ಪ್ರೊ ಕಬಡ್ಡಿ: ಹರ್ಯಾಣ ಸ್ಟೀಲರ್, ಪಾಟ್ನಾ ಪೈರೇಟ್ಸ್‌ ಗೆಲುವಿನ ಆಟ

Team Udayavani, Feb 8, 2022, 10:49 PM IST

ಬೆಂಗಳೂರು: ಮಂಗಳವಾರದ ಪ್ರೊ ಕಬಡ್ಡಿ ಪಂದ್ಯಗಳಲ್ಲಿ ಹರ್ಯಾಣ ಸ್ಟೀಲರ್ ಮತ್ತು ಪಾಟ್ನಾ ಪೈರೇಟ್ಸ್‌ ತಂಡಗಳು ಗೆಲುವಿನ ಸಂಭ್ರಮ ಆಚರಿಸಿವೆ.

ದಿನದ ಮೊದಲ ಪಂದ್ಯದಲ್ಲಿ ಹರ್ಯಾಣ 37-29 ಅಂತರದಿಂದ ತಮಿಳ್‌ ತಲೈವಾಸ್‌ ತಂಡವನ್ನು ಮಣಿಸಿತು. ಬಳಿಕ ಪಾಟ್ನಾ 47-36 ಅಂಕಗಳಿಂದ ಯು ಮುಂಬಾಗೆ ಸೋಲುಣಿಸಿತು.

ಅಗ್ರಸ್ಥಾನಿ ಪಾಟ್ನಾಗೆ ಒಲಿದ ಸತತ 4ನೇ ಜಯ ಇದಾಗಿದೆ. 17 ಪಂದ್ಯಗಳಲ್ಲಿ ಒಲಿದ 12ನೇ ಗೆಲುವು. ಒಟ್ಟು ಅಂಕ 65ಕ್ಕೆ ಏರಿದೆ. ರೈಡರ್‌ಗಳಾದ ಸಚಿನ್‌ 16, ಗುಮಾನ್‌ ಸಿಂಗ್‌ 11 ಅಂಕ ಗಳಿಸಿ ಪಾಟ್ನಾಗೆ ಭರ್ಜರಿ ಮೇಲುಗೈ ಒದಗಿಸಿದರು. ಮುಂಬಾ ಪರ ಅಭಿಷೇಕ್‌ 13, ವಿ. ಅಜಿತ್‌ 11 ಅಂಕ ಗಳಿಸಿ ಹೋರಾಟ ಸಂಘಟಿಸಿದರು.

ಹರ್ಯಾಣ ಜಯದಲ್ಲಿ ರೈಡರ್‌ ಅಶಿಷ್‌ ಪಾತ್ರ ಮಹತ್ವದ್ದಾಗಿತ್ತು. ಅವರು 16 ಅಂಕ ತಂದಿತ್ತರು. ನಾಯಕ ವಿಕಾಸ್‌ ಖಂಡೋಲ 8 ಅಂಕ ಗಳಿಸಿದರು. ಇದು ಹರ್ಯಾಣಕ್ಕೆ ಒಲಿದ ಹ್ಯಾಟ್ರಿಕ್‌ ಜಯ. ಅದೀಗ 58 ಅಂಕಗಳೊಂದಿಗೆ ದ್ವಿತೀಯ ಸ್ಥಾನಕ್ಕೆ ನೆಗೆದಿದೆ.