ಡೇವಿಸ್‌ ಕಪ್‌ ಟೆನಿಸ್‌: ರಶ್ಯಕ್ಕೆ 15 ವರ್ಷ ಬಳಿಕ ಪ್ರಶಸ್ತಿ

Team Udayavani, Dec 7, 2021, 5:10 AM IST

ಮ್ಯಾಡ್ರಿಡ್‌ (ಸ್ಪೇನ್‌): ಡ್ಯಾನಿಲ್‌ ಮೆಡ್ವೆಡೇವ್‌ ಸಾಹಸದಿಂದ ರಶ್ಯ 15 ವರ್ಷಗಳ ಬಳಿಕ ಡೇವಿಸ್‌ ಕಪ್‌ ಟೆನಿಸ್‌ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡಿದೆ. ಕ್ರೊವೇಶಿಯಾ ವಿರುದ್ಧ ಸಾಧಿಸಿದ 2-0 ಮುನ್ನಡೆಯಿಂದ ರಶ್ಯ ಕಿರೀಟ ಏರಿಸಿಕೊಂಡಿತು.

ಮರಿನ್‌ ಸಿಲಿಕ್‌ ಎದುರಿನ ದ್ವಿತೀಯ ಪಂದ್ಯವನ್ನು ಡ್ಯಾನಿಲ್‌ ಮೆಡ್ವೆಡೇವ್‌ 7-6 (7), 6-2 ಅಂತರದಿಂದ ಗೆದ್ದು ರಶ್ಯವನ್ನು ಚಾಂಪಿಯನ್‌ ಪಟ್ಟಕ್ಕೆ ಏರಿಸಿದರು. ಮೊದಲ ಪಂದ್ಯದಲ್ಲಿ ಆ್ಯಂಡ್ರೆ ರುಬ್ಲೇವ್‌ 6-4, 7-6 (5) ಅಂತರದಿಂದ ಬೋರ್ನ ಗೋಜೊ ಅವರನ್ನು ಮಣಿಸಿದ್ದರು.

ಇದು ರಶ್ಯಕ್ಕೆ ಒಲಿದ 3ನೇ ಡೇವಿಸ್‌ ಕಪ್‌ ಪ್ರಶಸ್ತಿ. 2002 ಹಾಗೂ 2006ರಲ್ಲಿ ಅದು ಚಾಂಪಿಯನ್‌ ಆಗಿತ್ತು. ಕ್ರೊವೇಶಿಯಾ 2005 ಮತ್ತು 2018ರಲ್ಲಿ ಕಪ್‌ ಎತ್ತಿತ್ತು.

ಕಳೆದ ತಿಂಗಳು ರಶ್ಯದ ವನಿತೆಯರು ಸ್ವಿಜರ್ಲೆಂಡ್‌ಗೆ 2-0 ಅಂತರದ ಸೋಲುಣಿಸಿ “ಬಿಲ್ಲಿ ಜೀನ್‌ ಕಿಂಗ್‌ ಕಪ್‌’ ಜಯಿಸಿದ್ದರು.

ಭಾರತದಲ್ಲಿ ಡೆನ್ಮಾರ್ಕ್‌ ಪಂದ್ಯ
ಭಾರತ 2019ರ ಫೆಬ್ರವರಿ ಬಳಿಕ ಡೇವಿಸ್‌ ಕಪ್‌ ಟೆನಿಸ್‌ ಕೂಟದ ಆತಿಥ್ಯ ವಹಿಸಲಿದೆ. ಮುಂದಿನ ಮಾರ್ಚ್‌ 4-5ರಂದು ಡೆನ್ಮಾರ್ಕ್‌ ಎದುರಿನ ವಿಶ್ವ ಗ್ರೂಪ್‌-1 ಸ್ಪರ್ಧೆ ನಡೆಯಲಿದೆ.

2019ರಲ್ಲಿ ಇಟಲಿ ಎದುರಿನ ಮುಖಾಮುಖಿ ಭಾರತದಲ್ಲಿ ನಡೆದಿತ್ತು. ಇದನ್ನು ಭಾರತ 1-3ರಿಂದ ಕಳೆದುಕೊಂಡಿತ್ತು. ಭಾರತ ತನ್ನ ಕಳೆದ 3 ಟೂರ್ನಿಗಳನ್ನು ವಿದೇಶದಲ್ಲಿ ಆಡಿತ್ತು. 2019ರಲ್ಲಿ ಪಾಕಿಸ್ಥಾನ ವಿರುದ್ಧ ಆಡಲು ಕಜಾಕ್‌ಸ್ಥಾನಕ್ಕೆ ತೆರಳಿದರೆ, ಅನಂತರ ಕ್ರೊವೇಶಿಯಾ (2020) ಮತ್ತು ಫಿನ್‌ಲ್ಯಾಂಡ್ (2021) ವಿರುದ್ಧ ಅವರದೇ ನೆಲದಲ್ಲಿ ಸೆಣಸಿತು.