ಮಗುವನ್ನು ಕೊಂದು ಆತ್ಮ ಹತ್ಯೆಗೆ ಶರಣಾದ ತಂದೆ

Team Udayavani, Dec 14, 2021, 12:52 PM IST

Representative Image used

ಬೆಂಗಳೂರು: ಅನಾರೋಗ್ಯದಿಂದ ಬಳಲುತ್ತಿದ್ದ ತಂದೆಯೊಬ್ಬ ಬುದ್ಧಿಮಾಂದ್ಯ ಪುತ್ರನನ್ನು ಕೊಲೆಗೈದು ತಾನು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಸಂಪಗಿರಾಮನಗರದಲ್ಲಿ ನಡೆದಿದೆ. ಸಂಪಂಗಿರಾಮನಗರದ ನಿವಾಸಿ ಸುರೇಶ್‌ (43) ತನ್ನ ಪುತ್ರ ಉದಯ್‌ ಸಾಯಿರಾಂ (10) ಸಂಪಿನೊಳಗೆ ಹಾಕಿ ಕೊಲೆ ಮಾಡಿ ತಾನು ನೇಣು ಬಿಗಿದು ಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಸುರೇಶ್‌ ಜೀವನ ನಿರ್ವಹಣೆಗಾಗಿ ಆಟೋ ಓಡಿಸುತ್ತಿದ್ದರು. ಇವರು ಲಕ್ಷ್ಮೀ ಎಂಬುವರನ್ನು ವಿವಾಹವಾಗಿ ಸಂಪಂಗಿರಾಮನಗರದಲ್ಲಿ ವಾಸವಾಗಿದ್ದರು. ಈ ದಂಪತಿಗೆ ಬುದ್ಧಿಮಾಂದ್ಯ ಮಗು ಜನಿಸಿತ್ತು. ಆದರೆ, ಮಗುವಿಗೆ ಕಣ್ಣು ಕಾಣುತ್ತಿರಲಿಲ್ಲ, ಕಿವಿಯೂ ಸಹ ಕೇಳುತ್ತಿರಲಿಲ್ಲ. ಹೀಗಾಗಿ, ದಂಪತಿ ನಡುವೆ ಆಗಾಗ ಜಗಳವಾಗುತ್ತಿತ್ತು.

ಇಷ್ಟೇ ಅಲ್ಲದೇ, ಇತ್ತೀಚೆಗೆ ಸುರೇಶ್‌ಗೆ ಆರೋಗ್ಯ ಸಮಸ್ಯೆ ಉಂಟಾಗಿ ಚಿಕಿತ್ಸೆ ಪಡೆಯುತ್ತಿದ್ದರು. ಇದರಿಂದ ಪತ್ನಿಗೆ ತೊಂದರೆಯಾಗುತ್ತಿದೆ ಎಂದು ತೀವ್ರ ಮನನೊಂದಿದ್ದರು. ತಾನು ಹಾಗೂ ಮಗು ವಿರುವುದರಿಂದ ನಿನಗೆ ತೊಂದರೆಯಾಗುತ್ತಿದೆ. ನಿನಗೆ ಹೊರೆಯಾಗಿ ಬದುಕುತ್ತಿದ್ದೇವೆ ಎಂದು ಸುರೇಶ್‌ ಪತ್ನಿ ಜತೆ ಅವಲತ್ತುಕೊಳ್ಳುತ್ತಿದ್ದರು.

