‘ಶತಭಿಷ’ ಜನವರಿಯಲ್ಲಿ ತೆರೆಗೆ

Team Udayavani, Dec 10, 2021, 3:58 PM IST

ಹೊಸಬರೇ ಸೇರಿ ಮಾಡಿರುವ “ಶತಭಿಷ’ ಚಿತ್ರ ಈಗ ಸದ್ದಿಲ್ಲದೇ ಬಿಡುಗಡೆಯ ಹಂತಕ್ಕೆ ಬಂದಿದೆ. ಇತ್ತೀಚೆಗೆ ಚಿತ್ರದ ಟೀಸರ್‌ ಹಾಗೂ ಪೋಸ್ಟರ್‌ ಅನ್ನು ಚಿತ್ರತಂಡ ಬಿಡುಗಡೆ ಮಾಡಿದೆ. ಈ ಚಿತ್ರವನ್ನು ವೆಂಕಟೇಶ್‌ ನಿರ್ದೇಶಿಸಿದ್ದಾರೆ.

ಈಗಾಗಲೇ ತಮಿಳಿನ ಕೆಲವು ಸಿನಿಮಾಗಳಲ್ಲಿ ನಾಯಕರಾಗಿ ನಟಿಸಿರುವ ವೆಂಕಟೇಶ್‌ ಈಗ “ಶತಭಿಷ’ ಮೂಲಕ ನಿರ್ದೇಶರಾಗಿದ್ದಾರೆ. ದೀಪು ಅರ್ಜುನ್‌ ಮತ್ತು ಶೋಭಿತಾ ಶಿವಣ್ಣ ಚಿತ್ರದಲ್ಲಿ ನಾಯಕ- ನಾಯಕಿಯರಾಗಿ ನಟಿಸಿದ್ದಾರೆ. ಕಾಣಿಸಿಕೊಂಡಿದ್ದಾರೆ. ಅಂದುಕೊಂಡಂತೆ ಆದರೆ ಹೊಸ ವರ್ಷದ ಆರಂಭದಲ್ಲಿ ಚಿತ್ರ ತೆರೆಗೆ ಬರಲು ಸಜ್ಜಾಗಿದೆ.

ಚಿತ್ರದ ಬಗ್ಗೆ ಮಾತನಾಡುವ ನಿರ್ದೇಶಕ ವೆಂಕಟೇಶ್‌, ನಾಲ್ವರು ಪೋಲಿ ಹುಡುಗರ ಕಥೆಯಿದು. ಭಯೋತ್ಪಾದಕರಿಗೆ ಬೆಂಬಲ ನೀಡಲು ಹೋಗಿ ಪೊಲೀಸ್‌ ಕೈಗೆ ಸಿಕ್ಕಿಹಾಕಿಕೊಳ್ಳುತ್ತಾರೆ, ನಂತರ ಅವರು ಹೊರ ಬರ್ತಾರಾ ಇಲ್ವಾ ಎನ್ನುವುದು ಚಿತ್ರದ ತಿರುಳು. ಚಿತ್ರದಲ್ಲಿ 3 ಹಾಡು ಹಾಗೂ 4 ಫೈಟ್‌ಗಳಿದ್ದು, ಅಭಿಷೇಕ್‌ ರಾಯ್‌ ಸಂಗೀತ, ಸೆಲ್ವರಾಜ್‌ ಛಾಯಾಗ್ರಹಣ ಚಿತ್ರಕ್ಕಿದೆ ಎಂದರು.

ನಿರ್ಮಾಪಕ ಕಾಶಿ ಶೇಖರ್‌ ಮಾತನಾಡಿ, ಚಿತ್ರ ಚೆನ್ನಾಗಿ ಮೂಡಿಬಂದಿದೆ, ಕುಟುಂಬ ಸಮೇತ ನೋಡುವಂಥ ಒಳ್ಳೆಯ ಕಥೆ ಸಿನಿಮಾದಲ್ಲಿದೆ ಎಂದು ಹೇಳಿದರು. ಚಿತ್ರದಲ್ಲಿ ಅವರು ಪೊಲೀಸ್‌ ಅಧಿಕಾರಿಯಾಗಿ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.

ನಾಯಕ ದೀಪು ಅರ್ಜುನ್‌ ಕೂಡಾ ತಮ್ಮ ಪಾತ್ರದ ಬಗ್ಗೆ ಹೇಳಿಕೊಂಡರು. ಉಳಿದಂತೆ ಚಿತ್ರದಲ್ಲಿ ಟೆನ್ನಿಸ್‌ ಕೃಷ್ಣ, ಅಪ್ಪಣ್ಣ, ಮೂಗು ಸುರೇಶ್‌, ಕುರಿ ಸುನೀಲ್‌ ನಟಿಸಿದ್ದಾರೆ. ವಿರಾಜಪೇಟೆ, ಮೇಲುಕೋಟೆ, ಹುಬ್ಬಳ್ಳಿ, ಮುಂಬೈ,ಗುಲ್ಬರ್ಗಾ, ಬೆಂಗಳೂರು, ಚಿಂತಾಮಣಿ ಅಲ್ಲದೆ ತಮಿಳುನಾಡು ಸೇರಿ ಸಾಕಷ್ಟು ಲೊಕೇಶನ್‌ ಗಳಲ್ಲಿ ಈ ಚಿತ್ರಕ್ಕೆ ಚಿತ್ರೀಕರಣ ಮಾಡಲಾಗಿದೆ.