ಸೊಳ್ಳೆ ಕಚ್ಚುವುದರಿಂದ ತಪ್ಪಿಸಿಕೊಳ್ಳಬೇಕೇ? ಹಾಗಾದರೆ ಹೀಗೆ ಮಾಡಿ…

Team Udayavani, Feb 6, 2022, 7:20 AM IST

ವಾಷಿಂಗ್ಟನ್‌: ಸೊಳ್ಳೆ ಕಚ್ಚುವುದರಿಂದ ತಪ್ಪಿಸಿಕೊಳ್ಳಬೇಕೇ? ಹಾಗಾದರೆ ಕೆಂಪು, ಕಪ್ಪು ಮತ್ತು ಕಿತ್ತಳೆ ಬಣ್ಣದ ಬಟ್ಟೆ ಬಿಟ್ಟು ಬೇರೆ ಬಣ್ಣದ ಬಟ್ಟೆಗಳನ್ನೇ ಧರಿಸಿ. ಹೌದು! ಅಮೆರಿಕದ ವಾಷಿಂಗ್ಟನ್‌ ವಿಶ್ವವಿದ್ಯಾಲಯದ ಸಂಶೋಧಕರು ನಡೆಸಿರುವ ಅಧ್ಯಯನ ಪ್ರಕಾರ ಸೊಳ್ಳೆಗೆ ಈ ಮೇಲಿನ ಮೂರು ಬಣ್ಣಗಳೆಂದರೆ ಬಲು ಪ್ರೀತಿಯಂತೆ.

ಸೊಳ್ಳೆಗಳು ಮೊದಲು ಗ್ರಹಿಸುವುದು ವಾಸನೆಯನ್ನು. ಮನುಷ್ಯನ ದೇಹದಿಂದ ಬಿಡುಗಡೆಯಾಗುವ ಇಂಗಾಲದ ಡೈ ಆಕ್ಸೆ„ಡ್‌ನ್ನು ಗ್ರಹಿಸಿದ ತಕ್ಷಣ ಅವುಗಳು ಮನುಷ್ಯನತ್ತ ಕಣ್ಣು ಹಾಯಿಸುತ್ತವೆ. ಆದರೆ, ಬಣ್ಣಗಳಿಂದಲೂ ಅವು ಹೆಚ್ಚು ಆಕರ್ಷಿತವಾಗುತ್ತವೆ. ಮನುಷ್ಯ ಕೆಂಪು, ಕಪ್ಪು ಅಥವಾ ಕಿತ್ತಳೆ ಬಣ್ಣದ ಬಟ್ಟೆ ಹಾಕಿದ್ದರೆ, ಚೂರೂ ತಡ ಮಾಡದೆ ಹೋಗಿ ಮನುಷ್ಯನನ್ನು ಕಚ್ಚುತ್ತವೆ ಎನ್ನುತ್ತಾರೆ ಸಂಶೋಧಕರು.

ಇದನ್ನೂ ಓದಿ:ಚಾಮರಾಜನಗರ: ಅಪ್ರಾಪ್ತ ಬಾಲಕಿಯನ್ನು ಬಲವಂತವಾಗಿ ಮದುವೆಯಾದ ವ್ಯಕ್ತಿಗೆ 10 ವರ್ಷ ಸಜೆ

ಇನ್ನೊಂದು ವಿಚಾರವೇನೆಂದರೆ, ಮನುಷ್ಯನ ದೇಹದ ಬಣ್ಣವೇ ಕೆಂಪು. ಪ್ರತಿ ಸೊಳ್ಳೆಯ ಕಣ್ಣಿಗೆ ಮನುಷ್ಯನ ದೇಹದ ಕೆಂಪು ಬಣ್ಣ ಎದ್ದು ಕಾಣುತ್ತದೆ. ಹಾಗಾಗಿ ನೀವು ಯಾವುದೇ ಬಣ್ಣದ ಬಟ್ಟೆ ಹಾಕಿದ್ದರೂ ಸೊಳ್ಳೆ ನಿಮ್ಮನ್ನು ಬಿಡುವುದಿಲ್ಲ. ಆದರೆ ಸೊಳ್ಳೆಯ ಪ್ರೀತಿಯ ಬಣ್ಣದ ಬಟ್ಟೆ ಹಾಕಿದ್ದರೆ ಅವುಗಳಿಂದ ಕಚ್ಚಿಸಿಕೊಳ್ಳುವ ಸಾಧ್ಯತೆ ಹೆಚ್ಚು ಎನ್ನುವುದು ಸಂಶೋಧಕರ ಮಾತು.