ಸೇವಕನಿಲ್ಲದೆ ದರ್ಶನ ಭಾಗ್ಯ ನೀಡದ ಶ್ರೀದಾಂಡೇಲಪ್ಪ

Team Udayavani, Dec 7, 2021, 6:02 PM IST

ದಾಂಡೇಲಿ: ದಾಂಡೇಲಿಗರ ಆರಾಧ್ಯ ದೈವ. ದಾಂಡೇಲಿಯ ಶಕ್ತಿ, ದಾಂಡೇಲಿಯ ರಕ್ಷಕ, ದಾಂಡೇಲಿಯ ಸರ್ವ ಧರ್ಮ ಸಮನ್ವಯತೆಯ ಪ್ರತಿಪಾದಕ ಶ್ರೀದಾಂಡೇಲಪ್ಪ ಇಂದು ತನಗೆ ದೈನಂದಿನ ಪೂಜೆ ಪುರಸ್ಕಾರ, ಸೇವೆಗಳನ್ನು ಮಾಡುತ್ತಿದ್ದ ಸೇವಕ ಗೋಪಾಲ ಅರ್ಜುನ ಮಿರಾಶಿಯವರನ್ನು ಕಳೆದುಕೊಂಡು ದರ್ಶನ ಭಾಗ್ಯ ನೀಡುತ್ತಿಲ್ಲ.

ವರ್ಷದ ಪ್ರತಿದಿನ ಪೂಜೆಗೆ ಪಾತ್ರವಾಗುವ ಶ್ರೀದಾಂಡೇಲಪ್ಪನಿಗೆ ಮಿರಾಶಿ ಮನೆತನದ ಹಿರಿ ಜೀವ, ತನ್ನ ಆಪ್ತ ಸೇವಕನ  ಅಗಲಿಕೆಯ ಪರಿಣಾಮವಾಗಿ ಪೂಜೆ, ಪುರಸ್ಕಾರ ನಡೆಯುವುದಿಲ್ಲ.  ಪ್ರಧಾನ ಅರ್ಚಕ ಗೋಪಾಲ ಮಿರಾಶಿಯವರು ವಿಧಿವಶರಾದ ಹಿನ್ನಲೆಯಲ್ಲಿ ದೇವಸ್ಥಾನಕ್ಕೆ ಬೀಗಮುದ್ರೆ ಹಾಕಲಾಗಿದೆ.

ದೇವಸ್ಥಾನದ ಆವರಣದಲ್ಲೆ ಗೋಪಾಲ ಮಿರಾಶಿಯವರ ಮನೆಯಿರುವುದರಿಂದ ಅವರ ಅಂತ್ಯಕ್ರಿಯೆ ಹಾಗೂ ಅಂತಿಮ ವಿಧಿ ವಿಧಾನಗಳು ಮುಗಿದ ಬಳಿಕ ಅಂದರೆ ಹನ್ನೊಂದು ದಿನಗಳವರೆಗೆ ಯಾವುದೇ ಪೂಜೆ ಪುರಸ್ಕಾರಗಳು ನಡೆಯುವುದಿಲ್ಲ. ಆನಂತರ ಎಂದಿನಂತೆ ಶ್ರೀ.ದಾಂಡೇಲಪ್ಪನ ದರ್ಶನ ಭಾಗ್ಯ ಪಡೆಯಬಹುದಾಗಿದೆ.