11 ರಾಜ್ಯಗಳಲ್ಲಿ ಶಾಲೆ ಆರಂಭ

Team Udayavani, Feb 4, 2022, 6:40 AM IST

ಹೊಸದಿಲ್ಲಿ: ದೇಶದಲ್ಲಿ 11 ರಾಜ್ಯಗಳು ಶಾಲೆಗಳನ್ನು ಸಂಪೂರ್ಣ ಪ್ರಮಾಣದಲ್ಲಿ ತೆರೆದಿವೆ. 16 ರಾಜ್ಯಗಳಲ್ಲಿ ಭಾಗಶಃ ತೆರೆಯಲಾಗಿದ್ದರೆ ಉಳಿದ 9 ರಾಜ್ಯಗಳಲ್ಲಿ ಸಂಪೂ ರ್ಣವಾಗಿ ಮುಚ್ಚಲಾಗಿದೆ ಎಂದು ಕೇಂದ್ರ ಶಿಕ್ಷಣ ಸಚಿವಾ ಲಯ ಗುರುವಾರ ತಿಳಿಸಿದೆ.

ಹೊಸದಿಲ್ಲಿಯಲ್ಲಿ ಸುದ್ದಿಗೋಷ್ಠಿ ಯಲ್ಲಿ ಮಾತನಾಡಿದ ಶಿಕ್ಷಣ ಸಚಿವಾಲಯ ಜಂಟಿ ಕಾರ್ಯದರ್ಶಿ ಸ್ವೀಟಿ ಚಂಗ್ಸಾನ್‌, ಎಲ್ಲ ರಾಜ್ಯಗಳಲ್ಲಿ ಕನಿಷ್ಠ ಶೇ.95 ಬೋಧಕ ಮತ್ತು ಬೋಧಕೇತರ ಸಿಬಂದಿ ಕೊರೊನಾ ಲಸಿಕೆ ಪಡೆದಿದ್ದಾರೆ ಎಂದೂ ಸಚಿವಾಲಯ ತಿಳಿಸಿದೆ.

ಇದೇ ವೇಳೆ ಕರ್ನಾಟಕ ಸೇರಿ ದೇಶದ 34 ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಕೊರೊನಾ ಸೋಂಕಿನ ಪ್ರಮಾಣ ಮತ್ತು ಪಾಸಿಟಿವಿಟಿ ದರ ಇಳಿಕೆಯಾಗುತ್ತಿದೆ. ಕೇರಳ ಮತ್ತು ಮಿಜೋರಾಂನಲ್ಲಿ ಮಾತ್ರ ಏರಿಕೆ ದಾಖಲಾ ಗುತ್ತಿದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯದ ಜಂಟಿ ಕಾರ್ಯದರ್ಶಿ ಲವ ಅಗರ್ವಾಲ್‌ ಹೇಳಿದ್ದಾರೆ.

ಮೂರನೇ ಅಲೆಯಲ್ಲಿ ಸೋಂಕು ಯುವಜನತೆಗೇ ಹೆಚ್ಚಾಗಿ ಕಾಡಿದೆ. ಸೋಂಕಿತರ ಸರಾಸರಿ ವಯಸ್ಸು 44 ವರ್ಷವಾಗಿದೆ. ಈ ಹಿಂದಿನ ಅಲೆಗಳಲ್ಲಿ ಸೋಂಕಿತರ ಸರಾಸರಿ ವಯಸ್ಸು 55 ವರ್ಷವಾಗಿತ್ತು ಎಂದು ಅವರು ಹೇಳಿದ್ದಾರೆ. ಕೊರೊನಾ ಲಸಿಕೆ ಅಭಿಯಾನದಲ್ಲಿ ಅಕ್ರಮ ನಡೆಯುತ್ತಿದೆ ಎಂದು ಕೆಲವು ಮಾಧ್ಯಮಗಳು ಪ್ರಕಟಿಸಿದ ಸುದ್ದಿಯನ್ನು ಸುಳ್ಳೆಂದು ಅವರು ತಿಳಿಸಿದರು.

ದೈನಂದಿನ ಪ್ರಕರಣ: ಬುಧವಾರದಿಂದ ಗುರುವಾರದ ಅವಧಿಯಲ್ಲಿ ದೇಶದಲ್ಲಿ 1,72,433 ಕೊರೊನಾ ಪ್ರಕರಣ ದೃಢವಾಗಿದೆ. ಒಟ್ಟಾರೆ ಸೋಂಕಿತರ ಸಂಖ್ಯೆ 4.18 ಕೋಟಿಗೆ ಏರಿಕೆಯಾಗಿದ್ದು, ಸಕ್ರಿಯ ಪ್ರಕರಣಗಳ ಸಂಖ್ಯೆ 15,33, 921ಕ್ಕೆ ಇಳಿದಿದೆ. 24 ಗಂಟೆಗಳಲ್ಲಿ 1,008 ಸೋಂಕಿತರು ಸಾವನ್ನಪ್ಪಿದ್ದಾರೆ.

ಲಸಿಕೆಗೆ ಅನುಮೋದನೆ: ಹೈದರಾಬಾದ್‌ನ ಬಯೋಲಾಜಿ ಕಲ್‌ ಇ ಸಂಸ್ಥೆ ತಯಾರಿಸಿರುವ 6 ಕೋಟಿ ಡೋಸ್‌ ಕೋರ್ಬೆವಾಕ್ಸ್‌ ಲಸಿಕೆಗೆ ಕೇಂದ್ರ ಸರಕಾರದ ಅಧೀನದಲ್ಲಿ ರುವ ಕೇಂದ್ರೀಯ ಔಷಧ ಪ್ರಯೋಗಶಾಲೆ(ಸಿಡಿಎಲ್‌) ಅನುಮೋದನೆ ಕೊಟ್ಟಿದೆ. ಹಾಗೆಯೇ ಸೀರಂ ಇನ್‌ಸ್ಟಿಟ್ಯೂಟ್‌ ತಯಾರಿಸಿರುವ ‌ ಕೊವಾವ್ಯಾಕ್ಸ್‌ನ 3 ಕೋಟಿ ಡೋಸ್‌ ಹಾಗೂ ಜಾನ್ಸನ್‌ ಆ್ಯಂಡ್‌ ಜಾನ್ಸನ್‌ನ ಸಿಂಗಲ್‌ ಡೋಸ್‌ ಲಸಿಕೆಗೂ ಅನುಮೋದನೆ ಕೊಡಲಾಗಿದೆ.