ಬೊಗಳೆ ಶಾಸಕರಿಗೆ ಪಿಎಲ್ಡಿ ಬ್ಯಾಂಕ್ ಚುನಾವಣೆಯಲ್ಲಿ ಮುಖಭಂಗ : ಕೆ.ವೆಂಕಟೇಶ್ ವ್ಯಂಗ್ಯ

Team Udayavani, Jan 7, 2022, 8:46 PM IST

ಪಿರಿಯಾಪಟ್ಟಣ: ಸಾಚಾ ರಾಜಕಾರಣ ಮಾಡುತ್ತೇವೆ ಎಂದು ಬೊಗಳೆ ಬಿಡುವ ಶಾಸಕ ಮತ್ತು ಅವರ ಮಗ ಪಿಎಲ್ಡಿ ಬ್ಯಾಂಕ್ ಚುನಾವಣೆಯಲ್ಲಿ ತಮಗೆ ಬಹುಮತ ಇಲ್ಲ ಎಂದು ಗೊತ್ತಿದ್ದರೂ ಹಿಂಬಾಗಿಲಿನಿಂದ ಅಧಿಕಾರ ಹಿಡಿಯಲು ಹವಣಿಸಿ ಮುಖಭಂಗ ಅನುಭವಿಸಿದ್ದಾರೆ ಎಂದು ಮಾಜಿ ಶಾಸಕ ಕೆ.ವೆಂಕಟೇಶ್ ಆರೋಪಿಸಿದರು.

ಪಟ್ಟಣದ ಕಾಂಗ್ರೆಸ್ ಪಕ್ಷದ ಕಚೇರಿಯಲ್ಲಿ ನೂತನವಾಗಿ ಆಯ್ಕೆಯಾದ ಪಿಎಲ್ಡಿ ಬ್ಯಾಂಕಿನ ಅಧ್ಯಕ್ಷ ಮತ್ತು ಉಪಾಧ್ಯಕ್ಷರಿಗಾಗಿ ಹಮ್ಮಿಕೊಂಡಿದ್ದ ಅಭಿನಂದನಾ ಸಮಾರಂಭದಲ್ಲಿ ಮಾತನಾಡಿದರು.

ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಬಹುಮತ ಗಳಿಸಿದವರು ಒಪ್ಪಂದದ ಆಧಾರದ ಮೇಲೆ ಅಧಿಕಾರ ಹಂಚಿಕೆ ಮಾಡಿಕೊಳ್ಳುವುದು ಸರ್ವೆ ಸಾಮಾನ್ಯ ಹೀಗಿರುವಾಗ ಪಿಎಲ್ಡಿ ಬ್ಯಾಂಕ್ ಚುನಾವಣೆಯಲ್ಲಿ ನಮ್ಮ ಪಕ್ಷದ ಬೆಂಬಲಿತರು ಬಹುಮತ ಪಡೆದು ತಲಾ 20 ತಿಂಗಳ ಅಧಿಕಾರ ಹಂಚಿಕೆ ಮಾಡಿ ಆಂತರಿಕ ಒಪ್ಪಂದದ ಮೂಲಕ ಅಧಿಕಾರ ಹಸ್ತಾಂತರ ಮಾಡಿಕೊಳ್ಳುತ್ತಿದ್ದರೆ ಶಾಸಕ ಮಹದೇವ್ ಮತ್ತು ಆತನ ಮಗ ಅನಗತ್ಯವಾಗಿ ಜೆಡಿಎಸ್ ಗೆ ಬಹುಮತ ಇಲ್ಲದಿದ್ದರೂ ಕಾರ್ಯಕರ್ತರಲ್ಲಿ ರಾಜಕೀಯ ಗೊಂದಲ ಮೂಡಿಸುವ ಕಾರ್ಯ ಮಾಡಿ ರಾತ್ರೋರಾತ್ರಿ ನಮ್ಮ ಪಕ್ಷದ ಸದಸ್ಯರನ್ನು ಖರೀದಿ ಮಾಡಿದ್ದೇವೆ ಎಂದು ಗುಲ್ಲೆಬ್ಬಿಸಿ, ನಮ್ಮ ನಿರ್ದೇಶಕರಿಗೆ ಮಾನಸಿಕವಾಗಿ ಹಿಂಸೆ ನೀಡಿದ್ದಲ್ಲದೆ ಹಣದ ಆಮಿಶ ಒಡ್ಡಿದ್ದಾರೆ ಹೀಗಿದ್ದರೂ, ಯಾವುದೆ ಆಮಿಷಕ್ಕೆ ಒಳಗಾಗದೆ ಕಾಂಗ್ರೆಸ್ ಪಕ್ಷದ ಕಾರ್ಯಕರ್ತರು 8 ಮತಗಳಲ್ಲಿ ನಮ್ಮ ಪಕ್ಷದ ಬೆಂಬಲಿತ ಅಭ್ಯರ್ಥಿಗೆ ನೀಡುವ ಮೂಲಕ ಒಗ್ಗಟ್ಟು ಪ್ರದರ್ಶನ ಮಾಡುವ ಮೂಲಕ ನಾವು ಖರೀದಿಯಾಗುವ ಸರಕುಗಳಲ್ಲ ಎಂದು ನಿರೂಪಿಸಿದ್ದಾರೆ. ಮುಂದೆಯೂ ಎಲ್ಲಾ ಚುನಾವಣೆಗಳಲ್ಲಿ ಕಾರ್ಯಕರ್ತರು ಶ್ರಮವಹಿಸಿ ದುಡಿಯುವ ಮೂಲಕ ಎಲ್ಲಾ ಹಂತದ ಚುನಾವಣೆಗಳಲ್ಲೂ ಅಧಿಕಾರ ಹಿಡಿಯಬೇಕು ಎಂದರು.

