ಅರ್ಧ ಟಿಕೆಟ್: 10 ರೂ. ಕೋಳಿ ಮರಿಗೆ 52 ರೂ. ಬಸ್ ಚಾರ್ಜ್!

Team Udayavani, Jan 1, 2022, 4:48 PM IST

ಹೊಸನಗರ: 10 ರೂಪಾಯಿ ಬೆಲೆ ಕೊಟ್ಟು ಖರೀದಿಸಿದ್ದ ಕೋಳಿ ಮರಿಗೆ 52 ರೂ. ಬಸ್ ಚಾರ್ಜ್ ನೀಡಿದ ಪ್ರಸಂಗವೊಂದು ನಡೆದಿದೆ.

ಬೈಂದೂರಿನ ಶಿರೂರಿಗೆ ಹೊರಟಿದ್ದ ಅಲೆಮಾರಿ ಕುಟುಂಬವೊಂದು ಸರ್ಕಾರಿ ಬಸ್ಸು ಹತ್ತಿತ್ತು. ಬಸ್ಸಿನ ಕಂಡಕ್ಟರ್ ಬಂದು ಎಲ್ಲಿಗೆ ಎಂದು ಕೇಳಿದಾಗ ಶಿರೂರು ಹೋಗಬೇಕ್ರಿ.. ಮೂರು ಟಿಕೆಟ್ ಕೊಡ್ರಿ ಅಂದಿಗೆ. ಅದೇ ವೇಳೆ ಪುಟ್ಟ ಚೀಲದಿಂದ ಚಿವ್ ಚಿವ್ ಶಬ್ಧ ಬರುತ್ತಿದ್ದನ್ನು ಆಲಿಸಿದ ಕಂಡಕ್ಟರ್ ಅದು ಏನು ಎಂದು ಪ್ರಶ್ನಿಸಿದ. ಅದು ಒಂದು ಕೋಳಿ‌ ಮರೀರಿ.. ಎಂದು ಪ್ರತಿಕ್ರಿಯೆ ನೀಡಿದ್ದಾರೆ. ಕೂಡಲೇ ಕಂಡಕ್ಟರ್ ಅದಕ್ಕೂ ಟಿಕೆಟ್ ಮಾಡ ಬೇಕು. ಅದಕ್ಕೂ ರೂಲ್ಸ್ ಇದೆ ಎಂದು ಅರ್ಧ ಚಾರ್ಜ್, ಬರೋಬ್ಬರಿ ರೂ.52 ದರ ಮಾಡಿ ಟಿಕೆಟ್ ಕೊಟ್ಟಿದ್ದಾರೆ . ಮುಖಮುಖ ನೋಡಿಕೊಂಡ ಆ ಮೂವರು ಬೇರೆದಾರಿ ಕಾಣದೆ ಟಿಕೆಟ್ ತಗೆದುಕೊಂಡಿದ್ದಾರೆ.

ಶಿರಸಿ ಸಿದ್ದಾಪುರದಿಂದ ಬಂದ ಆ ಕುಟುಂಬ ರೂ.10 ಕೊಟ್ಟು ಕೋಳಿ ಮರಿ ತಂದಿದ್ದರು. ಬಸ್ಸಿನ ಟಿಕೆಟ್ ದರ ನೋಡಿ ಮೂಗಿಗಿಂತ ಮೂಗುತಿ ಭಾರ ಅಂದಂಗಾಯ್ತು ಎಂದು ಗೊಣಗಿಕೊಂಡರು.ಈ ಇಡೀ ದೃಶ್ಯ ಬಸ್ಸಿನಲ್ಲಿದ್ದವರ ಕುತೂಹಲ ಮತ್ತು ಚರ್ಚೆಗೂ ಗ್ರಾಸವಾಯ್ತು.