ಭಾರತದಲ್ಲಿ ಈ ವರ್ಷ ಹುಲಿಗಳ ಸಾವಿನ ಸಂಖ್ಯೆ ಏರಿಕೆ

Team Udayavani, Dec 31, 2021, 6:50 AM IST

ಹೊಸದಿಲ್ಲಿ: 2021ರಲ್ಲಿ ಭಾರತದ ರಾಷ್ಟ್ರೀಯ ಪ್ರಾಣಿ ಹುಲಿಗಳ ಸಾವಿನ ಸಂಖ್ಯೆಯಲ್ಲಿ ಗಣನೀಯ ಏರಿಕೆಯಾಗಿದೆ. ಮೃತಪಟ್ಟ ಒಟ್ಟು 126 ಹುಲಿಗಳಲ್ಲಿ ಅಸಹಜ ಕಾರಣಗಳಿಂದ ಸಾವನ್ನಪ್ಪಿರುವ ಹುಲಿಗಳ ಸಂಖ್ಯೆಯೇ ಅಧಿಕ. ಹಾಗೆಯೇ ಮೃತಪಟ್ಟ ಹುಲಿಗಳ ಪೈಕಿ ಶೇ.30 ಸಂರಕ್ಷಣ ವಲಯದಿಂದ ಹೊರಗಿದ್ದವು ಎಂಬ ಮಾಹಿತಿ ಲಭ್ಯವಾಗಿದೆ.

ಈ ಹಿನ್ನೆಲೆಯಲ್ಲಿ ರಾಷ್ಟ್ರೀಯ ಹುಲಿ ಸಂರಕ್ಷಣ ಪ್ರಾಧಿಕಾರ (ಎನ್‌ಟಿಸಿಎ) ತನಿಖೆಗೆ ಆದೇಶಿಸಿದೆ. ಇತ್ತೀಚೆಗೆ ಮಧ್ಯಪ್ರದೇಶದ ಚಿಂದ್ವಾಡದಲ್ಲಿ ಹುಲಿಯೊಂದು ಸತ್ತಿದೆ. ಅದಕ್ಕೂ ಎರಡು ದಿನಗಳ ಮುನ್ನ ದಿಂಡೋರಿಯಲ್ಲಿ ಹೆಣ್ಣು ಹುಲಿಯೊಂದು ಮೃತಪಟ್ಟಿತ್ತು. ವಿಷಸೇವನೆಯಿಂದ ಈ ಸಾವು ಸಂಭವಿಸಿದೆ ಎಂದು ಅನಂತರ ತಿಳಿದುಬಂದಿತ್ತು. ಒಟ್ಟಾರೆ ಬರೀ ಮಧ್ಯಪ್ರದೇಶದಲ್ಲಿ ಸಂಭವಿಸಿದ ಹುಲಿಗಳ ಸಾವಿನ ಸಂಖ್ಯೆ 44! ಇವೆಲ್ಲವೂ ರಾಷ್ಟ್ರೀಯ ಹುಲಿ ಸಂರಕ್ಷಣ ಪ್ರಾಧಿಕಾರಕ್ಕೆ ಚಿಂತೆ ಮೂಡಿಸಿದೆ. ಆದ್ದರಿಂದ ಅರಣ್ಯ ಪ್ರದೇಶದಲ್ಲಿ ಗಸ್ತು ಹೆಚ್ಚಿಸುವುದು, ಕಳ್ಳಬೇಟೆಗಾರರನ್ನು ಬಂಧಿಸುವುದನ್ನು ಹೆಚ್ಚಿಸಲಾಗಿದೆ.

ಕರ್ನಾಟಕದಲ್ಲಿ 14 ಹುಲಿ ಸಾವು: ಪ್ರಸಕ್ತ ವರ್ಷ ಅತ್ಯಧಿಕ ಹುಲಿಗಳು ಸಾವಿಗೀಡಾಗಿದ್ದು ಮಧ್ಯಪ್ರದೇಶದಲ್ಲಿ. ಇಲ್ಲಿ 44 ಹುಲಿಗಳು ಮೃತಪಟ್ಟರೆ, ಎರಡನೇ ಸ್ಥಾನದಲ್ಲಿರುವ ಮಹಾರಾಷ್ಟ್ರದಲ್ಲಿ 26 ಹುಲಿಗಳು ಸಾವಿಗೀಡಾಗಿವೆ. ಈ ಪಟ್ಟಿಯಲ್ಲಿ  ಕರ್ನಾಟಕ 3ನೇ ಸ್ಥಾನದಲ್ಲಿದೆ. ಇಲ್ಲಿ 14 ಹುಲಿಗಳು ಅಸುನೀಗಿವೆ.