ಲ. ಮಾನವ ಹಕ್ಕುಗಳನ್ನು ಅವಗಣಿಸಿ, ಎಚ್‌ಐವಿ ಪೀಡಿತರನ್ನು ದೂರವಿಟ್ಟು, ಅವರನ್ನು ಅಸ್ಪೃಶ್ಯರಂತೆ ಇಂದಿಗೂ ನೋಡುತ್ತಿರುವುದರಿಂದ ಜಾಗತಿಕವಾಗಿ ಇದೊಂದು ಆರೋಗ್ಯ ಬಿಕ್ಕಟ್ಟಾಗಿ ಉಳಿಯಲು ಕಾರಣವಾಗಿದೆ. ಅಸಮಾನತೆ ಮತ್ತು ಸೇವೆಗಳಲ್ಲಾಗುವ ವೈಫ‌ಲ್ಯದಿಂದಾಗಿಯೇ ಈ ಸಮಸ್ಯೆ ಉಲ್ಬಣಿಸುತ್ತಲೇ ಇದೆ.

ಅಸಮಾನತೆ ಹೋಗಲಾಡಿಸುವುದೇ ಸವಾಲು
ಈ ಬಾರಿ “ಅಸಮಾನತೆ ಹೋಗಲಾಡಿಸಿ, ಏಡ್ಸ್‌ ಕೊನೆಗೊಳಿಸಿ’ ಎನ್ನುವ ಸಂದೇಶದೊಂದಿಗೆ ಡಿ. 1ರಂದು ವಿಶ್ವ ಏಡ್ಸ್‌ ದಿನವನ್ನು ಆಚರಿಸಲಾಗುತ್ತಿದೆ. ಪ್ರಪಂಚದಾದ್ಯಂತ ಏಡ್ಸ್‌ ಮತ್ತು ಇತರ ಸಾಂಕ್ರಾಮಿಕ ರೋಗಗಳನ್ನು ದೂರ ಮಾಡುವ ನಿಟ್ಟಿನಲ್ಲಿ ರೋಗಿಗಳ ಕುರಿತಾಗಿನ ಅಸಮಾನತೆಯನ್ನು ಕೊನೆಗೊಳಿಸಬೇಕಾದ ತುರ್ತು ಅಗತ್ಯವಿದೆ. ಇಂತಹ ಅಸಮಾನತೆಗಳ ವಿರುದ್ಧ ದಿಟ್ಟ ಕ್ರಮಕೈಗೊಳ್ಳದೇ ಇದ್ದಲ್ಲಿ 2030ರ ವೇಳೆಗೆ ಏಡ್ಸ್‌ ಸಂಪೂರ್ಣ ನಿರ್ಮೂಲನೆ ಮಾಡುವ ಗುರಿ ತಲುಪುವುದು ಕಷ್ಟಸಾಧ್ಯ. ಮೊದಲ ಏಡ್ಸ್‌ ಪ್ರಕರಣ ವರದಿಯಾದ 40 ವರ್ಷಗಳ ಅನಂತರವೂ ಎಚ್‌ಐವಿ ಇಂದಿಗೂ ಜಗತ್ತನ್ನು ಬಾಧಿಸುತ್ತಿದೆ. 2030ರ ವೇಳೆಗೆ ಇದನ್ನು ಸಂಪೂರ್ಣ ನಿರ್ಮೂಲನೆ ಮಾಡಲು ರೋಗದ ಕುರಿತ ಜ್ಞಾನದ ಜತೆಯಲ್ಲಿ ಅದರ ನಿಯಂತ್ರಣ ಮತ್ತು ಚಿಕಿತ್ಸೆಗೆ ಸಂಬಂಧಿಸಿದಂತೆ ಸಮಾಜದಲ್ಲಿ ಬೇರೂರಿರುವ ಅಸಮಾನತೆ ಭಾವವನ್ನು ಹೋಗಲಾಡಿಸಬೇಕಿದೆ.

ಅಸಮಾನತೆ ಮತ್ತು ಆರೋಗ್ಯ
ಅಸಮಾನತೆಗಳನ್ನು ಹೋಗಲಾಡಿಸಿದರೆ ಕೋವಿಡ್‌- 19 ಮತ್ತು ಇತರ ಸಾಂಕ್ರಾಮಿಕಗಳನ್ನು ಎದುರಿಸುವುದು ಸುಲಭ. ಅಸಮಾನತೆಯನ್ನು ಹೋಗಲಾಡಿಸಲು ರಾಜಕೀಯ, ಆರ್ಥಿಕ, ಸಾಮಾಜಿಕ ನೀತಿಗಳು ಬಹುಮುಖ್ಯವಾಗಿರುತ್ತವೆ. ಅಸಮಾನತೆಯನ್ನು ಹೋಗಲಾಡಿಸಲು ಸಮರ್ಥ ನೀತಿಗಳು, ಮತ್ತವುಗಳ ಅನುಷ್ಠಾನದ ಅಗತ್ಯವಿದೆ. ಅದಕ್ಕಾಗಿ ನಾಯಕರು ದಿಟ್ಟ ಹೆಜ್ಜೆ ಇಡಬೇಕಿದೆ.

