ಅಂಡರ್‌-19 ಏಶ್ಯಕಪ್‌ ಕ್ರಿಕೆಟ್‌: ಹರ್ನೂರ್‌ ನೂರರ ಆಟ; ಭಾರತಕ್ಕೆ ಜಯ

Team Udayavani, Dec 24, 2021, 5:00 AM IST

ದುಬಾೖ: ಅಂಡರ್‌-19 ಏಕದಿನ ಏಶ್ಯ ಕಪ್‌ ಕ್ರಿಕೆಟ್‌ ಪಂದ್ಯಾವಳಿಯಲ್ಲಿ ಭಾರತ ಭರ್ಜರಿ ಗೆಲುವಿನ ಆರಂಭ ಪಡೆದಿದೆ. “ಎ’ ವಿಭಾಗದ ಪಂದ್ಯದಲ್ಲಿ ಆತಿಥೇಯ ಯುಎಇಯನ್ನು 154 ರನ್ನುಗಳಿಂದ ಬಗ್ಗುಬಡಿದಿದೆ. ಆರಂಭಕಾರ ಹರ್ನೂರ್‌ ಸಿಂಗ್‌ ಶವರ ಶತಕ ಭಾರತ ಸರದಿಯ ಆಕರ್ಷಣೆ ಆಗಿತ್ತು.

ಮೊದಲು ಬ್ಯಾಟಿಂಗ್‌ ಮಾಡಿದ ಭಾರತದ ಕಿರಿಯರು 5 ವಿಕೆಟಿಗೆ 282 ರನ್‌ ಬಾರಿಸಿದರೆ, ಯುಎಇ 34.3 ಓವರ್‌ಗಳಲ್ಲಿ 128ಕ್ಕೆ ಆಲೌಟ್‌ ಆಯಿತು. “ಎ’ ವಿಭಾಗದ ಇನ್ನೊಂದು ಮುಖಾಮುಖೀಯಲ್ಲಿ ಪಾಕಿಸ್ಥಾನ 4 ವಿಕೆಟ್‌ಗಳಿಂದ ಅಫ್ಘಾನಿಸ್ಥಾನವನ್ನು ಮಣಿಸಿತು. ಭಾರತ-ಪಾಕಿಸ್ಥಾನ ಶನಿವಾರ ಎದುರಾಗಲಿವೆ.

ಹರ್ನೂರ್‌ 120
ಭಾರತದ ದೊಡ್ಡ ಮೊತ್ತದಲ್ಲಿ ಆರಂಭಕಾರ ಹರ್ನೂರ್‌ ಸಿಂಗ್‌ ಕೊಡುಗೆ ಮಹತ್ವದ್ದಾಗಿತ್ತು. ಅವರು 120 ರನ್‌ ಬಾರಿಸಿದರು. 130 ಎಸೆತಗಳ ಈ ರಂಜನೀಯ ಆಟದಲ್ಲಿ 11 ಬೌಂಡರಿ ಒಳಗೊಂಡಿತ್ತು. ನಾಯಕ್‌ ಯಶ್‌ ಧುಲ್‌ 63, ರಾಜ್ಯವರ್ಧನ್‌ ಅಜೇಯ 48 ರನ್‌ ಮಾಡಿದರು.

ಬೌಲಿಂಗ್‌ನಲ್ಲೂ ಮಿಂಚಿದ ರಾಜ್ಯವರ್ಧನ್‌ 24ಕ್ಕೆ 3 ವಿಕೆಟ್‌ ಕೆಡವಿದರು. ಗರ್ವ್‌ ಸಂಗ್ವಾನ್‌, ವಿಕ್ಕಿ ಒಸ್ವಾಲ್‌, ಕೌಶಲ್‌ ತಾಂಬೆ ತಲಾ 2 ವಿಕೆಟ್‌ ಉರುಳಿಸಿದರು. ಯುಎಇ ಸರದಿಯಲ್ಲಿ 45 ರನ್‌ ಮಾಡಿದ ಕೈ ಸ್ಮಿತ್‌ ಅವರದೇ ಹೆಚ್ಚಿನ ಗಳಿಕೆಯಾಗಿತ್ತು.

ಇದನ್ನೂ ಓದಿ:ಪ್ರೊ ಕಬಡ್ಡಿ: ಜೈಪುರ್‌ ಪಿಂಕ್‌ ಪ್ಯಾಂಥರ್ ವನ್ನು ಕೆಡವಿದ ಗುಜರಾತ್‌ ಜೈಂಟ್ಸ್‌

ಸಂಕ್ಷಿಪ್ತ ಸ್ಕೋರ್‌: ಭಾರತ-5 ವಿಕೆಟಿಗೆ 282 (ಹರ್ನೂರ್‌ 120, ಧುಲ್‌ 63, ರಾಜ್ಯವರ್ಧನ್‌ ಔಟಾಗದೆ 48, ಶರಾಫ‌ುಲ್‌ 44ಕ್ಕೆ 2). ಯುಎಇ-34.3 ಓವರ್‌ಗಳಲ್ಲಿ 128 (ಸ್ಮಿತ್‌ 45, ಸೂರ್ಯ ಸತೀಶ್‌ 21, ರಾಜ್ಯವರ್ಧನ್‌ 24ಕ್ಕೆ 3, ಒಸ್ವಾಲ್‌ 7ಕ್ಕೆ 2, ತಾಂಬೆ 16ಕ್ಕೆ 2, ಸಂಗ್ವಾನ್‌ 39ಕ್ಕೆ 2).