ಸತ್ಯ ಆಯ್ತು ಹಾರಕೂಡ ಶ್ರೀಗಳ ಭವಿಷ್ಯ: ಶಾಸಕ ರಾಜಶೇಖರ ಪಾಟೀಲ್

Team Udayavani, Jan 8, 2022, 1:33 PM IST

ಹುಮನಾಬಾದ್: ವಿಧಾನ ಪರಿಷತ್ ಚುನಾವಣೆ ಸಂದರ್ಭದಲ್ಲಿ ಹಾರಕೂಡ ಮಠದ ಡಾ। ಚನ್ನವೀರ ಶಿವಾಚಾರ್ಯರು ಭೀಮರಾವ್ ಪಾಟೀಲ್ ಗೆಲುವಿನ ಕುರಿತು ಮೊದಲೇ ಭವಿಷ್ಯ ಹೇಳಿದ್ದು, ಅವರು ನುಡಿದಂತೆ ಅಧಿಕ ಮತಗಳಿಂದ ಚುನಾವಣೆಯಲ್ಲಿ ಸಹೋದರ ಜಯಶಾಲಿಯಾಗಿದ್ದಾರೆ ಎಂದು ಶಾಸಕ ರಾಜಶೇಖರ ಪಾಟೀಲ ಹೇಳಿದರು.

ವೀರಭದ್ರೇಶ್ವರ ಜಾತ್ರಾ ನಿಮಿತ್ಯ ಪೂರ್ವಸಿದ್ಧತಾ ಸಭೆಯಲ್ಲಿ ಮಾತನಾಡಿದ ಅವರು, ಚುನಾವಣೆ ಸಂದರ್ಭದಲ್ಲಿ ಮಠಕ್ಕೆ ಭೇಟಿ ನೀಡಿ ಶ್ರೀಗಳ ಆಶೀರ್ವಾದ ಪಡೆದ ಸಂದರ್ಭದಲ್ಲಿ ಚುನಾವಣೆಯಲ್ಲಿ ಸಹೋದರ ಭೀಮರಾವ ಪಾಟೀಲ್ ಗೆಲುವು ಖಚಿತ ಎಂದು ನುಡಿದಿದ್ದರು. ನಮ್ಮ ಆತ್ಮವಿಶ್ವಾಸ ತುಂಬಿದ್ದರು. ಶ್ರೀಗಳು ನುಡಿದಂತೆ ಫಲಿತಾಂಶ ಬಂದಿದೆ ಎಂದರು. ಈ ವಿಷಯ ಇವರೆಗೆ ಬಹಿರಂಗವಾಗಿ ಹೇಳಿದ್ದಿಲ್ಲ ಆದರೆ, ಇಂದು ಹೇಳಬೇಕಾಗಿ ಬಂದಿದೆ ಎಂದರು.

ನುಡಿದಂತೆ ನಡೆಯುವ ಕೆಲಸ ಮಾಡುತ್ತಿದ್ದು, ದೇವರ ಹಾಗೂ ಶ್ರಿಗಳ ಅನುಗ್ರಹದಿಂದ ಮೂರು ಸಹೋದರರು ಶಾಸಕರಾಗಿದ್ದೇವೆ ಎಂದರು. ವಿಧಾನ ಪರಿಷತ್ ಸದಸ್ಯ ಡಾ। ಚಂದ್ರಶ್ರೇಖರ ಪಾಟೀಲ ಮಾತಾನಾಡಿ, ಕುಲದೇವ ವೀರಭದ್ರನ ಕೃಪೆ ಹಾಗೂ ಕ್ಷೇತ್ರದ ಜನರ ಆಶೀರ್ವಾದಿಂದ ಮೂರು ಜನ ಸಹೋದರರು ಶಾಸಕರಾಗಿದ್ದೇವೆ. ಆ ಭಾಗದಲ್ಲಿ ದೇವೆಗೌಡರ ಕುಟುಂಬದಂತೆ ಇಲ್ಲಿ ನಮ್ಮ ಕುಟುಂಬದಲ್ಲಿ ಕೂಡ ಮೂರು ಜನ ಸಹೋದರರು ಅಧಿಕಾರದಲ್ಲಿ ಇರಲು ಕ್ಷೇತ್ರದ ಜನರು ಕಾರಣ ಎಂದರು.