ಇದನ್ನೂ ಓದಿ:ಅಯೋಧ್ಯೆ ತೀರ್ಪು ಧರ್ಮಾಧಾರಿತವಲ್ಲ: ಮಾಜಿ ಸಿಜೆಐ ಗೊಗೋಯ್!

ಮೊದಲ ಪ್ರಕರಣ
1981ರ ಎಪ್ರಿಲ್‌ 24ರಂದು ಸ್ಯಾನ್‌ ಫ್ರಾನ್ಸಿಸ್ಕೋ ದಲ್ಲಿ ಮೊದಲ ಎಚ್‌ಐವಿ ಪ್ರಕರಣ ಪತ್ತೆಯಾಯಿತಾದರೂ ಈ ಬಗ್ಗೆ ಗೊಂದಲಗಳಿವೆ. ಇದಕ್ಕಿಂತ ಮೊದಲೇ ಕೆಲವರನ್ನು ಎಚ್‌ಐವಿ ಬಾಧಿಸಿತ್ತು ಎನ್ನಲಾಗುತ್ತಿದೆ. ಭಾರತದಲ್ಲಿ ಮೊದಲ ಬಾರಿಗೆ ಚೆನ್ನೈಯ ಲೈಂಗಿಕ ಕಾರ್ಯಕರ್ತೆ ಯರಲ್ಲಿ 1986ರಲ್ಲಿ ಎಚ್‌ಐವಿ ಸೋಂಕು ಪತ್ತೆಯಾಗಿತ್ತು. ಇಂದು ದೇಶದಲ್ಲಿ ಸುಮಾರು 5.134 ಮಿಲಿಯನ್‌ ಸೋಂಕಿತರಿದ್ದಾರೆ.

ಎಚ್‌ಐವಿ ಎಂದರೇನು?
ದೇಹದ ಪ್ರತಿ ರಕ್ಷಣ ವ್ಯವಸ್ಥೆಯನ್ನು ಆಕ್ರಮಿಸುವ ಸೋಂಕು ಹ್ಯೂಮನ್‌ ಇಮ್ಯೂನೊ ಡಿಫಿಶಿಯನ್ಸಿ ವೈರಸ್‌ (ಎಚ್‌ಐವಿ). ಇದು ನಿರ್ದಿಷ್ಟವಾಗಿ ಸಿಡಿ4 ಜೀವಕೋಶಗಳೆಂದು ಕರೆಯಲ್ಪಡುವ ಬಿಳಿ ರಕ್ತ ಕಣಗಳ ಮೇಲೆ ದಾಳಿ ನಡೆಸುತ್ತವೆ. ಕ್ಷಯ ರೋಗ, ಶಿಲೀಂಧ್ರ ಸೋಂಕುಗಳು, ತೀವ್ರವಾದ ಬ್ಯಾಕ್ಟೀರಿಯಾದ ಸೋಂಕುಗಳು ಮತ್ತು ಕ್ಯಾನ್ಸರ್‌ನಂತಹ ಅವಕಾಶವಾದಿ ಸೋಂಕುಗಳ ವಿರುದ್ಧ ವ್ಯಕ್ತಿಯ ಪ್ರತಿ ರಕ್ಷೆಯನ್ನು ದುರ್ಬಲ ಗೊಳಿಸುತ್ತದೆ.

ಎಚ್‌ಐವಿ ಅಪಾಯವಿರುವ ಪ್ರತಿಯೊಬ್ಬರ ಪರೀಕ್ಷೆಯನ್ನು ಮಾಡಬೇಕು ಎಂದು ಡಬ್ಲ್ಯು ಎಚ್‌ಒ ಶಿಫಾರಸು ಮಾಡುತ್ತದೆ. ಕ್ಷಿಪ್ರ ರೋಗ ನಿರ್ಣಯ, ಸ್ವಯಂ ಪರೀಕ್ಷೆಗಳ ಮೂಲಕ ರೋಗವನ್ನು ಖಚಿತ ಪಡಿಸಿಕೊಳ್ಳಬಹುದು.

ಎಚ್‌ಐವಿ ಪರೀಕ್ಷಾ ಸೇವೆಗಳಲ್ಲಿ ಒಪ್ಪಿಗೆ ಪಡೆಯುವುದು, ಗೌಪ್ಯತೆ ಕಾಪಾಡುವುದು, ಸಮಾಲೋಚನೆ ನಡೆಸುವುದು, ಸರಿಯಾದ ಫ‌ಲಿತಾಂಶ, ಚಿಕಿತ್ಸೆ ನೀಡುವುದು ಅತ್ಯಗತ್ಯವಾಗಿದೆ.