ಅಧಿಕಾರ ದುರ್ಬಳಕೆ: ನೂತನ ಅಧ್ಯಕ್ಷ ಈ.ಪಿ.ಲೋಕೇಶ್ ಮಾತನಾಡಿ ಹಾಲಿ ಶಾಸಕರು ತಮ್ಮ ಅಧಿಕಾರ ದುರ್ಬಳಕೆ ಮಾಡಿಕೊಂಡು ನಮ್ಮ ನಿರ್ದೇಶಕರನ್ನು ಹೆದರಿಸಿ ಹಣಕ್ಕೆ ಕೊಂಡುಕೊಳ್ಳುವ ಪ್ರಯತ್ನ ಮಾಡಿದ್ದರು. ಅವರ ಮಗ ಪಿ.ಎಂ.ಪ್ರಸನ್ನ ಮೈಮೂಲ್ನಲ್ಲಿ ಕೆಲಸ ಕೊಡಿಸುವುದು ಹಾಗೂ ಸೈಟ್ ನೀಡುವ ಆಮಿಷ ಒಡ್ಡಿ ನಿರ್ದೇಶಕರನ್ನು ಸೆಳೆಯಲು ನೋಡಿದ ಆದರೆ ಇದು ಯಾವುದೆ ಸಾಧ್ಯವಾಗದೆ, ಕಾಂಗ್ರೆಸ್ ಪಕ್ಷದ ಬೆಂಬಲಿತ ನಿರ್ದೇಶಕರು ತಮ್ಮ ಗಟ್ಟಿತನ ಪ್ರದರ್ಶನ ಮಾಡಿದ್ಧಾರೆ. ಮಾಜಿ ಶಾಸಕ ಕೆ.ವೆಂಕಟೇಶ್ ಯುವಕರಿಗೆ ಆದ್ಯತೆ ನೀಡಿದ್ದು ಎಲ್ಲಾ ಯುವಕರು ಮುಂದಿನ ದಿನಗಳಲಿ ಕಾಂಗ್ರೆಸ್ ಬೆಂಬಲಿಸುವಂತೆ ಮನವಿ ಮಾಡಿದರು.

ಪಿಎಲ್ಡಿಬ್ಯಾಂಕ್ ನಿರ್ದೇಶಕನ ಪರಮೇಶ್ ಮಾತನಾಡಿ ಸಹಕಾರ ಸಂಘಗಳಲ್ಲಿ ರಾಜಕೀಯ ಎಳೆದು ತರುವ ಮೂಲಕ ಅನೈತಿಕ ರಾಜಕಾರಣಕ್ಕೆ ಶಾಸಕ ಮತ್ತು ಅವರ ಪುತ್ರ ಮುಂದಾಗಿದ್ದಾರೆ. ಹಿಟ್ನಹಳ್ಳಿ ಗ್ರಾಮದಲ್ಲಿ ಕಾಂಗ್ರೆಸ್ ಪಕ್ಷದ ಬೆಂಬಲಿಗರು ಹಾಲು ಉತ್ಪಾದಕರ ಸಹಕಾರ ಸಂಘಕ್ಕೆ ಆಯ್ಕೆಯಾಗಿದ್ದಾರೆ ಎಂಬ ಕಾರಣಕ್ಕೆ ಸೂಪರ್ಸೀಡ್ ಮಾಡಿಸಿ ಆಡಳಿತಾಧಿಕಾರಿ ನೇತೃತ್ವದಲ್ಲಿ ಕಟ್ಟಡ ಉದ್ಘಾಟನೆ ಮಾಡಿದ್ದಾರೆ ಎಂದು ಆರೋಪಿಸಿದರು.

ಉಪಾಧ್ಯಕ್ಷ ಶಿವರುದ್ರ ನಾಯಕ ಮತ್ತು ಮಾಜಿ ತಾ.ಪಂ.ಸದಸ್ಯ ರಾಮು ಐಲಾಪುರ ಮಾತನಾಡಿದರು.
ಈ ಸಂದರ್ಭದಲ್ಲಿ ಮಾಜಿ ಅಧ್ಯಕ್ಷ ಕೆ.ಹೊಲದಪ್ಪ, ನಿರ್ದೇಶಕರಾದ ಕೆ ಶ್ರೀನಿವಾಸ್, ಎಚ್.ಜಿ.ಪರಮೇಶ್, ಎಸ್.ಎಲ್ ಕುಮಾರಸ್ವಾಮಿ, ಸಾಕಮ್ಮ, ಪಿ.ಎಸ್.ಶಿವಾನಂದ, ನೀಲಮ್ಮ, ಗಿರೀಶ್, ಮುಖಂಡರಾದ ಪಿ.ಮಹದೇವ್, ಹಿಟ್ನೆಹೆಬ್ಬಾಗಿಲು ಶಿವರುದ್ರ, ಈಚೂರು ಈರೇಗೌಡ, ಪುಟ್ಟರಾಜು, ಭೀಮಣ್ಣ, ಬಸವರಾಜು, ಭುಜಂಗ, ಜೆ.ಮೋಹನ್, ಕಾಮರಾಜು, ಪಿ.ಪಿ.ಪುಟ್ಟಯ್ಯ, ರಹಮತ್ ಜಾನ್ ಬಾಬು ಮೋಹನ್ಕುಮಾರ್, ಶ್ರೀನಿವಾಸ್, ಮುರುಳೀಧರ್, ಹಬಟೂರು ರಘು, ಕೋಮಲಾಪುರ ಹರೀಶ್ ಸೇರಿದಂತೆ ಕಾಂಗ್ರೆಸ್ ಮುಖಂಡರು ಹಾಜರಿದ್ದರು.