ವಿವರ ಹಂಚಿಕೊಳ್ಳಲು ರಾಜ್ಯಗಳ ನಿರುತ್ಸಾಹ

Team Udayavani, Feb 14, 2022, 6:15 AM IST

ಹೊಸದಿಲ್ಲಿ: ರಾಜ್ಯಗಳು ಪಡಿತರ ಚೀಟಿ ಹೊಂದಿದವರ ಆಧಾರ್‌ ವಿವರಗಳನ್ನು ಹಂಚಿಕೊಳ್ಳಬೇಕು ಎಂಬ ರಾಷ್ಟ್ರೀಯ ಆರೋಗ್ಯ ಪ್ರಾಧಿಕಾರ (ಎನ್‌ಎಚ್‌ಎ) ಸೂಚನೆಗೆ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳು ಹೆಚ್ಚಿನ ಆಸಕ್ತಿ ವಹಿಸಿಲ್ಲ. ಇದರಿಂದ ಮಾಹಿತಿ ಸೋರಿಕೆಯಾಗ­ಬಹುದು ಎಂಬ ಆತಂಕವನ್ನು ಅವು ವ್ಯಕ್ತಪಡಿಸಿವೆ.

ಆಯುಷ್ಮಾನ್‌ ಭಾರತ ಪ್ರಧಾನಮಂತ್ರಿ ಜನ ಆರೋಗ್ಯ ಯೋಜನೆ (ಎಬಿಪಿಎಂಜೆಎವೈ)ಯ ಫ‌ಲಾನುಭವಿಗಳನ್ನು ಗುರುತಿಸಲು ಪಡಿತರ ಚೀಟಿ ಹೊಂದಿದವರ ಮಾಹಿತಿ ಹಂಚಿಕೊಳ್ಳುವಂತೆ ಎನ್‌ಎಚ್‌ಎ ರಾಜ್ಯಗಳಿಗೆ ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಈ ಹಿಂದೆ ಮನವಿ ಮಾಡಿಕೊಂಡಿತ್ತು. ಪಡಿತರ ಚೀಟಿ ಹೊಂದಿದವರ ಪಡೆದುಕೊಂಡರೆ ಪ್ರಧಾನಮಂತ್ರಿ ಜನ ಆರೋಗ್ಯ ಯೋಜನೆಯ ಫ‌ಲಾನುಭವಿಗಳನ್ನು ಗುರುತಿಸುವುದು ಸುಲಭ ಎನ್ನುವುದು ಎನ್‌ಎಚ್‌ಎ ಲೆಕ್ಕಾಚಾರ. ಅದಕ್ಕಾಗಿ ಪ್ರಾಧಿಕಾರದ ಸಿಇಒ ಜ. 5ರಂದು ಪತ್ರ ಬರೆದಿದ್ದರು. ಇದರ ಜತೆಗೆ ಕೇಂದ್ರದ ಆಹಾರ ಮತ್ತು ಸಾರ್ವಜನಿಕ ವಿತರಣ ವ್ಯವಸ್ಥೆಯ ನಿರ್ದೇಶಕ‌ ವಿವೇಕ್‌ ಶುಕ್ಲಾ ಕೂಡ ರಾಜ್ಯಗಳಿಗೆ ಪತ್ರ ಬರೆದಿದ್ದರು. ಆದರೆ ರಾಜ್ಯಗಳು ಮಾಹಿತಿ ಸುರಕ್ಷತೆಯ ಆತಂಕ ಮುಂದಿಟ್ಟು ಹಂಚಿಕೊಳ್ಳಲು ಮುಂದಾಗಿಲ್ಲ.