ಸುಧಾರಿತ ಪಿನಾಕ ರಾಕೆಟ್‌ ಲಾಂಚರ್‌ ಯಶಸ್ವಿ ಪರೀಕ್ಷೆ

ಡಿಆರ್‌ಡಿಒದಿಂದ ಅಭಿವೃದ್ಧಿಗೊಳಿಸಲ್ಪಟ್ಟಿರುವ ಈ ಸಾಧನದಿಂದ ಭಾರತೀಯ ಸೇನೆಗೆ ಬಲ

Team Udayavani, Dec 11, 2021, 9:30 PM IST

ಸುಧಾರಿತ ಪಿನಾಕ ರಾಕೆಟ್‌ ಲಾಂಚರ್‌ ಯಶಸ್ವಿ ಪರೀಕ್ಷೆ

ನವದೆಹಲಿ: ಡಿಆರ್‌ಡಿಒದಿಂದ ಅಭಿವೃದ್ಧಿಪಡಿಸಲ್ಪಟ್ಟಿರುವ ವಿಸ್ತೃತ ದೂರದ ಪಿನಾಕ ಮಲ್ಟಿ ಬ್ಯಾರೆಲ್‌ ರಾಕೆಟ್‌ ಲಾಂಚರ್‌ ಸಿಸ್ಟಮ್‌ ಅನ್ನು ಶನಿವಾರ ಯಶಸ್ವಿಯಾಗಿ ಪರೀಕ್ಷಿಸಲಾಯಿತು.

ರಾಜಸ್ಥಾನದ ಜೈಸಲ್ಮೇರ್‌ ಜಿಲ್ಲೆಯ ಪೋಖ್ರಾನ್ ಪ್ರದೇಶದಲ್ಲಿ ಹಲವು ಭಿನ್ನ ದೂರಗಳನ್ನು ಯಶಸ್ವಿಯಾಗಿ ತಲುಪಬಲ್ಲ ರಾಕೆಟ್‌ಗಳನ್ನು ಪರೀಕ್ಷಿಸಲಾಯಿತು. ಈ ವೇಳೆ ರಾಕೆಟ್‌ಗಳಿಗೆ ವಿವಿಧ ಸಾಮರ್ಥ್ಯದ ಸಿಡಿತಲೆಗಳನ್ನು ಅಳವಡಿಸಲಾಗಿತ್ತು. ವಿವಿಧ ದೂರದ ಗುರಿಗಳನ್ನೂ ನಿಗದಿಪಡಿಸಲಾಗಿತ್ತು. ನಿಖರವಾಗಿ ಎಷ್ಟು ಸಾಮರ್ಥ್ಯ, ಎಷ್ಟು ದೂರದ ರಾಕೆಟ್‌ಗಳಿವು ಎಂಬ ಮಾಹಿತಿ ಲಭ್ಯವಾಗಿಲ್ಲ.

ಪ್ರಸ್ತುತ ಪರೀಕ್ಷೆಗೊಳಪಟ್ಟಿರುವ ವ್ಯವಸ್ಥೆ, ಈ ಹಿಂದೆ ಪಿನಾಕ (ಶಿವನ ಧನುಸ್ಸಿನ ಹೆಸರು) ರಾಕೆಟ್ಸ್‌ ಎಂದು ಕರೆಸಿಕೊಳ್ಳುತ್ತಿದ್ದ ವ್ಯವಸ್ಥೆಯ ಸುಧಾರಿತ ರೂಪ. ಡಿಆರ್‌ಡಿಒ ಇದನ್ನು ವಿನ್ಯಾಸ ಮಾಡಿದೆ. ಪುಣೆಯ ಹೈ ಎನರ್ಜಿ ಮೆಟೀರಿಯಲ್ಸ್‌ ರೀಸರ್ಚ್‌ ಪ್ರಯೋಗಾಲಯದಲ್ಲಿ ರೂಪಿಸಲಾಗಿದೆ.

ಇದನ್ನೂ ಓದಿ:ಅನಾರೋಗ್ಯದಿಂದ ಬಳಲುತ್ತಿರುವ ಬಾಲಕನ ಚಿಕಿತ್ಸೆಗಾಗಿ ಯಕ್ಷ ವೇಷ ಧರಿಸಿ ಸಂತೆಯಲ್ಲಿ ಧನ ಸಂಗ್ರಹ

ಮೂರು ದಿನಗಳಿಂದ ಪರೀಕ್ಷೆ:
ಸತತ ಮೂರು ದಿನಗಳ ಪೋಖ್ರಾನ್ ರೇಂಜ್‌ನಲ್ಲಿ ರಾಕೆಟ್‌ಗಳನ್ನು ಪರೀಕ್ಷೆ ಮಾಡಲಾಗಿದೆ. ಹಾಗೆಯೇ ದೇಶೀಯವಾಗಿ ನಿರ್ಮಿಸಲಾಗಿರುವ ಪ್ರಾಕ್ಸಿಮಿಟಿ ಫ್ಯೂಝ್ಗಳ (ಗುರಿ ಸನಿಹವಾದಾಗ ಸ್ಫೋಟಕಗಳನ್ನು ಸ್ಫೋಟಿಸುವ ಸಾಧನ) ಪರೀಕ್ಷೆಯನ್ನೂ ಯಶಸ್ವಿಯಾಗಿ ಮುಗಿಸಲಾಗಿದೆ. ಈ ಸಾಧನಗಳನ್ನು ಭಾರತೀಯ ಸೇನೆ ಬಳಸುತ್ತದೆ. ಇದೇ ವರ್ಷ ಜೂನ್‌ನಲ್ಲಿ, ಇದೇ ತಿಂಗಳಲ್ಲಿ ಹಿಂದೊಮ್ಮೆ ಇವುಗಳನ್ನು ಪರೀಕ್ಷಿಸಲಾಗಿತ್ತು.