ಇದನ್ನೂ ಓದಿ;- ದ.ಕ ದ್ವಿಸದಸ್ಯ ಕ್ಷೇತ್ರ: ಕೋಟ ಶ್ರೀನಿವಾಸ ಪೂಜಾರಿ,ಮಂಜುನಾಥ್ ಭಂಡಾರಿಗೆ ಜಯ

ಅಲ್ಲದೇ, ತಾವಿಬ್ಬರು ಸತ್ತರೆ ನೀನು ಸುಖವಾಗಿರಬಹುದು ಎಂದು ಪತ್ನಿಗೆ ಹೇಳುತ್ತಿದ್ದರು ಎನ್ನಲಾಗಿದೆ. ಇನ್ನು ಭಾನುವಾರ ತಡರಾತ್ರಿವರೆಗೂ ಅಳುತ್ತಿದ್ದ ಮಗುವನ್ನು ಸಮಾಧಾನ ಪಡಿಸಿದ್ದ ಲಕ್ಷ್ಮೀ ನಿದ್ದೆಗೆ ಜಾರಿದ್ದರು. ಸೋಮವಾರ ಮುಂಜಾನೆ 5 ಗಂಟೆಗೆ ಸುರೇಶ್‌, ತನ್ನ ಪತ್ನಿ ಪಕ್ಕದಲ್ಲಿ ಮಲಗಿದ್ದ ಪುತ್ರ ಸಾಯಿರಾಂ ನನ್ನು ಎತ್ತಿಕೊಂಡು ಹೋಗಿ ಮನೆಯಲ್ಲಿರುವ ಸಂಪಿನೊಳಗೆ ಹಾಕಿ ಬಾಗಿಲು ಮುಚ್ಚಿ ಪರಾರಿಯಾಗಿದ್ದಾರೆ.

ಪತ್ನಿಗೆ ಎಚ್ಚರವಾದಾಗ ಪತಿ ಹಾಗೂ ಮಗು ಕಾಣಿಸಿರಲಿಲ್ಲ. ನೆರೆ-ಹೊರೆಯವರ ಸಹಾ ಯದೊಂದಿಗೆ ಮನೆಯ ಸುತ್ತ-ಮುತ್ತ ಹುಡುಕುತ್ತಿದ್ದರು. ಅನುಮಾನದ ಮೇರೆಗೆ ಸಂಪ್‌ ತೆಗೆದು ನೋಡಿದಾಗ ಸಾಯಿರಾಂ ಶವ ತೇಲುತ್ತಿರುವುದು ಕಂಡು ಬಂದಿತ್ತು. ಈ ಸಂಬಂಧ ಎಸ್‌.ಆರ್‌ ನಗರ ಠಾಣೆಯಲ್ಲಿ ಸುರೇಶ್‌ ವಿರುದ್ಧ ಪ್ರಕರಣ ದಾಖಲಾಗಿತ್ತು.

ಪ್ರಕರಣ ದಾಖಲಿಸಿಕೊಂಡಿದ್ದ ಪೊಲೀಸರು ಸುರೇಶ್‌ಗಾಗಿ ಶೋಧ ನಡೆಸುತ್ತಿದ್ದರು. ಅಷ್ಟರಲ್ಲಾಗಲೇ ಸೋಮವಾರ ಸಂಜೆ ಅಪರಿಚಿತ ವ್ಯಕ್ತಿಯೊಬ್ಬ ಶೇಷಾದ್ರಿಪುರ ಪೊಲೀಸ್‌ ಠಾಣೆ ವ್ಯಾಪ್ತಿಯ ರೈಲ್ವೆ ಹಳಿಯ ಪಕ್ಕದಲ್ಲಿ ಮರವೊಂದಕ್ಕೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವುದು ಕಂಡುಬಂದಿತ್ತು.

ಈ ಬಗ್ಗೆ ಶೇಷಾದ್ರಿಪುರಂ ಪೊಲೀಸರು ಸಂಪಂಗಿ ರಾಮನಗರ ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಆತ್ಮಹತ್ಯೆ ಮಾಡಿಕೊಂಡ ಸುರೇಶ್‌ ಫೋಟೋ ಕಳುಹಿಸಿದ್ದರು. ಎಸ್‌.ಆರ್‌ ನಗರ ಪೊಲೀಸರು ಇದನ್ನು ಸುರೇಶ್‌ ಪತ್ನಿಗೆ ತೋರಿಸಿದಾಗ ಇದು ತನ್ನ ಪತಿ ಎಂಬುದನ್ನು ಗುರುತಿಸಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.