ಚಿಕಿತ್ಸೆ ಹೇಗೆ?: ಎಚ್‌ಐವಿ ರೋಗ ನಿರ್ಣಯದ ಅನಂತರ ಸಾಧ್ಯವಾದಷ್ಟು ಬೇಗ ಆ್ಯಂಟಿರೆಟ್ರೋವೈರಲ್‌ ಚಿಕಿತ್ಸೆ(ಎಆರ್‌ಟಿ)ಯನ್ನು ಒದಗಿಸಬೇಕು. ರಕ್ತದಲ್ಲಿನ ವೈರಸ್‌ ಅನ್ನು ಅಳೆಯುವ ಪರೀಕ್ಷೆಯನ್ನು ಒಳಗೊಂಡಂತೆ ಕ್ಲಿನಿಕಲ್‌ ಮತ್ತು ಪ್ರಯೋಗಾಲಯದ ನಿಯತಾಂಕಗಳನ್ನು ಬಳಸಿಕೊಂಡು ನಿಯಮಿತವಾಗಿ ಮೇಲ್ವಿಚಾರಣೆ ಮಾಡಬೇಕು. ಎಆರ್‌ಟಿ ಅನ್ನು ಸತತವಾಗಿ ತೆಗೆದುಕೊಂಡರೆ ಎಚ್‌ಐವಿ ಇತರರಿಗೆ ಹರಡುವುದನ್ನು ತಡೆಯಬಹುದು. ಎಆರ್‌ಟಿ ಪ್ರಾರಂಭಿಸಿದ ಅನಂತರ ವ್ಯಕ್ತಿಯ ಪ್ರತಿರಕ್ಷಣ ಸ್ಥಿತಿಯನ್ನು ನಿರ್ಣಯಿಸಲು ಬಿಳಿ ರಕ್ತ ಕಣಗಳ ಸಂಖ್ಯೆಯನ್ನು ಪರಿಶೀಲಿಸುತ್ತಿರಬೇಕು. ಇದು ಇತರ ಕಾಯಿಲೆಗಳ ಸೋಂಕಿನ ಅಪಾಯವನ್ನು ಕಡಿಮೆ ಮಾಡಿ ಸೂಕ್ತ ಚಿಕಿತ್ಸೆ ನೀಡಲು ಸಹಕಾರಿಯಾಗುತ್ತದೆ. ರಕ್ತದಲ್ಲಿನ ವೈರಸ್‌ ಪ್ರಮಾಣವನ್ನು ಅಳೆಯಲು ಎಚ್‌ಐವಿ ವೈರಲ್‌ ಲೋಡ್‌ ಪರೀಕ್ಷೆ ಮಾಡಲಾಗುತ್ತದೆ. ವೈರಸ್‌ನ ಪುನರಾವರ್ತನೆಯ ಮಟ್ಟವನ್ನು ಮತ್ತು ಎಆರ್‌ಟಿಯ ಪರಿಣಾಮಕತ್ವವನ್ನು ತಿಳಿಯಲು ಈ ಪರೀಕ್ಷೆಯನ್ನು ನಡೆಸಲಾಗುತ್ತದೆ. ಎಆರ್‌ಟಿ ಚಿಕಿತ್ಸೆ ಅಸಮರ್ಪಕವಾದರೆ ಅದನ್ನು ಬದಲಾಯಿಸುವ ಅಥವಾ ವ್ಯಕ್ತಿಗನುಗುಣವಾಗಿ ಅದನ್ನು ಹೊಂದಿಸುವ ಸಲಹೆಗೆ ಈ ಪರೀಕ್ಷೆ ತುಂಬಾ ಪ್ರಯೋಜನಕಾರಿಯಾಗಿದೆ.

ವಿಶ್ವ ಮಟ್ಟದಲ್ಲಿ ಎಚ್‌ಐವಿ/ ಏಡ್ಸ್‌ ಪ್ರಕರಣ
3,77,00,000 ಎಚ್‌ಐವಿ ಸೋಂಕಿತರು
6,80,000 ಎಚ್‌ಐವಿ ಸೋಂಕಿತರಾಗಿ ಮೃತಪಟ್ಟವರು
15,00,000 ಹೊಸದಾಗಿ ಎಚ್‌ಐವಿ ಸೋಂಕಿಗೆ ಒಳಗಾದವರು
ಶೇ. 75ರಷ್ಟು ಮಂದಿ ಎಚ್‌ಐವಿಯೊಂದಿಗೆ ಬದುಕಲು 2020ರಲ್ಲಿ ಆ್ಯಂಟಿರೆಟ್ರೋವೈರಲ್‌ ಚಿಕಿತ್ಸೆಯನ್ನು ಪಡೆದಿದ್ದಾರೆ.