ಮುಂಬೈ ಇಂಡಿಯನ್ಸ್‌ಯತ್ತ ಮುಖ ಮಾಡುವರೇ ಲೆಗ್‌ಸ್ಪಿನ್ನರ್‌ ಯಜುವೇಂದ್ರ ಚಹಲ್‌ ?

Team Udayavani, Feb 8, 2022, 6:34 AM IST

ಅಹ್ಮದಾಬಾದ್‌: ಈಗಾಗಲೇ ಆರ್‌ಸಿಬಿಯಿಂದ ಹೊರಬಿದ್ದಿರುವ ಲೆಗ್‌ಸ್ಪಿನ್ನರ್‌ ಯಜುವೇಂದ್ರ ಚಹಲ್‌ ಮುಂದಿನ ವಾರದ ಮೆಗಾ ಹರಾಜಿನಲ್ಲಿ ಮುಂಬೈ ಇಂಡಿಯನ್ಸ್‌ ಪಾಲಾಗುವ ಸಾಧ್ಯತೆಯೊಂದು ಕಂಡುಬಂದಿದೆ.

ವೆಸ್ಟ್‌ ಇಂಡೀಸ್‌ ಎದುರಿನ ಮೊದಲ ಏಕದಿನ ಪಂದ್ಯದಲ್ಲಿ 4 ವಿಕೆಟ್‌ ಹಾರಿಸುವ ಮೂಲಕ ಅವರು ಬೇಡಿಕೆಯನ್ನು ಕುದುರಿಸಿಕೊಂಡಿದ್ದಾರೆ. ಈ ಸಂದರ್ಭದಲ್ಲಿ ನಾಯಕ ರೋಹಿತ್‌ ಶರ್ಮ ಕೂಡ ಚಹಲ್‌ ಕಾಲೆಳೆದಿದ್ದಾರೆ.

“100 ವಿಕೆಟ್‌ ಪೂರ್ತಿಗೊಂಡಿದೆ. ಉತ್ತಮ ಸಾಧನೆ. ಮೆಗಾ ಹರಾಜು ಸಮೀಪಿಸುತ್ತಿದೆ. ನಿಮಗೆ ಅದೃಷ್ಟ ಒಲಿಯಲಿ…’ ಎಂದು ರೋಹಿತ್‌ ಶರ್ಮ ತಮಾಷೆ ಮಾಡಿದ್ದಾರೆ. ಬಿಸಿಸಿಐ ಟಿವಿಗೆ ಚಹಲ್‌ ಅವರನ್ನು ರೋಹಿತ್‌ ಸಂದರ್ಶಿಸಿದ್ದರು.
ಇದೇ ಸಂದರ್ಭದಲ್ಲಿ ಚಹಲ್‌ಗೆ ರೋಹಿತ್‌ ಕೆಲವು ಬೌಲಿಂಗ್‌ ಸಲಹೆಗಳನ್ನೂ ನೀಡಿದರು. ಹೆಚ್ಚೆಚ್ಚು ಗೂಗ್ಲಿ ಎಸೆದರೆ ಲೆಗ್‌ಬ್ರೇಕ್‌ ಎಸೆತಗಳು ಹೆಚ್ಚು ಪರಿಣಾಮಕಾರಿಯಾಗಿರುತ್ತವೆ ಎಂದರು. ಟೀಮ್‌ ಇಂಡಿಯಾದಿಂದ ಹೊರಗುಳಿದಿದ್ದಾಗ ತಾನು ಬೌಲಿಂಗ್‌ ಶೈಲಿಯಲ್ಲಿ ಒಂದಿಷ್ಟು ಬದಲಾವಣೆ ಮಾಡಲು ಪ್ರಯತ್ನಿಸಿದೆ ಎಂದು ಚಹಲ್‌ ಹೇಳಿದರು.

ಇದನ್ನೂ ಓದಿ:ಪ್ರೊ ಕಬಡ್ಡಿ : ಜೈಪುರ್‌ ಪಿಂಕ್‌ ಪ್ಯಾಂಥರ್ ಎಂಟನೇ ಗೆಲುವು

ರೋಹಿತ್‌ ಶರ್ಮ ಐಪಿಎಲ್‌ನ ಅತ್ಯಂತ ಯಶಸ್ವಿ ನಾಯಕನಾಗಿದ್ದು, ಚಹಲ್‌ ಮೇಲೆ ಒಂದು ಕಣ್ಣಿಟ್ಟಿರುವುದು ಸ್ಪಷ್ಟ. ಸರಣಿಯ ಉಳಿದ ಪಂದ್ಯಗಳಲ್ಲೂ ಚಹಲ್‌ ಮ್ಯಾಜಿಕ್‌ ಮಾಡಿದರೆ ಅವರು ಮುಂಬೈ ಇಂಡಿಯನ್ಸ್‌ ಸೇರಿಕೊಳ್ಳುವುದು ಖಚಿತ ಎಂಬ ಸುದ್ದಿ ಹರಿದಾಡುತ್ತಿದೆ.